ԵՐԵՎԱՆ, 4 հուլիսի — Sputnik. Հրազդան-Շինուհայր էլեկտրահաղորդման նոր գիծն արդեն միացվել է ցանցին, Sputnik Արմենիայի հետ զրույցում ասաց «Հայաստանի բարձրավոլտ էլեկտրացանցեր» պետական ՓԲԸ տնօրենի խորհրդական Գարուշ Նազարյանը:
220 կՎ լարման գիծը կապում է երկրի կենտրոնում գտնվող Հրազդանի ՋԷԿ-ը հարավում գտնվող Որոտանի կասկադ ՀԷԿ-ի հետ: Շինարարությունն իրականացվում է Համաշխարհային բանկի «Էլեկտրաէներգիայի մատակարարման հուսալիություն» ծրագրի շրջանակներում: Նոր գիծը կնվազեցնի և՛ էլեկտրաէներգիայի կորուստը (լարերի կտրվածքի մակերեսի մեծության շնորհիվ) և՛ վթարային անջատումների վտանգը: Կաճի դեպի Իրան թողունակությունը և մատակարարումների հուսալիությունը:
230 կմ երկարություն ունեցող նոր գիծը կառուցել են հին գծին զուգահեռ: Հինն արդեն 45-50 տարի է` ինչ ծառայում է:
Շինարարությունն իրականացրել է Kalpataru Power Transmission Ltd հնդկական ընկերությունը: Գիծը գործում է 2017 թվականի նոյեմբերից, իսկ փոքր տեխնիկական հարցերը կլուծեն մոտ ժամանակում:
Մեկ այլ խոշոր ԷՀԳ դեպի Իրան դեռ կառուցվում է, ևս մեկը՝ դեպի Վրաստան, նախագծման փուլում է:
Դեպի Իրան 400 կՎ լարում ունեցող ԷՀԳ-ի շինարարությունը պետք է ավարտին հասցվի 2019 թվականին: Աշխատանքները կիսով չափ արված են, գիծը կառուցում է իրանական Sunir ընկերությունը, ֆինանսավորում՝ Իրանի կառավարությունը: Գծի հետ մեկտեղ պետք է նաև 2 ենթակայան կառուցվի՝ Դդմաշենում ու Նորավանում:
Նոր գիծը թույլ կտա եռակի (ներկայիս 350 ՄՎտ) մեծացնել թողտվությունը Հայաստանի և Իրանի միջև էլեկտրաէներգիայի սնուցման համար:
Իսկ դեպի Վրաստան գծի շինարարության մասին դեռ մտածում են: Նրա համար տեխնիկական առաջադրանքն արդեն պատրաստ էր, սակայն փոփոխման կարիք կա:
«Բարձրավոլտ էլցանցերի կառավարումը «Տաշիր գրուպից» վերադարձել է ՀՀ կառավարությանը: Այժմ մենք նորից ենք ուզում ուսումնասիրել նախագծի տարբերակներն ու լավագույն լուծումը գտնել», — հավելեց Նազարյանը:
Գաղափարը նույնն է մնում՝ ընդլայնել միջանցքը Հայաստանի և Վրաստանի միջև էլեկտրաէներգիայի փոխանակման համար: Դրա համար երկու երկրների էներգահամակարգերը մեկուսացված ռեժիմից կտեղափոխեն զուգահեռ ասինխրոն ռեժիմ:
Հայաստանը գարնանը փոքր ծավալներով էլեկտրականություն է ստանում Վրաստանից (երբ վրացական ՀԷԿ-երը էներգիայի ավելցուկ են ունենում): Իսկ ամռանն ու աշնանը, նույնպես փոքր քանակներով մատակարարում է հակառակ ուղղությամբ: Այժմ, փոխանակումը հաստատելու համար, կողմերը ստիպված են լինում իրենց էներգահամակարգերում սինխրոն աշխատանքի «կղզյակներ» ստեղծել: Այժմ Հայաստանում ուզում են 500 Կվ լարումով նոր ԷՀԳ անցկացնել և ենթակայան կառուցել հաստատուն հոսանքի ապահովմամբ: Դրա շնորհիվ Հայաստանի և Վրաստանի միջև էլեկտրաէներգիայի փոխանցման թողունակությունն ուզում են եռակի-քառակի անգամ մեծացնել ներկայիս 200 ՄՎտ-ից:
Բոլոր այս նախագծերը մեծապես կընդլայնեն Ռուսաստան-Վրաստան-Հայաստան-Իրան էներգետիկ միջանցքը:
