ԵՐԵՎԱՆ, 26 հուլիսի–Sputnik. Եթե նախկինում գյուղատնտեսական վարկերի 14 տոկոսից 6-ը սուբսիդավորում էր պետությունը, ապա շուտով վերջնական տոկոսադրույքը գյուղացիների համար լինելու է 5 տոկոս, իսկ սոցիալական աջակցություն ստացող սահմանամերձ համայնքներում` 3 տոկոս։ Այդ մասին հայտնեց գյուղատնտեսության նախարարի տեղակալ Ռոբերտ Մակարյանը։
«Այս տարի նախատեսվում է շուրջ 7,5 միլիարդ դրամի փաթեթ, իսկ հաջորդ տարիներին` շուրջ տասը միլիարդ դրամի տարեկան վարկեր կտրամադրվեն գյուղացիական տնտեսություններին։ Եթե նախկինում վարկերը տրամադրվում էին մինչև 3 միլիոն դրամի սահմանում, ապա նոր ծրագրով դրանք կտրամադրվեն 3–10 միլիոն դրամի սահմաններում և կլինեն կոնկրետ նպատակային, ծրագրային վարկեր»,– տեղեկացրեց Մակարյանը։
Բացի այդ, գյուղացիական զարգացման հիմնադրամի մարզային մասնաճյուղերն ուսուցում կկազմակերպեն գյուղացիների համար։ Այդկերպ կբարելավվի ագրոտեխնիկայի կանոնների իմացության, ֆինանսական գրագիտության մակարադակը։
«Հավաստագիրը ստանալուց հետո ֆերմերը հնարավորություն կունենա դիմելու բանկին կամ վարկային կազմակերպությանը՝ մատչելի տոկոսադրույքով վարկեր ստանալու համար։ Ուզում եմ շեշտել, որ պարտադիր չէ, որ ուսուցում ստացած ցանկացած գյուղացի վարկ ստանա, վարկային, ֆինանսական գնահատական պետք է իրականացվի»,– ասաց Ռոբերտ Մակարյանը։
Հաջորդ ծրագիրը, որ հավանության կարժանանա կառավարությունում հաջորդ ամսվա ընթացքում, ագրովերամշակման ոլորտին մատչելի տոկոսադրույքով վարկերի տրամադրումն է։
«Վերամշակողներին վարկեր կտրամադրվեն 3 տոկոսով, լինելու են կարճաժամկետ (1 տարով) վարկեր, իսկ նպատակն է`գնված հումքի դիմաց անմիջապես գյուղացիներին վճարելը։ Այսօր խնդիր կա, երբ ուշացնում են վճարումը։ Սա նախատեսվում է իրականացնել 18 միլիարդ դրամի սահմանում, որի պիլոտային ծրագիրը կիրականցվի այս տարի խաղողի մթերման, պտուղ–բանջարեղենի ոլորտում»,– ասաց գյուղատնտեսության նախարարի տեղակալը։
Երրորդը ժամանակակից տեխնոլոգիաներով մշակվող ինտենսիվ պտղատու այգիների հիմնման պետական ծրագիրն է։
«Դրա համար կլինի վարկի սուբսիդավորում, բավական մատչելի տոկոսադրույքով վարկեր կտրամադրվեն շահառուներին»,– ասաց Մակարյանը` առայժմ չնշելով, թե կոնկրետ որքան կլինի սուբսիդավորումը։
Այգի հիմնող կազմակերպություններին նա կոչ արեց մինչև օգոստոսի 8–ը դիմել գյուղատնտեսության նախարարության բուսաբուծության վարչություն պայմանները հասկանալու և ցուցակագրում իրականացնելու համար։
