ԵՐԵՎԱՆ, 26 հուլիսի–Sputnik. Ռուսաստանում մեծ է հայկական գյուղմթերքի պահանջարկը։ 2017 թվականի հուլիսի 26–ի դրությամբ ՀՀ–ից արտահանվել է 65 հազար տոննա պտուղ–բանջարեղեն, որից 62 հազարն ուղղվել է ռուսական շուկա։
«Արտահանման հիմնական երկիրը ՌԴ-ն է, այնուհետև Վրաստանը, Արաբական Միացյալ Էմիրությունները, Ուկրաինան և Բելառուսը»,– ասաց Ռոբերտ Մակարյանը։
Ռեբերտ Մակարյանն առանձնակի շեշտեց ծիրանի արտահանումը։ Այս տարի արդեն իսկ 26 հազար տոննա ծիրան է արտահանվել Հայաստանից։ Նման ցուցանիշ վերջին 7 տարիներին չի արձանագրվել։
«Արտահանումը շարունակվում է, քանի որ սառնարաններում ունենք պահեստավորված ծիրան»,– ասաց Մակարյանը։
Նա առանձնացրեց նաև Հայաստանից արտահանվող ելակի ու կարտոֆիլի պահանջարկը։
«2500 տոննա ելակ է արտահանվել, որը 2 անգամ գերազանցում է նախորդ տարվա ծավալը։ Բացի այդ, արտահանվել է 5400 տոննա կարտոֆիլ՝ նախորդ տարվանից 3 անգամ ավելի»,– հայտնեց նախարարի տեղակալը։
Ռոբերտ Մակարյանը խոսեց նաև մթերման գործընթացի մասին։ 2017 թվականի հուլիսի 26–ի դրությամբ Հայաստանի վերամշակող ընկերությունները մթերել են 10500 տոննա պտուղ–բանջարեղեն. 1330 տոննա բանջարեղեն է մթերվել, իսկ մնացածը`միրգ։
«Նախորդ տարվա նույն ժամանակահատվածում վերամշակող կազմակերպությունները մթերել են 7100 տոննա պտուղ–բանջարեղեն, այսինքն` այս տարի շուրջ 67 տոկոսով ավելի պտուղ–բանջարեղեն են մթերել վերամշակող ընկերությունները»,– ասաց Մակարյանը։
Վերջում նա տեղեկացրեց, որ այս տարի կարկտահարության դեպքերը պատճառ հանդիսացան գյուղատնտեսության 1,4 տոկոսով անկմանը։
