ԵՐԵՎԱՆ, 15 հունվարի — Sputnik. Պերմ քաղաքի դպրոցներից մեկի վրա հարձակման հետևանքով տուժածների ցանկում նշված է նաև տասը տարեկան Մենուլա Աբրոյանը։ Ինչպես հայտնում է Mash տելեգրամ ալիքը, ցուցակում են Լեոնիդ Պրյակիկովը (2007 թիվ), Ամիր Տիմիրովը (2006 թիվ), Արսենի Պետրիշինը (2007 թիվ), Իրինա Ուսանինան (2007 թիվ), Եգոր Զելենինը (2006 թիվ), Մենուլա Աբրոյանը (2007 թիվ), Ալեքսանդր Սոլոմեննիկովը (2006 թիվ), Գլեբ Օգնևը (2007 թիվ), Լադա Գոնչարենկոն (2006 թիվ)։
Դեպքը տեղի է ունեցել №127 դպրոցում, որը գտնվում է քաղաքի Մոտովիլիխինսկի շրջանում։
«Երկու անչափահասների միջև (նրանցից մեկը դպրոցի աշակերտն է, մյուսը` դպրոցի նախկին աշակերտը) դանակների կիրառությամբ վիճաբանություն է տեղի ունեցել։ Կտրված վնասվածքներ են ստացել 11 անչափահաս ու մեկ ուսուցիչ», – հայտնում է ՌԻԱ Նովոստին։
Կրտսեր դասարանների աշակերտներին փորձել է պաշտպանել ուսուցչուհի Շագուլինա Նատալյա Վասիլյևնան։ Կինը 4բ դասարանի դասղեկն է։ Նա ևս համար 127 դպրոցի դանակահարության վիրավորների թվում է։
Հայտնում են, որ Պերմի դպրոցում տեղի ունեցած դանակահարության գլխավոր գործող անձը 16–ամյա նախկին աշակերտ Լև Բիջակովն է։
Լևի մոտ փաստաթղթեր չեն եղել, անձը հաստատվել ու գրի է առնվել նրա բանավոր խոսքից։ Ոստիկանությունը ենթադրում է, որ Բիջակով ազգանունը հորինված է։
Դանակահարության կազմակերպիչ Լև Բիջակովը 2015 թվականին մասնակցել է ֆիզիկայի ռուսական օլիմպիադային։ Ուսուցիչները նշել են, որ նա բավականին խելացի է, գրում է Mash–ը։
№127 դպրոցի շենքի մոտ են Պերմի արտակարգ ծառայությունները` ոստիկանությունը, փրկարարներն ու շտապօգնության ութ բրիգադ։ Դանակահարության ընթացքում ընդհանուր առմամբ 743 մարդ է եղել դպրոցում` 698 երեխա ու 45 մեծահասակ։ Տվյալ պահին բոլորը տարհանվել են։
