ԵՐԵՎԱՆ, 27 հոկտեմբերի — Sputnik. Կառավարության նիստում այսօր վարչապետ Կարեն Կարապետյանը հիշեցրեց, որ գերատեսչությունների ղեկավարները պարտավորվել էին անհարկի ծախսերի կրճատումներ կատարել իրենց ոլորտներում, ինչպես նաև լուծարել այն ՊՈԱԿ-ները, որոնց գործունեությունը կհամարվի աննպատակահարմար:
Եվ մինչ նախարարները կորոշեին, թե ինչ կրճատումներ պետք է իրականացնեն իրենց ղեկավարության ներքո գտնվող համակարգերում, վարչապետը գյուղատնտեսության նախարարի հանձնարարեց 1 շաբաթվա ընթացքում ներկայացնել ՀՀ ԳՆ գյուղատնտեսական տեխնիկայի պետական տեսչությունը լուծարելու մասին փաթեթը:
Վարչապետի այս հանձնարարականն անակնկալի բերեց գյուղատնտեսության նախարար Իգնատի Առաքելյանին, և նա խոստովանեց, որ այդ մասին առաջին անգամ է լսում:
Նախարարին պարզաբանում ներկայացրեց կառավարության աշխատակազմի ղեկավար նախարար Դավիթ Հարությունյանը:
«Մեզ մոտ բավական երկար ժամանակ գործում է տեսչական բարեփոխումների խումբ, որն ուսումնասիրում է բոլոր տեսությունների գործառույթները: Մի շարք գործառույթներ ընդհանրապես հնացած են, երկրին օգուտ չեն տալիս, բիզնեսին օգուտ չեն տալիս, դրանք վերացվում են: Իսկ այն գործառույթները, որոնք անհրաժեշտ են, միավորվում են: Տվյալ դեպքում, եթե խոսքը վերաբերում է պետհամարանիշները և այդ ավտոմեքենաները վարելու իրավունքները տրամադրելուն, ապա դա կարող է անել ոստիկանությունը»,- ասաց նա՝ հավելելով, որ տեսչության այդ գործառույթը կփոխանցվի ոստիկանությանը, մյուսները՝ կվերացվեն:
