ԵՐԵՎԱՆ, 11 հունիսի-Sputnik. Հայկական կողմն անտեղի է համարում Ռուսաստանում Ադրբեջանի դեսպան Փոլադ Բյուլբյուլօղլու հայտարարությունը, առավել ևս ղարաբաղյան հակամարտության խաղաղ կարգավորման շուրջ բանակցություններ սկսելու մոսկովյան առաջարկի ֆոնին: Այս մասին նշված է rusarminfo.ru կայքում:
Ավելի վաղ Բյուլբյուլօղլին ԱՊԱ գործակալությանը տված հարցազրույցում ասել էր, որ եթե «ղարաբաղյան հակամարտության սկզբնական պատճառը չվերացվի, չդադարի Ադրբեջանի դեմ ագրեսիան և Հայաստանի զորքերը չլքեն մեր երկրի տարածքը, ապա ոչ ոք չի կարող որևէ երաշխիք տալ»:
«Ադրբեջանի դեսպանը վերջին շրջանի բոլոր հարցազրույցներում և հայտարարություններում ամեն կերպ փորձում է մոռացության մատնել սեփական խոսքերը, որոնք ասել էր ղարաբաղյան հակամարտության գոտում լայնածավալ ռազմական գործողություններ սկսելուց մի քանի ժամ անց, այն է՝ հենց Ադրբեջանն է ռազմական արկածախնդրություն նախաձեռնել: Իսկ նրա հետագա պնդումները նախատեսված են իր անտեղյակ հայրենակիցների համար»,- ասվում է դեսպանատան մեկնաբանությունում:
Նշվում է նաև, որ ՄԱԿ-ի Անվտանգության խորհրդի հայտնի բանաձևին ադրբեջանական մեկնաբանությամբ հղում անելն ու ԵԱՀԿ Մինսկի խմբի շրջանակում հակամարտության կարգավորման միջազգային-իրավական հիմնական սկզբունքների առանձին դրույթների շուրջ ընտրողական մեկնաբանությունները «փաստաթղթերի գիտակցված խեղաթյուրում են»:
«Ինչ վերաբերում է խնդրի հնարավոր ռազմական լուծմանը, ապա կցանկանայինք նշել, որ ուժային տարբերակի անհնարինության մեջ համոզվելու համար բավական ժամանակ է անցել այն պահից, երբ Ադրբեջանը դիմել էր Ռուսաստանին, որպեսզի նա միջնորդ դառնա ղարաբաղյան հակամարտության գոտում հրադադար կնքելու հարցում: Եթե ինչ-որ մեկը հույս է ունեցել, ապա դա այս տարվա ապրիլին ձախողվել է: Ուստի տրամաբանական չէ Ռուսաստանում նման հռետորությամբ հանդես գալը, առավել ևս, որ Ռուսաստանը հերթական անգամ նախաձեռնություն է դրսևորում հակամարտության խաղաղ կարգավորումը շարունակելու համար»,- ասվում է Ռուսաստանում Հայաստանի դեսպանատան մեկնաբանությունում:
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
