ԵՐԵՎԱՆ, 26 հունիսի – Sputnik. Ստրասբուրգի իրավապահ մարմինները կողոպուտի և այլ հանցագործությունների կասկածանքով տասնյակից ավելի մարդկանց են ձերբակալել։ ՏԱՍՍ–ի փոխանցմամբ` նրանք հայ-վրացական հանցավոր խմբավորման անդամ են։
Նշվում է, որ 12 մարդ է ձերբակալվել, որոնցից 10-ը ժամանակավոր բանտարկվել են։ Խմբավորումը, որին տեղի ոստիկանությունը «մաֆիոզ» է անվանում, գողությամբ և կողոպուտով էր զբաղվում։ Ոստիկանությունը հայտարարել է, որ գործ ունեն միջազգային հանցավոր կազմակերպության էլզասյան բաժնի հետ, որը մասնագիտացած է տարբեր տեսակի գողությունների վրա` մասնավորապես տների կողոպուտի և խանութներից գողության։
Էլզասի ոստիկանությունն այժմ կալանքի օրդերներ է տարածել բանդայի թաքնված մասնակիցների նկատմամբ։ Ձերբակալվածների բնակության վայրում իրականացրած խուզարկությունների արդյունքում հայտնաբերվել է մեկ մոտոցիկլետ, հրազենի 5 միավոր, ավելի քան 350 փամփուշտ, ոգելից խմիչքի 66 շիշ, սննդամթերք, հեղինակավոր ապրանքանիշների օծանելիքի ավելի քան 100 սրվակ, տարատեսակ կոսմետիկա։ Հայտնաբերվել է նաև ավելի քան 17 հազար եվրո։
Գերմանիայում դանակով զինված հարձակում է տեղի ունեցել. 3 մարդ զոհվել է, 6՝ վիրավորվել
Ոստիկանությունն ու դատական մարմինները խմբավորման գործողությունների նկատմամբ քննություն էին իրականացնում 2019 թվականից։ Այն սկսվել էր ֆրանսիական Մեծ Արևելքի շրջանում ավելի քան երկու հարյուր տուն կողոպտած երկու վրացիներին ձերբակալելուց հետո։ Քննությունն ընթանում էր հանցավոր խմբավորում ստեղծելու, նման խմբավորման կազմում գողություն կատարելու, փողերի լվացման, հանցավոր գործողությունների կասկածանքով։
