ԵՐԵՎԱՆ, 9 մարտի - Sputnik. Ամերիկահայ հեռուստաաստղ Քիմ Քարդաշյանը իր Instagram-ի Stories բաժնում հրապարակել է ավագ քրոջ` Քորթնի Քարդաշյանի հետ երկու լուսանկար։ Առաջինում նրանք դպրոցահասակ են, հագած նույնանման սև ու սպիտակ կոստյումից։ Երկրորդ նկարն արդեն մեր օրերից է, այստեղ նրանք նույն դիրքով են կանգնած ու միանման դասական կոստյումներով են։
«Երկվորյակների պես», – մակագրված է լուսանկարը։
Երկրորդ լուսանկարն արվել է 2019-ին, երբ հայտնի քույրերը իրենց 7 երեխաների հետ այցելել էին Հայաստան։ Այդ իսկ պատճառով նաև լուսանկարում հայկական դրոշի էմոջի է դրված։
2019-ին Քիմը մասնակցել էր WCIT–2019 ՏՏ համաշխարհային կոնգրեսին, ինչպես նաև նկարահանումներ էր անցկացրել Գառնիի տաճարում, մկրտվել Էջմիածնի Մայր տաճարում։ 2019-ի հոկտեմբերի 7-ին Էջմիածի Մայր Աթոռ եկեղեցու մկրտարանում մկրտվել են Քիմը, նրա երեք երեխաները՝ Սեյնթը, Չիկագոն, Փսալմը, Քիմի քույր Քորթնին, Քորթնիի երեք երեխաները՝ Մեյսոնը, Պենելոպեն և Ռեյնը։ Քիմն իր ավագ դստերը` Նորթ Ուեսթին, մկրտել էր 2015-ին Երուսաղեմի Սբ Հակոբյանց հայկական եկեղեցում։ Այդ ժամանակ էլ Ցեղասպանության 100-րդ տարելիցի կապակցությամբ Քիմը ամուսնու` Քանյե Ուեսթի և քրոջ` Քլոե Քարդաշյանի հետ եկել էր Հայաստան, ապա մկրտության համար մեկնել Իսրայել։
Քիմի, Քորթնիի, Քլոեյի հայրը փաստաբան Ռոբերտ Քարդաշյանն է, որը մահացել է 2003 թվականին՝ 59 տարեկան հասակում։ Նա հայտնի էր դարձել ամերիկյան ֆուտբոլիստ Օ. Ջեյ Սիմփսոնի գործը հաղթելով։ Դատարանը չկարողացավ ապացուցել, որ Սիմփսոնը սպանել է իր կնոջը և նրա սիրեկանին։
