Բադասյանը ՄԱԿ-ի Հանցավորության կանխարգելման կոնգրեսին ներկայացրել է գերիների խնդիրը
(Թարմացված է 16:34 07.03.2021)
Բադասյանը միջազգային հանրությանը կոչ է արել միանալ Հայաստանի ջանքերին՝ տարածաշրջանում առկա սպառնալիքին դիմակայելու ու մեղավորներին պատասխանատվության ենթարկելու համար։ԵՐԵՎԱՆ, 7 մարտի — Sputnik. ՀՀ արդարադատության նախարար Ռուստամ Բադասյանը մարտի 5-ից 11-ը Ճապոնիայի Կիոտո մասնակցում է ՄԱԿ-ի Հանցավորության կանխարգելման և քրեական արդարադատության 14-րդ կոնգրեսին (UNODC)։ Տեղեկությունը հայտնում է Արդարադատության նախարարության մամուլի ծառայությունը։
Ելույթ ունենալով կոնգրեսին` Հայաստանի արդարադատության նախարարը հատուկ անդրադարձ է կատարել 2020 թվականի սեպտեմբերին ԼՂ հակամարտության գոտում թուրք-ադրբեջանական ագրեսիային։ Տեղեկացվում է, որ Բադասյանը մասնավորապես խոսել է ռազմական, մարդկության դեմ իրականացված հանցագործությունների, ինչպես նաև Ադրբեջանի կողմից Ժնևի «Ռազմագերիների հետ վարվելակերպի մասին» կոնվենցիան կոպտորեն խախտելու փորձերի մասին՝ հայ ռազմագերիներին և այլ գերիներին, այդ թվում` կանանց, վերադարձնելուց հրաժարվելուն։
©
Sputnik / Asatur Yesayants
Նախարար Բադասյանը հատուկ անդրադարձել է նաև ատելության խոսքի հիմնախնդիրներին և նշել, որ այս հարցը արդիական է Հայաստանի համար, քանի որ իր էթնիկ, կրոնական և մշակութային ինքնության հանդեպ անհանդուրժողականության պատճառով ողջ պատմության ընթացքում հայ ժողովուրդը խտրականության, հետապնդումների, ատելության հիմքով հանցագործությունների և ցեղասպանության զոհ է դարձել: «Այս համատեքստում Հայաստանի պատվիրակությունը նախաձեռնել է Կիոտոյի հռչակագրում ներառել ատելության հանցագործության վերաբերյալ առանձին պարբերություն»,- նշել է Ռուստամ Բադասյանը՝ ընդգծելով, որ ատելության և ինքնության հատկանիշների վրա հիմնված հանցագործությունները առաջին քայլն են, որոնք կարող են հանգեցնել մարդկության դեմ ուղղված լուրջ հանցագործությունների, ներառյալ՝ ռազմական հանցագործությունների և էթնիկ զտումների:
Զախարովան խորհուրդ է տվել գերիների թվի հարցով դիմել ոչ թե իրեն, այլ Երևանին և Բաքվին
Բադասյանը շեշտել է, որ տասնամյակներ շարունակ խթանված Ադրբեջանի հակահայ քաղաքականությունն իր առավել անմարդկային արտահայտությունն է գտել Արցախի ժողովրդի դեմ վերջին ագրեսիայի ընթացքում, որն ուղեկցվել է ռազմական և մարդկության դեմ հանցագործություններով: Նման հանցագործությունների ամենանշանավոր օրինակներից են, երբ քաղաքացիական բնակչության դեմ օգտագործվեց կասետային զինամթերք, թիրախավորվեց և ոչնչացվեց հայկական մշակութային ժառանգությունը, օգտագործվեց արգելված ֆոսֆորային զինամթերք՝ այդ թվում նաև անտառներում ապաստանած, բռնի տեղահանված բնակչության դեմ՝ պատճառելով հսկայական վնաս ինչպես մարդկությանը, այնպես էլ շրջակա միջավայրին»,- ասել է Ռուստամ Բադասյանը։
Նա նշել է, որ Թուրքիայի կողմից օտարերկրյա ահաբեկիչների հավաքագրումը և նրանց հետագա տեղակայումը Ադրբեջանի զինված ուժերի շարքերում՝ Արցախի դեմ ծավալած ռազմական գործողությունների համար, Ադրբեջանի և Թուրքիայի կողմից կատարված հերթական ծանր հանցագործությունն է՝ միջազգային բոլոր նորմերի կոպիտ խախտմամբ: «Համապատասխան աղբյուրներից ստացված բազմաթիվ ապացույցները վկայում են, որ Թուրքիան և Ադրբեջանը աջակցում և նպաստում են մեր տարածաշրջանում ահաբեկչական սպառնալիքի ավելացմանը և տարածմանը: Հետևաբար, կարծում ենք, որ միջազգային հանրությունը պետք է միանա ջանքերին՝ այս սպառնալիքին դիմակայելու և այս հանցագործության կողմնակիցներին ու մեղավորներին պատասխանատվության ենթարկելու համար»,- հայտարարել է Ռուստամ Բադասյանը և այդ համատեքստում ողջունել Կիոտոյի հռչակագրի՝ ահաբեկչության հանցագործությանն անդրադառնալու փաստը։
Նա միջազգային հանրությանը կոչ է արել միանալ Հայաստանի ջանքերին՝ տարածաշրջանում առկա սպառնալիքին դիմակայելու և այս հանցագործության կողմնակիցներին ու մեղավորներին պատասխանատվության ենթարկելու համար։
Ռուսաստանի նախագահ Վլադիմիր Պուտինը պատվաստվել է COVID-19-ի դեմ
(Թարմացված է 23:19 23.03.2021)
Նախագահի աշխատակազմից չեն ասել, թե հատկապես որ դեղամիջոցից է օգտվել Պուտինը, բայց ընդգծել են, որ խոսքը ռուսական երեք պատվաստանյութերից մեկի մասին է:ԵՐԵՎԱՆ, 23 մարտի — Sputnik. Ռուսաստանի Դաշնության նախագահ Վլադիմիր Պուտինը պատվաստվել է COVID-19-ի դեմ: Տեղեկությունը ՌԻԱ Նովոստիին հայտնել է ՌԴ նախագահի մամուլի քարտուղար Դմիտրի Պեսկովը։
©
Sputnik / Aram Nersesyan
«Պատվաստումից հետո Պուտինն իրեն լավ է զգում, վաղը նա լիարժեք աշխատանքային օր է ունենալու»,- հայտնել է Պեսկովը:
ՌԴ նախագահը շաբաթներ առաջ հայտարարել էր, որ պատրաստվում է պատվաստվել։
Պեսկովը հայտնել է, որ Կրեմլը չի տարածի պատվաստման բուն ընթացակարգի լուսանկարերն և տեսանյութերը: Նա նշել է, որ Պուտինն արդեն շատ բան է անում ռուսական պատվաստանյութերի առաջխաղացման համար։ Նախագահի աշխատակազմից չեն ասել, թե հատկապես որ դեղամիջոցից է օգտվել Պուտինը, բայց ընդգծել են, որ խոսքը ռուսական երեք պատվաստանյութերից մեկի մասին է:
Բուժկենտրոնների քանի աշխատակից է Հայաստանում վարակվել Covid-19-ով. վիճակագրություն
Նշենք, որ ՌԴ–ն արտադրում է երեք պատվաստանյութ` Սպուտնիկ Վ, ԷպիՎակԿորոնա և ԿովիՎակ։
թեգերը:
Ադրբեջանը պետք է պատասխան տա հայ ռազմագերիներին տանջելու համար. Ադամ Շիֆ
(Թարմացված է 23:16 23.03.2021)
ԱՄՆ կոնգրեսական Ադամ Շիֆը անդրադարձել է Human Rights Watch-ի՝ հայ ռազմագերիների մասին վերջին զեկույցին:ԵՐԵՎԱՆ, 23 մարտի — Sputnik. Հայ ռազմագերիներին կտտանքների ենթարկելը միջազգային իրավունքի կոպտագույն խախտում է։ Facebook-ում ԱՄՆ կոնգրեսական Ադամ Շիֆն անդրադարձել է հայ ռազմագերիների խնդրին։
««Human Rights Watch»-ի հրապարակած վերջին զեկույցը հաստատում է այն, ինչից շատերս վախենում էինք: Ադրբեջանի զինված ուժերը բռնությունների են ենթարկել հայ ռազմագերիներին ու պահվող քաղաքացիական անձանց: Մոտավորապես 200 ռազմագերի անօրինական կերպով դեռևս պահվում են Ադրբեջանում, կա հետագա բռնությունների ռիսկ: Հայ ռազմագերիներին կտտանքների ենթարկելը միջազգային իրավունքի և Ժնևյան կոնվենցիայի կոպտագույն խախտում է, և բոլոր մեղավորները պետք է պատասխանատվության ենթարկվեն»,- գրել է Ադամ Շիֆը:
©
Sputnik / Asatur Yesayants
Կոնգրեսականը հիշեցրել է, որ անցյալ շաբաթ ներկայացրել է բանաձև, որով կոչ է արել անհապաղ ազատ արձակել հայ ռազմագերիներին ու պահվող քաղաքացիական անձանց:
«Ես նաև կոչ եմ արել ԱՄՆ պետքարտուղարությանն ակտիվացնել ԵԱՀԿ Մինսկի խմբի գործընթացը և պարտավորեցնել Ադրբեջանի իշխանություններին, որպեսզի նրանք հայտարարեն նոյեմբերի 9-ի հայտարարությանը հավատարիմ մնալու կարևորությունը»,- գրել է կոնգրեսմենը:
Շիֆը նաև հավելել է, որ գործընթացի ամեն վայրկյան ձգձգումն ավելացնում է Ադրբեջանի զինված ուժերի կողմից հայ ռազմագերիների տառապանքը:
«Վճռական գործողությունների ժամանակը հիմա է», – ավարտել է իր գրառումը կոնգրեսականը։
«Ժամանակ չունենք». Զոհրաբյանը կոչ է անում գերիների վերադարձի խնդրի շուրջ համախմբել ջանքերը
Ինչպես արդեն տեղեկացրել ենք, «The Human Rights Watch»-ը փաստագրել է հայ ռազմագերիների նկատմամբ իրականացված լայնածավալ պատերազմական հանցագործությունները և ներկայացրել զեկույցում։
Ինչպես նշված է «The Human Rights Watch»-ի զեկույցում, Ադրբեջանի կողմից միջազգային մարդասիրական իրավունքի խախտումներն իրականացվել են ռազմագերիների և քաղաքացիական պատանդների գերեվարության ողջ ընթացքում՝ ուղեկցվելով դաժան ու նվաստացուցիչ վերաբերմունքով և խոշտանգումներով։
Թշնամուն գրկի մեջ խեղդելու արվեստը․ ի՞նչ խաղ են խաղում Ռուսաստանն ու Թուրքիան
(Թարմացված է 23:46 23.03.2021)
Արցախի վրա զինված հարձակման առաջին իսկ օրից Ադրբեջանում ծածանվում էին Թուրքիայի, Պակիստանի և Իսրայելի դրոշները՝ որպես աջակիցների խորհրդանիշ, մինչդեռ նրանց ԶԼՄ–ները հայտարարում էին, թե Հայաստանի միակ դաշնակիցը Ռուսաստանն է։ Բաքվի փողոցներում նույնիսկ այրեցին ՌԴ դրոշը։ Ամենաթեժ օրերին Ռուսաստանի նախագահը մի քանի անգամ հայտարարեց, թե ահաբեկչական խմբավորումներ են բերվել Արցախ, ինչը անթույլատրելի է։ Վլադիմիր Պուտինի այդ հայտարարություններից հետո հայ հանրության շրջանում արթնացավ հույս, թե ռուսական զորքը կմտնի Արցախ՝ պայքարելու միջազգային ահաբեկչության դեմ՝ պաշտպանելով նաև արցախահայությանը ադրբեջանաթուրքական հարձակումից։
©
Photo : official site of the MoD of RA
Ռուսները Արցախ մտան նոյեմբերի 10-ին՝ խաղաղապահների տեսքով։ Մոտ 2000 ռուսական համազգեստով զինվորական ստանձնել է նոր բախումները կանխելու, խաղաղ բնակիչներին պաշտպանելու առաքելություն՝ կանգնելով հայկական և ադրբեջանական զինված ուժերի մեջտեղում։ Պաշտոնական Ստեփանակերտը սա անվանում է նաև թուրքական ախորժակի զսպման միջոց։
«Այստեղ մենք տեսնում ենք ՌԴ-ի ու Թուրքիայի տարբեր նպատակներ ու մոտեցումներ։ Թուրքիան ունի հեռու գնացող պանթուրքիստական ծրագրեր, մինչդեռ ՌԴ-ն պարտավոր է կանխել դրանք, հակառակ դեպքում այդ ծրագրերը անկանխատեսելի հետևանքներ կունենան նաև Ռուսաստանի համար։ Պանթուրքիզմը եթե իրականանա, առաջին հերթին թիրախը հենց ՌԴ-ն է»,-մեզ հետ զրույցում ասաց Արցախի ԱԳ նախարար Դավիթ Բաբայանը։
Թուրքագետ և ռազմական վերլուծաբան Կարեն Հովհաննիսյանը մատնանշեց պանթուրքիստական ծրագրերում Ռուսաստանի դեմ լարված թակարդները՝ շեշտելով, թե ռուսական գործոնը մեր տարածաշրջանում ուժեղանում է առաջին հերթին հենց իրենց անվտանգային համակարգի համար։
«Մկանախաղ» կռվից հետո․ ՀՀ-ն ու Ադրբեջանը միաժամանակյա զորավարժություններ են անցկացնում
«Վստահորեն կարելի է ասել, որ Ռուսաստանը երբեք ձեռք չի քաշի Հարավային Կովկասից, քանի որ այդ դեպքում ամբողջ Հյուսիսային Կովկասը՝ Դաղստանը և մյուս շրջանները շատ արագ կանցնեն Թուրքիայի հսկողության տակ»։
Որպեսզի ավելի լավ պատկերացնենք, թե ինչ է պանթուրքիզմը և ինչ վտանգ է սպառնում Ռուսաստանի համար, նայենք քարտեզին ու աչքերով սահուն ճանապարհ անցնենք ժամանակակից Թուրքիայից մինչև Իրան ու Ադրբեջան, հետո Կասպից ծովի ափով դեպի հյուսիս-արևելք՝ մինչև Ղազախստան, Ուզբեկստան, Թուրքմենստան, Ղրղզստան և վերջապես՝ Չինաստանի արևմտյան շրջաններ՝ Ալթայ, որը համարվում է թյուրքական ժողովուրդների նախահայրենիքը։ Սա ընդգրկում է առնվազն 8 պետություն, որոնց ցամաքային միավորմանը խանգարում է երկու երկիր՝ Հայաստանը և Ռուսաստանը։
Չեչնիայի, Դաղստանի և Հյուսիսային Կովկասի տարածաշրջանի մյուս ժողովուրդները հիմնականում մահմեդական են և վաղուց թուրքական ազդեցության տակ են։ Միակ սեպը, որ համառորեն խրված է թյուրքական աշխարհաքաղաքական ծրագրերի մեջտեղում, Հայաստանն է։ Եթե վերանա հայկական գործոնը, մեկը մյուսի հետևից՝ դոմինոյի քարերի նման կընկնեն ոչ միայն ՌԴ հարավի ինքնավար հանրապետությունները, այլև Թուրքիան անթաքույց ոտնձգություններ կանի Ղրիմի և Սև ծովի հյուսիսային ափերի բնակավայրերի նկատմամբ։ Չմոռանանք, որ դեռևս 20-րդ դարասկզբին թուրքական իշխանությունը որոշել էր Սև ծովը դարձնել իր համար ներքին ծով, ինչին խանգարեց Խորհրդային Միության ձևավորումը։ Հիմա չկա Խորհրդային Միությունը, փոխարենը կա ռուս-ամերիկյան դիմակայություն, և Թուրքիան նորից փորձում է տիրանալ Ռուսաստանի հարավին։
©
Photo : press office of the MD of Azerbaijan
Մոսկվայում նստած պաշտոնյաները, բնականաբար, սա լավ են հասկանում՝ Թուրքիայի նկատմամբ կիրառելով բլիթի ու մտրակի քաղաքականություն։ Մի կողմից ռուսները խորացնում են տնտեսական ու ռազմական համագործակցությունը, պայմաններ են ստեղծում, որ Թուրքիայի կախվածությունն իրենցից ավելի շատ լինի, մյուս կողմից Թուրքիայի դիմաց կանգնեցնում են ռուսական դրոշ ու արգելում ագրեսիա կիրառել Հայաստանի Հանրապետության նկատմամբ։
«Ահաբեկիչների հետ մեկտեղ Թուրքիան շատ ակտիվ դերակատարություն ու ապակայունացնող դերակատարություն ունի Մերձավոր Արևելքում։ Նրա շահերը բախվում են Իրանի, ԱՄՆ-ի, Չինաստանի, Ռուսաստանի շահերին։ Այս առումով հայ-ռուսական դաշնակցային հարաբերությունները ունակ են և պարտավոր են դիմակայել թուրքական սադրանքներին»,-ասաց Արցախի ԱԳ նախարարը, մինչդեռ Ադրբեջանի նախագահ Ալիևը մարտի սկզբին դժգոհեց, թե հենց ռուսական կողմն է աչք փակում Արցախ մուտք գործող անձանց ու մեքենաների ծագման վրա։
«Երբ հիմա անհասկանալի գործընթացներ են լինում Լեռնային Ղարաբաղ օտարերկրացիների գաղտնի մուտքի առումով, մենք սկսում են չհասկանալ խաղաղապահների գործողությունները։ Մենք ռուսական կողմի հետ պայմանավորվել էինք, որ օտարերկրացիները կարող են այնտեղ հասնել միայն մեր թույլտվությամբ, իսկ պայմանավորվածությունը խախտվում է»,-նշել է Ալիևը։
Ո՞վ է իրականում խախտում պայմանավորվածությունները։
Նոյեմբերի 9-ի եռակողմ փաստաթղթով Ադրբեջանում կամ Արցախում թուրքական զորք չպետք է լիներ, մինչդեռ 2021-ի հունվարին Արցախի Հանրապետության սահմանից 11կմ հեռու՝ Աղդամ քաղաքի մոտակայքում բացվեց թուրքերի հիմնած դիտորդական կենտրոն՝ ռուս զինվորականների խորհրդանշական ներկայությամբ։ Պաշտոնական ձևակերպումներով դա պետք է ունենա տվյալներ հավաքելու և Արցախի կայունությունը վերահսկելու նպատակ, մինչդեռ դժգոհություն արտահայտող իր հայտարարություններով Ադրբեջանը արդեն պատրաստվում է 5 տարի անց խաղաղապահների ռուսական դրոշը փոխարինելու թուրքականով, մանավանդ որ թուրքական բազան արդեն կա հենց Արցախի քթի տակ։
«Շատ բարդ գործողություն է». Շոյգուն` Ղարաբաղի հարցով Թուրքիայի հետ գործակցելու մասին
Մարտի 10-ին Սիրիայի տարածքում թուրքական 20 «Բայրաքթար» անօդաչու սարքեր հարձակվել են ռուսական «Պանցիր» զենիթահրթիռային-հրանոթային համալիրի վրա՝ փորձելով ոչնչացնել այն։ Ռուսական զենքը փոքր-ինչ վնասվել է, ինչը արագ շտկել են ռուս զինվորականները՝ արդեն մարտի 14-ին հայտարարելով, թե իրենց զինանոցում կա գերբարձր հաճախականության թնդանոթ, որը ունակ է խոցել թուրքական դրոնները մինչև 20 կմ հեռավորության վրա։
Ադրբեջանը մարտի 15-ին հայտարարեց զորավարժություն սկսելու մասին՝ շեշտելով, որ այն պետք է լինի ՀՀ և Արցախի սահմանին՝ փորձարկելով լեռնային տեղանքում իրենց զորքի կարողությունները։ Սիրիական վերլուծական շրջանակները զգուշացնում են, որ Քարվաճառի մի հատվածում զորք կուտակելով՝ Թուրքիան իր հերթին նրանց հետ այնտեղ է տարել թուրքոման ահաբեկիչների, որոնց համար ամենամեծ թշնամին ռուս զինվորն է։ 2015-ի աշնանը հենց թուրքոմանները Սիրիայի հյուսիսում սպանեցին ռուս օդաչուներին։ Թուրքոման ահաբեկիչներին տեղավորելով Քարվաճառի լեռներում ու թիրախ դարձնելով ռուս խաղաղապահներին՝ Թուրքիան մյուս կողմից մեծ քանակությամբ հարվածային դրոններ է մատակարարում Ուկրաինային՝ Ղրիմի ու Դոնեցկի վրա հարձակվելու համար։
Ռուս–թուրքական լարվածությունը կարող է հանգեցնել ռազմական բախման. փորձագետ
Ռուսաստանը մարտի 20-ին Ղրիմում լայնամասշտաբ զորավարժություն անցկացրեց՝ բեմադրելով ռազմական օդանավակայանի գրավման սցենար։ Տանկերն ու հետևակի մարտական մեքենաները թռչող օդանավից իջնում են պարաշյուտով, իսկ գետնի վրա արագ գործի են անցնում ու մտնում հակառակորդի տարածք։ Վերլուծաբանները սա համարում են յուրատեսակ պատասխան Արցախի Վարանդայում (Ֆիզուլի) ու Քաշաթաղում (Լաչին) ռազմական օդանավակայաններ կառուցող ադրբեջանաթուրքական քայլերին։