Պատվաստում

Ո՞ր պատվաստանյութով արժե պատվաստվել․ 5 գլխավոր միֆերը

126
Ինչպիսի՞ պատվաստանյութ պետք է ընտրեն թույլ դիմադրողականություն ունեցող մարդիկ, ինչո՞ւ են կորոնավիրուսի դեմ բոլոր պատվաստանյութերը բաղկացած երկու բաղադրիչից, և պատվաստումից հետո որքա՞ն ժամանակ են պահպանվում հակամարմինները: Հարցերի պատասխանները՝ Sputnik-ի հոդվածում։

Դանարա Կուրմանովա, Sputnik

Դեռ մեկ տարի առաջ Առողջապահության համաշխարհային կազմակերպությունը (ԱՀԿ) կորոնավիրուսի բռնկումը ճանաչել էր միջազգային մասշտաբի արտակարգ իրավիճակ։ COVID-19 պատվաստանյութերի գրանցումը թույլատրվեց արտակարգ կարգով։

Ո՞ր պատվաստանյութով պետք է պատվաստվեն տարեցները, որո՞վ՝ ալերգիկները։ Արդյոք ճի՞շտ է, որ ցանկացած պատվաստանյութ կարող է վտանգավոր լինել։ Sputnik-ն այս բոլոր հարցերը տվել է միջազգային գիտնական-վարակաբաններին։

Միֆ 1․ Հակամարմինները մնում են ընդամենը 3-4 ամի՞ս

Ինչի՞ համար պատվաստվել, եթե պատվաստանյութը, միևնույնն է, երկար չի ազդում։ Պատվաստվելուց հրաժարվելն այդպես են բացատրում COVID-դիսիդենտները և որպես փաստարկ ներկայացնում «3-4 ամիս» ցուցանիշը։ Իբր հենց այդքան ժամանակ են մարդկային օրգանիզմում պահպանվում պատվաստումից հետո առաջացող հակամարմինները։ Միայն թե մի «բայց» կա․ այդ թիվը հաստատված չէ ոչնչով, բացի սոցցանցային անանուն հրապարակումներից։

«Որտեղի՞ց է այդ թիվը հայտնվել։ Համացանցի՞ց։ Դե, համացանցը երևի ավելի լավ գիտի, քան վարակաբանները,- Sputnik-ին ասաց Գամալեայի անվան համաճարակաբանության և մանրէաբանության ազգային հետազոտական կենտրոնի պրոֆեսոր Անատոլի Ալտշտեյնը,-իրականում կորոնավիրուսի դեմ ցանկացած պատվաստանյութ նոր է, այնպես որ ոչ ոք ձեզ հստակ թիվ չի ասի, բայց դա 3-4 ամիս չէ։ Պատվաստումից հետո կանխատեսվող դիմադրողականությունը մեկ տարի է։ Հնարավոր է, որ այն ավելի երկար մնա, բայց դա ժամանակը ցույց կտա։

Հայաստանը հավանություն է տվել կորոնավիրուսի դեմ 3 պատվաստանյութի ձեռքբերմանը. նախարար

Մինչդեռ հունվարի վերջին հայտնի դարձավ, որ Գամալեայի անվան կենտրոնի՝ «Սպուտնիկ V»-ով պատվաստված աշխատակիցների մոտ դիմադրողականությունն արդեն 9 ամիս պահպանվում է։

Միֆ 2․ Պատվաստումը կարո՞ղ է վտանգավոր լինել

Պատվաստումը ոչ բոլորին է ցուցված։ Ռուսաստանում կորոնավիրուսի դեմ պատվաստման մշակման մշտական հակացուցումներ կան․ դա ճառագայթային թերապիան է, հղիությունը, կրծքով կերակրման շրջանը կամ ալերգիկ ծանր ռեակցիաները։

Սակայն այդ սահմանափակումները պայմանավորված չեն այն հանգամանքով, որ COVID-19-ի դեմ պատվաստանյութերը վերջերս են ստեղծվել։ Բացարձակապես բոլոր գոյություն ունեցող պատվաստանյութերը ուղեցույցներ և նախազգուշացումներ ունեն առողջական խնդիրներ ունեցող մարդկանց համար։ Օրինակ՝ ուռուցքային հիվանդություններով մարդկանց մոտ հաճախ նվազած է լինում իմունային ֆունկցիան, ուստի այդ դեպքում պատվաստանյութը կարող է պակաս արդյունավետ լինել։ Միաժամանակ ուռուցքային հիվանդություն ունեցողներին արգելված չէ պատվաստում անցնել, բայց նախքան պատվաստման մասին որոշում ընդունելը անպայման պետք է խորհրդակցեն բժշկի հետ։

Անատոլի Ալտշտեյնի խոսքով` զանգվածային շրջանառության մեջ մտնելուց առաջ պատվաստանյութը բազմաթիվ փորձարկումներ է անցնում, ուստի այն չի կարող վտանգավոր լինել։

«Ինչպես ցույց է տալիս կորոնավիրուսի մահացության վիճակագրությունը, հիվանդանալը հատկապես վտանգավոր է որոշ մարդկանց համար։ Երբ անցկացվում էին «Սպուտնիկ V» պատվաստանյութի միջանկյալ փորձարկումները, քննադատություն էր հնչում, որ հետազոտություններն անցկացվել են 20 հազար մարդու վրա, իսկ մյուս ընկերություններն անցկացրել են 40 հազար մարդու վրա։ Բայց 20 հազարը նույնպես մեծ թիվ է, և հետո նրանց հետ ամեն ինչ կարգին է. ողջ են և առողջ։ Երբ խոսքը այդ թվով մարդկանց մասին է, ինչ-որ բացասական երևույթներ թաքցնել հնարավոր չէր լինի»,-բացատրում է նա։

Ի դեպ, հեղինակավոր «The Lancet» բժշկական ամսագիրը, որը Մեծ Բրիտանիայում հրատարակվում է 1823 թվականից, արդեն հրապարակել է «Սպուտնիկ V» պատվաստանյութի միջազգային փորձագիտական գնահատականը։ Ըստ փորձաքննության` կլինիկական հետազոտությունների երրորդ փուլը պատվաստանյութի 91,6% արդյունավետություն է ցույց տվել:

Միֆ 3․ Եթե պատվաստանյութը ներարկվում երկու փուլով, նշանակում է, որ այն «ծանր» է

Կորոնավիրուսի դեմ պատվաստանյութը հաճախ համեմատում են գրիպի պատվաստանյութի հետ, բայց, ըստ Ալտշտեյնի, դա ճիշտ չէ։

«Մարդկանց մոտ գրիպի նկատմամբ արդեն վաղուց է որոշակի իմունիտետ ձևավորվել, և դրա դեմ սովորաբար պատվաստվում են ամեն տարի», - ասում է նա:

Մարդու օրգանիզմի համար նոր տեսակի կորոնավիրուսը նոր երևույթ է, դրա նկատմամբ իմունիտետ դեռ չի ձևավորվել, և պատվաստումներ նախկինում չեն արվել: Այդ պատճառով էլ գոյություն ունեցող բոլոր պատվաստանյութերը ներարկվում են երկու փուլով, որպեսզի կայուն դիմադրողականություն ձևավորվի։

Հրապարակվել են «Սպուտնիկ V» պատվաստանյութի հետազոտությունների երրորդ փուլի արդյունքները

Հենց երկու բաղադրիչներն են ապահովում պատվաստանյութերի արդյունավետության բարձր մակարդակը․ այսպես` ռուսական «ԷպիՎակԿորոնայի» կլինիկական փորձարկումները ցույց են տալիս հարյուրտոկոսանոց արդյունավետություն, իսկ չինական «SinoPharm» պատվաստանյութը հաստատել է գրեթե 80% արդյունավետություն: Համեմատության համար նշենք, որ գրիպի պատվաստանյութը բաղկացած է մեկ բաղադրիչից, բայց օրգանիզմը պաշտպանում է միջինը 60%-ով:

«Սպուտնիկ V» աշխարհում առաջինը գրանցված պատվաստանյութը կորոնավիրուսի դեմ
© Photo : РФПИ и Центр имени Гамалеи

Ավելին, պատվաստանյութի բաղադրիչների թիվը պարզապես ալգորիթմ է։ Հեպատիտ B-ի դեմ պատվաստանյութը, օրինակ, բաղկացած է երեք փուլից, քանի որ հեպատիտ B-ի վիրուսի վարակայնությունը շատ բարձր է (50 անգամ բարձր է ՄԻԱՎ-ի վարակից)։

Շատ բան կախված է պատվաստանյութի բաղադրությունից․ «Սպուտնիկ V»-ն առավել ունիվերսալ է համարվում, քանի որ մշակված է բազմացման գենից զրկված վիրուսի հիման վրա, և դրա շնորհիվ կարող է պայքարել նաև կորոնավիրուսի մուտանտային մանրէահիմքերի դեմ։ Իսկ «ԷպիՎակԿորոնան» բաղկացած է վիրուսի՝ արհեստականորեն սինթեզված սպիտակուցներից, ուստի ամենաքիչ ալերգիկն է։

Միֆ 4․ Տարեցներին պատվաստել չի կարելի

Մինչև նախորդ տարվա դեկտեմբերի վերջ ավագ սերնդի ներկայացուցիչներին խորհուրդ չէին տալիս պատվաստվել կորոնավիրուսի դեմ, այնուհետև արգելքը հանվեց։ Վարակաբան, բժշկական գիտությունների դոկտոր, Բնական գիտությունների ռուսական ակադեմիայի փոխնախագահ Վիկտոր Զուևը Sputnik–ին ասաց, որ դա սովորական բան է։

Արևմուտքը պատրաստ է կռիվ տալ պատվաստանյութի համար

«60-ից բարձր տարիքի մարդկանց խնամքով են վերաբերվում, ուստի պատվաստանյութեր ստեղծելիս աստիճանաբար տվյալներ են հավաքում տարբեր տարիքի մարդկանց համար դրա արդյունավետության մասին,-նշեց նա։-Ամեն դեպքում երիտասարդի և ծեր մարդու օրգանիզմները տարբերվում են, ուստի տարբեր տարիքային խմբերում պատվաստանյութը քայլ առ քայլ են տարածում։ Ես ինքս 90+ խմբին պատկանող մարդ եմ՝ 1929թ․-ին եմ ծնվել, կինս էլ է նույն տարիք։ Մենք արդեն պատվաստվել ենք և ոչինչ չենք զգացել»։

Տարեցների շրջանում պատվաստման ռիսկերի բացակայության մասին ավելի վաղ խոսել էր նաև Օքսֆորդի համալսարանի գենային թերապիայի պրոֆեսոր Լեն Սեյմուրը, որը գնահատել էր «Սպուտնիկ V» պատվաստանյութի արդյունավետությունը:

«Տվյալները ցույց են տալիս, որ «Սպուտնիկ V» պատվաստանյութը լավ է գործում, այդ թվում՝ 60 և ավելի տարիքի մասնակիցների խմբում: Սա տպավորիչ առաջընթաց է և կարևոր ներդրում COVID-19-ի դեմ համաշխարհային պայքարում»,-շեշտեց նա։

Սեյմուրի գնահատականը թվերի վրա է հիմնված․ 60-ից բարձր տարիքի 2144 կամավորներից փորձարկումների ամենատարեց մասնակիցը հետազոտությունների անցկացման պահին 87 տարեկան է եղել։ Ուսումնասիրության ընթացքում ոչ մի լուրջ կողմնակի ազդեցություն չի գրանցվել, սակայն բոլոր մասնակիցների մոտ ձևավորվել է բջջային իմունային պատասխան, որը պաշտպանում է նրանց կորոնավիրուսի ծանր ձևից:

Միֆ 5․ Ռուսաստանն աշխարհում առաջինն է գրանցել պատվաստանյութը, նշանակում է՝ մշակումը կիսատ է

Վիկտոր Զուևի խոսքով` շատերը սխալմամբ կարծում են, որ եթե համավարակը նոր է, ուրեմն պատվաստանյութը շըփ–թըփ են պատրաստել։ Վարակաբանությունը, որպես գիտություն, միշտ ձգտում է իրադարձություններից առաջ ընկնել։ Այսինքն՝ հիվանդությունը կարող է նոր լինել, սակայն անտիդոտի ստեղծման գործընթացում գիտնականները միշտ փորձում են այն տեխնոլոգիաները, որոնց վրա աշխատում են արդեն տարիներ շարունակ։

«Բացի այդ, «Սպուտնիկ V»–ին հասնելու համար մենք փաստացի 25 տարվա ճանապարհ ենք անցել,-բացատրում է Զուևը,-ի սկզբանե այն տեխնոլոգիան, որն օգտագործվում է այս պատվաստանյութի պատրաստման համար, մշակել էինք մանկական գենետիկ հիվանդությունների դեմ դեղամիջոց ստեղծելու համար։ Սակայն ընթացքում պարզ դարձավ, որ տեխնոլոգիան համապատասխանում է Էբոլա տենդի դեմ պատվաստանյութի համար, իսկ դրա մահաբերությունը շատ ավելի բարձր է,քան կորոնավիրուսինը»։

Պաշտոնական տվյալներով՝ Էբոլա տենդի դեմ պատվաստանյութի միջազգային արտոնագիրը Ն. Ֆ. Գամալեայի անվան կենտրոնին տրվել է 2017 թ․-ին: Կորոնավիրուսի դեմ պատվաստանյութը ստեղծելիս գիտնականներն օգտագործել են նույն տեխնոլոգիան։ Ինչպես ավելի վաղ ասել էր Գամալեայի կենտրոնի ղեկավար Ալեքսանդր Գինցբուրգը, պատվաստանյութերի ոչ մի մրցավազք չի եղել, պարզապես նախորդ փորձը թույլ է տվել սեղմ ժամկետում կրկնել այն, ինչն արդեն արվել էր:

COVID-19-ի դեմ պատվաստանյութերի համեմատությունը
© Sputnik
COVID-19-ի դեմ պատվաստանյութերի համեմատությունը
126
թեգերը:
պատվաստումներ, պատվաստանյութ, կորոնավիրուս
Ըստ թեմայի
Ռուսաստանում ստեղծել են «բրիտանական» կորոնավիրուսի հայտնաբերման առաջին թեստ համակարգը
Վերջապես պարզեցին. ԱՀԿ-ի աշխատակիցը պատմել է` ինչպես է առաջացել կորոնավիրուսը
Գիտնականներն ասել են` ինչ գույներ ունի կորոնավիրուսը
Իրան

ԱՄՆ-ն կշարունակի Իրանի դեմ «հիբրիդային պատերազմը», կամ ինչն ձեռնտու Հայաստանին

72
(Թարմացված է 23:02 08.03.2021)
ԱՄՆ-ի և Իրանի հարաբերությունները շարունակում են լարված մնալ, հատկապես Թեհրանի դեմ ևս մեկ տարով պատժամիջոցները երկարացնելու վերաբերյալ Վաշինգտոնի հայտարարության ֆոնին։

ԵՐԵՎԱՆ, 8 մարտի - Sputnik․ Վաշինգտոնը կշարունակի Իրանի դեմ «հիբրիդային պատերազմը»: Sputnik Արմենիայի հետ զրույցում նման կարծիք հայտնեց իրանագետ Ահարոն Վարդանյանը՝ մեկնաբանելով Պարսից ծոցում ամերիկյան ինքնաթիռների հայտնվելը։

Մի քանի B-52 ամերիկյան ռազմավարական ռմբակոծիչներ մարտի 8-ին առանց վայրէջք կատարելու թռիչքներ են իրականացրել ԱՄՆ տարածքից դեպի Իրանի հարավային սահման և հակառակ ուղղությամբ։

ԱՄՆ-ի և Իրանի հարաբերությունները շարունակում են բավական լարված մնալ, հատկապես Թեհրանի դեմ ևս մեկ տարով պատժամիջոցները երկարացնելու վերաբերյալ Վաշինգտոնի հայտարարության ֆոնին։ Ամենայն հավանականությամբ, իրավիճակն առաջիկայում կզարգանա ագրեսիվ հռետորաբանությունն ուժեղացնելու ուղղությամբ։

«Սակայն չեմ կարծում, որ կողմերը կանցնեն գործնական քայլերի՝ բուն Իրանի տարածքում գործողություններ կատարելու առումով։ Այլ հարց է, որ ակտիվ կլինեն գործընթացներն այն տարածաշրջաններում, որտեղ կա իրանական ներկայություն, օրինակ՝ Սիրիայում։ Կշարունակվի այսպես կոչված «հիբրիդային պատերազմը»», - ասաց Վարդանյանը։

Նրա խոսքով՝ մինչև Ջո Բայդենի վարչակազմի գալը, շատերը կածում էին, որ ԱՄՆ նոր ղեկավարության օրոք Թեհրանի  նկատմամբ վերաբերմունքը կփոխվի։ Հատկապես հաշվի առնվում այն հանգամանքը, որ Բայդենը փոխնախագահ էր Օբամայի կաբինետում, որի օրոք Իրանի հետ «միջուկային գործարք» ստորագրվեց։

Սակայն գործընթացները ցույց տվեցին, որ անկախ իշխանությունից, Վաշինգտոնում կարծում են, որ ԱՄՆ-ի շահերից է բխում շարունակել Իրանի դեմ այդ քաղաքականությունը։

Իրանի և Հայաստանի միջև քաղաքական երկխոսությունը կակտիվանա. Այվազյանը զրուցել է Զարիֆի հետ

Ինչ վերաբերում է Հայաստանին, ապա մեզ ձեռնտու է, որ Իրանի նկատմամբ պատժամիջոցները չեղարկվեն։ Իրանական բաց և ազատ տնտեսությունը, օրինակ, թույլ կտար գոնե մասամբ թեթևացնել դրամական փոխանցումների իրականացման գործընթացը։

«Մյուս կողմից, Իրանը պատժամիջոցների պայմաններում փորձում է անդամակցել ԵԱՏՄ-ին։ Դա նոր պատուհան է բացում Հայաստանի համար։ Սակայն այսօր մեր առաջ բազմաթիվ խնդիրներ են ծառացել՝ անվտանգության, տնտեսության, սոցիալական ոլորտում։ Նախ անհրաժեշտ է լուծել դրանք, որից հետո մտածել մյուս բաների մասին», - նշեց Վարդանյանը։

Թուրքիան կողմ է, որ Իրանի դեմ պատժամիջոցները վերացվեն

Հիշեցնենք, որ ԱՄՆ նախագահ Ջո Բայդենը մարտի 5–ին երկարաձգեց դեռևս 1995 թվականից Իրանի դեմ կիրառվող պատժամիջոցները։ Սպիտակ տան հաղորդագրության մեջ ասվում էր, որ Իրանի գործողություններն ու քաղաքականությունը շարունակում են սպառնալիք ներկայացնել ԱՄՆ ազգային անվտանգությանը, արտաքին քաղաքականությանն ու տնտեսությանը։

72
թեգերը:
Եվրասիական տնտեսական միություն (ԵԱՏՄ), Հայաստան, պատժամիջոցներ, Ջո Բայդեն, ԱՄՆ, Իրանի Իսլամական Հանրապետություն
Ըստ թեմայի
ԱՄՆ-ն որոշել է պատժել սաուդցիներին. Ռուսաստանն ու Իրանը կշահե՞ն դրանից
ՀՀ վարչապետի հետ խոսում է ոչ թե ԱՄՆ–ի նախագահը, այլ պետքարտուղարը. ի՞նչ է դա նշանակում
ԱՄՆ կոնգրեսականները հայ գերիներին ազատ արձակելու կոչով բանաձև կներկայացնեն
Վրաստանի ոստիկանություն

Ծեծկռտուք Վրաստանում. թեմի առաջնորդարանի երկրորդ հարկից շուրջ 10 մարդ է ընկել. տեսանյութ

105
(Թարմացված է 21:21 08.03.2021)
Թեմի հոգևորականների ու հավատացյալների միջև անհամաձայնությունը վերաճել է քաշքշուկի ու բախումների, որոնք տխուր ավարտ են ունեցել:

ԵՐԵՎԱՆ, 8 մարտի - Sputnik. Այսօր դժբախտ դեպք է տեղի ունեցել Վրաստանի Մարտվիլի համայնքում: Ինչպես հայտնում է Sputnik Գրուզիայի Տելեգրամ- ալիքը, վրացական այս համայնքում տարաձայնությունների առիթ է դարձել թեմի առաջնորդի որոշումը, որով նա թեմական երկու հոգևորականներին արգելել էր պատարագների ծիսակարգ անցկացնել: Թեմի հավատացյալներն այս որոշումից դժգոհ պահանջել էին, որպեսզի նոր առաջնորդն անմիջապես հեռանա թեմից:

Մի քանի տասնյակ տեղի բնակիչներ իրենց բողոքը լսելի դարձնելու համար այցելել էին թեմի առաջնորդարան, մուտք գործել տարածք, բարձրացել շենքի երկրորդ հարկ ու փորձել բացել գրասենյակի դուռը:

Թմրամիջոցը Վրաստան չհասավ․ Սյունիքի Շվանիձոր գյուղում թմրանյութի թաքստոց է հայտնաբերվել

Այդ պահին, սակայն, երկրորդ հարկի պատշգամբի փայտե բազրիքը չէր դիմացել հրմշտոցի ճնշմանն ու պոկվել, ընկել էր: Դրա հետևանքով պատշգամբում գտնվող շուրջ տասը մարդ ընկել էին երկրորդ հարկից: Նրանց թվում՝ վրացական 4 հեռուստաալիքների լրագրողներ։

Sputnik Գրուզիան հայտնում է, որ տուժածներին տեղափոխել են հիվանդանոց:

105
թեգերը:
Վիրավոր, Ծեծկռտուք, հոգևորական, Վրաստանի Հանրապետություն
Աշոտ Մինասյան

Կողոպտել են «Սիսական» ջոկատի հրամանատար Աշոտ Մինասյանի տունը և գողացել նրա շքանշանները

238
(Թարմացված է 23:17 08.03.2021)
Այդ տանը ոչ ոք հիմա չի ապրում։ Այն, որպես հայրական օջախ, վերածվել էր Աշոտ Մինասյանի` Արցախյան պատերազմում զոհված եղբոր` Աղվան Մինասյանի թանգարանի։

ԵՐԵՎԱՆ, 8 մարտի - Sputnik․ Անհայտ անձինք կողոպտել են «Սիսական» ջոկատի լեգենդար հրամանատար Աշոտ Մինասյանի հայրական տունը։ Լուրը Sputnik Արմենիայի հետ զրույցում հաստատեց նրա քրոջ դուստրը` Արմինե Սահակյանը։

Նշենք, որ Աշոտ Մինասյանի հայրական տունը գտնվում է Սիսիանի Լծեն գյուղում։

Մեր զրուցակցի խոսքով` այդ տանը ոչ ոք հիմա չի ապրում։ Այն որպես հայրական օջախ վերածվել էր Արցախյան պատերազմին մասնակցած որդիների թանգարանի։ Կողոպուտի մասին նրանց զանգել, տեղեկացրել է հարևանը։

«Ջարդել են ամեն ինչ և տարել են հրամանատարի` առաջին Արցախյան պատերազմի ռազմական շքանշանները: Տարել են նաև զոհված մորեղբորս` Աղվանի Մինասյանի շքանշանները ու նրա մատանին, որը պահում էինք որպես մասունք։ Աղվանի նկարները գցել են գետնին և քայլել վրայով»,–ասաց հրամանատարի ազգականը` հավելելով, որ հնարավոր է` դիտավորյալ արված քայլ է` վախեցնելու, լռեցնելու նպատակ են ունեցել։

Սահակյանը նշեց, որ տան ամեն ինչը խառնել, թափել են գետնին, տանը եղած օղիները մասամբ խմել, մասամբ բացել ու թափել են։ Սենյակներից մեկի վարագույրը մասամբ այրված է եղել, նա ենթադրում է, որ գուցե փորձել են այրել տունը։

Հիշեցնենք, որ ՀՀ ազգային անվտանգության ծառայությունը 2020-ի նոյեմբերի 14-ին ՀՀ վարչապետ Նիկոլ Փաշինյանի սպանության փորձի փաստով հարուցված քրեական գործի շրջանակներում որպես կասկածյալներ ձերբակալել էր մի շարք անձանց, այդ թվում՝ «Հայրենիք» կուսակցության ղեկավար Արթուր Վանեցյանին, ՀՀ ԱԺ նախկին պատգամավոր, ՀՀԿ խմբակցության ղեկավար Վահրամ Բաղդասարյանին, ՀՅԴ անդամ Աշոտ Ավագյանին, ինչպես նաև Սիսիանի կամավորականների ջոկատի հրամանատար Աշոտ Մինասյանին։

Բոլոր 4 կասկածյալներին մեղադրանք է առաջադրվել Քրեական օրենսգրքի 35-300-րդ հոդվածի 1-ին մասի (իշխանության յուրացման), 35-305-րդ հոդվածի (պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման) և 235-րդ հոդվածի (ապօրինի զենք զինամթերք պահելու) կասկածանքով։

238
թեգերը:
Սիսիան, շքանշան, տուն, գողություն, կողոպուտ, Աշոտ Մինասյան