ԵՐԵՎԱՆ, 5 փետրվարի – Sputnik. ՀՀ վարչապետ Նիկոլ Փաշինյանը Եվրասիական միջկառավարական խորհրդի նիստում բարձրացրել Է Եվրասիական Տնտեսական միության երկրների ներքին շուկայի պաշտպանության հարցը։
Ելույթի ընթացքում վարչապետը մատնանշել է մինչև 2025 թվականը Զարգացման ռազմավարության վերջնական հաստատումը՝ հույս հայտնելով, որ ընթացիկ տարին արդյունավետ կլինի ինտեգրման համար:
«Այս կապակցությամբ կցանկանայի նշել բարձր և թվային տեխնոլոգիաների ոլորտում հետագա համագործակցությանն ուղղված միջոցառումների կարևորությունը։ Հայաստանն ավանդաբար ակտիվորեն աջակցում և մասնակցում է Միության թվային օրակարգի իրականացման գործընթացին»,-նշել է Փաշինյանը։
Փաշինյանն ուշադրություն է հրավիրել «Ճամփորդում եմ առանց COVID-19»-ի բջջային հավելվածի պիլոտային նախագծի մեկնարկին: Այս նախագիծը հնարավորություն տվեց փոխընդունելի լուծումներ գտնել Հայաստանի, Բելառուսի և Ռուսաստանի միջև ուղևորափոխադրումների հարցում։
«Սա էական սոցիալական և տնտեսական նշանակություն ունի մեր երկրի համար։ Ակնհայտ է, որ նման նախագիծը կարևոր է նաև կորոնավիրուսի տարածման ռիսկի նվազեցման տեսանկյունից եւ կարևոր տեղ է զբաղեցնում համավարակի դեմ պայքարի համար ձեռնարկվող միջոցառումների շարքում»,-ասել է ՀՀ վարչապետը։
Նա նաև ուշադրություն է հրավիրել ԵԱՏՄ-ում հակադեմպինգային և փոխհատուցման միջոցների կիրառման վրա։ Փաշինյանի խոսքով՝ դրանք կարող են արդյունավետ լինել երրորդ երկրներից հարաճուն ներմուծման կամ անբարեխիղճ մրցակցության բացասական ազդեցությունից հայրենական արտադրողներին պաշտպանելու համար։
Նիկոլ Փաշինյանը հանդիպել է Ղրղզստանի նորանշանակ վարչապետ Ուլուկբեկ Մարիպովի հետ
Այստեղ, նրա խոսքով, կարևոր է ինչպես միասնական մոտեցումը, այնպես էլ վերջնական արդյունքը, որն արտահայտվելու է Միության երկրների ապրանքների մրցունակությամբ՝ երրորդ երկրների ապրանքների համեմատ։
«Միության ներքին շուկայի պաշտպանությանն ուղղված մեխանիզմների համատեքստում պետք է դիտարկել նաև գործող միջազգային պայմանագրերին համապատասխան ԵԱՏՄ տարածքում պատասխան միջոցների մեխանիզմի մշակման և ներդրման հնարավորությունը»,-ասել է Փաշինյանը։
Վարչապետը ԵԱՏՄ գործընկերներին շնորհակալություն է հայտնել սակագնային առանձնաշնորհների միասնական համակարգից օգտվող երկրների ցանկը վերանայելու Հայաստանի նախաձեռնությանը Միության երկրների ցուցաբերած կառուցողական մոտեցման համար։
«Գոհունակությամբ ուզում եմ նշել, որ զարգացող և առավել թույլ զարգացած երկրներից ապրանքների և ծառայությունների նկատմամբ սակագնային արտոնություններ տրամադրելու հարցն արդեն մտել Է ԵԱՏՄ օրակարգ և մոտ ապագայում համապատասխան լուծում կստանա մեր իսկ ընդունած չափանիշների հիման վրա»,-ասել է Փաշինյանը։
Հայաստանը, նրա խոսքով, պատրաստ է ջանքեր գործադրել ԵԱՏՄ-ում առաջնային ուղղություններում աշխատանքն առաջ մղելու համար:
2020 թվականի դեկտեմբերի 4-ին Փաշինյանը Եվրասիական միջկառավարական խորհրդի նիստում հայտարարել էր, որ անհրաժեշտ է վերանայել Եվրասիական տնտեսական միության սակագնային արտոնություններից օգտվող երկրների ցանկը՝ առաջարկելով ցանկից հանել Թուրքիային։
