ԵՐԵՎԱՆ, 16 հունվարի - Sputnik. Հայկական արմատներով կանադացի դիզայներ Կատյա Զաքարյանը հայտնի է TikTok-ում։
Աղջիկը ծնվել է Կանադա գաղթած լիբանանահայ ընտանիքում և շատ է հպարտանում իր արմատներով։
«Ամենագեղեցիկ բանն այն է, որ ես և հայ եմ, և լիբանանահայ եմ։ Ես հարազատներ ունեմ աշխարհի գրեթե բոլոր մասերում, ոմանց հետ ծանոթացել եմ ոչ այնքան վաղուց»,- իր հետևորդների հետ անկեղծանում է Կատյան:
Աղջիկն արդեն մեկուկես տարի է՝ տեսանյութեր է հրապարակում, որտեղ ցույց է տալիս իր նորաձեւ եւ յուրօրինակ զգեստները՝ այդ ընթացքում խոսելով կանանց հաջողության եւ երջանկության մասին, իր մտքերը «համեմելով» ասացվածքներով:
Օրինակ, տեսանյութերից մեկում նա հայտնվում է ավելի քան մեկ տասնյակ զգեստներով ՝ ներկայացնելով, թե յուրաքանչյուր իրավիճակում ինչ կկրեր։ Ասենք, եթե լիներ «մաֆիոզի կինը», եթե ապրեր 19-րդ դարում, եթե գնար օլիգարխի հետ հանդիպման։
Երբ արդեն նրա հետևորդների թիվը մի քանի տասնյակ հազարներ էին, նա կարողացավ մոնետիզացնել իր էջի բովանդակությունն ու իրականացնել մանկության երազանքը՝ ստեղծել հագուստի սեփական շարքը։
«Ցավդ տանեմ» շապիկներ․ մոսկվայաբնակ դիզայներն Արցախին աջակցելու համար հավաքածու է թողարկել
Նրա հավաքածուում ոչ միայն «գլամուրային», բացառիկ զգեստներ են, այլև լողազգեստներ և անգամ գրասենյակային հագուստ։
Կատյան զարգացնում է իր ապրանքանիշը։ Այսօր նրա հետևորդների թիվն անցնում է կես միլիոնը։ Նրանց մի մասը հենց Կատյայի հագուստի գնորդներն են։
Աղջկա գործերն այնքան լավ են, որ առցանց վաճառքներից բացի նա խանութներ է բացել կանադական Մոնրեալ եւ Քվեբեկ քաղաքներում:
