ԵՐԵՎԱՆ, 6 նոյեմբերի - Sputnik. Ադրբեջանը Շուշին գրավելու մասին հերթական կեղծ «ապացույցն» է ներկայացրել։ Այս անգամ` տեսանյութի տեսքով, որում իբր ներկայացված է Շուշիի մզկիթի մինարեթի վրա ծածանվող ադրբեջանական դրոշը։
Ընդ որում՝ այս կեղծիքը շատ արագ տարածվում է ադրբեջանական կայքերում ու տելեգրամ–ալիքներում, որոնց հեղինակներն ու այցելուները նույնիսկ չեն էլ փորձում ճշտել իրենց հրամցվող հերթական կեղծիքի իսկությունը։
Փոխարենը դա արել է ՀՀ տեղեկատվության ստուգման կենտրոնը։
Կենտրոնի աշխատակիցներն ընդամենը համադրել են տեսանյութում ներկայացված շինությունը Շուշիի մզկիթի հետ։
«Համոզվելու համար, որ գործ ունենք հերթական կեղծիքի հետ, բավական է ընդամենը համեմատել դրանում առկա շինությունը Շուշիի Գյովհար Աղայի վերին մզկիթի հետ»,– ասված է կենտրոնի տարածած հաղորդագրության մեջ։
Հրապարակված լուսանկարից ակնհայտ է, որ Շուշիի մզկիթը բոլորովին այլ ճարտարապետական տեսք ունի։
ՀՀ ՊՆ ներկայացուցիչ Արծրուն Հովհաննիսյանը նոյեմբերի 5-ին Հանրային հեռուստաընկերության եթերում ասել էր, որ ադրբեջանցիները հիմա ամեն կերպ ուզում են Շուշիում իրենց դրոշը տեղադրել, քանի որ նոյեմբերի 9-ին Ադրբեջանում դրոշի օր է։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Նոյեմբերի 5-ի ժամը 15։00-ի դրությամբ` հակառակորդի կրակոցների հետևանքով հայկական կողմից զոհվել են 1177 զինծառայողներ։ Քաղաքացիական անձանց շրջանում կա 50 զոհ ու 148 վիրավոր։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 7290 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 257 անօդաչու թռչող սարք, 16 ուղղաթիռ, 25 ինքնաթիռ, 723 զրահատեխնիկա, 6 ՏՈՍ համակարգ։
Ձախողված բլիցկրիգը, կամ Բաքվի ծրագրով վարձկանների մասին աշխարհը չպիտի իմանար
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Արցախի նկատմամբ կիրառված ֆոսֆորը դիմավորեք Ադրբեջանում, Իրանում ու Թուրքիայում
