ԵՐԵՎԱՆ, 10 հոկտեմբերի – Sputnik. Աշխարհահռչակ հույն դիրիժոր Թեոդոր Կուրենտզիսը որոշել է համերգի համար ստացած հոնորարը փոխանցել Արցախի երեխաների օգնության հիմնադրամին։ Տեղեկությունը Facebook–ի էջում հայտնում է Հայերի ասամբլեան։
«Ալֆրեդ Շնիտկե. երգչախմբերի համար համերգ միջնադարի հայ մեծ բանաստեղծ Գրիգոր Նարեկացու բանաստեղծությունների հիման վրա» անունով Մոսկվայում կայացած համերգը տեղի է ունեցել Լեռնային Ղարաբաղում հակամարտության սրման ժամանակ, և դիրիժորը որոշում է կայացրել միանալ մարդասիրական ակցիային:
«Համայն հայության անունից Հայերի ասամբլեան խորին երախտագիտություն է հայտնում Թեոդոր Կուրենտզիսին և երգչախմբին` համերաշխություն ու աջակցություն ցուցաբերելու համար»,– նշված է միության հաղորդագրության մեջ։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 10-ի ժամը 11։00-ի դրությամբ` հակառակորդի կրակոցների հետևանքով զոհվել են ավելի քան 400 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4369 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 162 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 508 տանկ և ՀՄՄ:
Փայլուն օպերացիա Արցախում. ազատագրվել է դիրքերից մեկը, փրկվել 19 զինվորի կյանք
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հեծանիվի անվադողը՝ «ժգուտ», պատկերասրահն էլ՝ տեսակավորման կայան. կամավոր դարձած հայություն
