Ալեքսիս Օհանյան

Հայ փախստականների թոռը. Forbes–ն Ալեքսիս Օհանյանի գործունեության մասին հոդված է հրապարակել

136
Եթե նախկինում Reddit-ի հիմնադիր Ալեքսիս Օհանյանը պայքարում էր համացանցում ազատության համար, ապա այժմ նա պայքար է ծավալում իրական կյանքում։

ԵՐԵՎԱՆ, 21 հունիսի – Sputnik. Հայտնի ինտերնետ-գործարար և ներդրող, Reddit սոցիալական լրատվական կայքի հիմնադիր Ալեքսիս Օհանյանն ակտիվորեն պայքարում է ազգային փոքրամասնությունների, կանանց, սևամորթների և բոլոր այն մարդկանց իրավունքների համար, ովքեր օգնության կարիք ունեն։

Ամերիկյան Forbes հեղինակավոր ամսագրի ռուսալեզու տարբերակը Օհանյանին մասին հոդված է հրապարակել, որը վերնագրված է․«Համացանցի քաղաքապետը․ ինչպե՞ս Reddit-ի հիմնադիր Ալեքսիս Օհանյանը դարձավ հալածյալների իրավունքների գլխավոր պաշտպանը»։

«Ալեքսիս Օհանյանն ունի 70 միլիոն դոլար և աշխարհը փոխելու ուժգին ցանկություն»,-գրում է հոդվածի հեղինակ Դարյա Շիպաչեվան։

Նա նշում է, որ հունիսի 5-ին՝ ոստիկանի կողմից աֆրոամերիկացի Ջորջ Ֆլոյդի սպանությունից տասն օր անց, Օհանյանն անսպասելիորեն հայտնեց, որ հեռանում է Reddit ընկերության ղեկավարությունից, որպեսզի զբաղվի աշխարհում տեղի ունեցող անարդարությունների դեմ պայքարով, առաջին հերթին՝ ընդդեմ ռասիզմի։ Տնօրենների խորհրդի ղեկավարի պաշտոնը լքելով՝ նա խորհուրդ տվեց գործընկերներին իր փոխարեն սևամորթ թեկնածուի ընտրել։

Բացի այդ, գործարարը խոստացավ, որ Reddit-ի արժեթղթերից գոյացող հետագա ողջ հասույթը կուղղվի այն կազմակերպություններին, որոնք փորձում են պայքարել ռասիզմի դեմ։ Նա արդեն կատարել է առաջին փոխանցումը Black Lives Matter (BLM) շարժման համար. մեկ միլիոն դոլար է տվել Know Your Rights Camp կազմակերպությանը, որը սևամորթ երիտասարդներին օգնում է պայքարել իրենց իրավունքների համար և դիմադրել ոստիկանական բռնություններին։ Հռչակավոր թենիսիստուհի Սերենա Ուիլյամսի ամուսինը հույս ունի, որ իր օրինակն իրական փոփոխությունների սկիզբ կդառնա։

«Պատկանելիության հարցն Ալեքսիս Օհանյանին միշտ է հուզել․․․ նա «ապօրինի ներգաղթյալների որդի է․ Օհանյանի հորական տատն ու պապը ԱՄՆ են փախել հայերի Ցեղասպանության ժամանակ, որը տեղի է ունեցել 1915-1923թթ․։ Այդ շրջանում թուրքերի կողմից վերահսկվող տարածաշրջաններում տեղի զորքերը կոտորում էին հայ ազգաբնակչությանը, ընդհանուր առմամբ մոտ 1,5 միլիոն մարդ է սպանվել։ Այնպես որ, ազգային թշնամանքի հարցն Ալեքսիսի համար խիստ անձնական է»,-գրում է հոդվածի հեղինակը։

Նա հիշեցնում է նաև, որ Օհանյանի դուստրը՝ երկու տարեկան Օլիմպիա Օհանյանը, մուլատ է, այնպես որ ռասիզմի դեմ պայքարի հարցը փոքրիկի ծնվելուց հետո նրա համար առավել արդիական է դարձել։

Կանանց իրավունքները պակաս կարևոր չեն

Երբ Օլիմպիան լույս աշխարհ եկավ, գործարարը 16-շաբաթյա խնամքի արձակուրդ վերցրեց, որպեսզի օգնի կնոջը հոգ տանել երեխայի մասին։ Այդ ժամանակից ի վեր նա բոլոր տղամարդանց կոչ է անում նույն կերպ վարվել։ Այդ պատճառով էլ իր հիմնադրած Reddit ընկերությունում գործարարը երեխայի խնամքի 16 շաբաթ վճարվող արձակուրդ է նախատեսել ցանկացած սեռի ծնողների համար։

“Без разрешения” – презентация книги Алексиса Оганяна (8 октября 2019). Еревaн
© Sputnik / Aram Nersesyan
Ալեքսիս Օհանյանը Երևանում

«Օլիմպիայի ծնվելուց առաջ նա չէր էլ մտածում խնամքի արձակուրդ գնալու մասին։ Բայց ծննդաբերության ընթացքում Սերենա Ուիլյամսի մոտ լուրջ բարդություններ առաջացան, որոնց արդյունքում նա մի քանի օր պայքարում էր կյանքի համար… Ալեքսիսը ստիպված եղավ իր վրա վերցնել ընտանիքի ամբողջ հոգսը»,-նշվում է Forbes-ի հոդվածում։

Դրանից հետո գործարարը սկսեց ավելի լավ պատկերացնել, թե ինչ հսկայական հոգսեր ունեն նոր ծննդաբերած կանայք։ Հոդվածի հեղինակը նշում է, որ ԱՄՆ-ում այդ խնդիրը հատկապես սուր է, քանի որ յուրաքանչյուր չորրորդ մայրիկը ստիպված է աշխատանքի վերադառնալ ծննդաբերությունից հետո 2 շաբաթվա ընթացքում։ ԱՄՆ-ում կազմակերպությունների ընդամենը 9% է տղամարդկանց երեխայի խնամքի վճարվող արձակուրդ առաջարկում։

Անգամ այն երկրներում, որտեղ տղամարդկանց և կանանց արձակուրդի իրավունքները քիչ թե շատ հավասար են, հայրերից քչերն են լիովին օգտվում խնամքի արձակուրդ վերցնելու իրավունքից։

«Օհանյանն առաջարկում է շտկել  հայրության հանդեպ վերաբերմունքը։ Տղամարդիկ չպետք է ամաչեն խոստովանելու, որ երեխայի խնամքն իրենց համար նույնքան կարևոր առաջադրանք է, որքան կարիերայում կայանալը»:

Հայրերի համար երեխայի խնամքի արձակուրդ սահմանելը կարևոր է քայլ է կանանց և տղամարդկանց կատարած չվճարվող կենցաղային աշխատանքը հավասերցնելու համար։ Վիճակագրության համաձայն՝ կանայք 1,26-ից (Շվեդիա) մինչև 10 (Կամբոջա) անգամ ավելի շատ կենցաղային աշխատանք են կատարում՝ իրենց զուգընկերների համեմատ։ Ալեքսիս Օհանյանն առաջարկում է պայքարը սկսել սեփական անձից։

Մի քանի ամիս նվիրելով ընտանիքին` գործարարն ամենևին չի կորցրել իր հավակնություններն ու բիզնեսում իր կարգավիճակը։

Ինչպես փոխել աշխարհը

Հոդվածի հեղինակը նշում է, որ Ալեքսիս Օհանյանը մարդկանց հանդեպ անվերապահ հավատ ունի և համոզված է, որ խոսքի և ստեղծագործելու ազատությունն աշխարհն ավելի լավն է դարձնում։ 

2012 թ․-ին ամերիկյան Forbes ամսագիրը Օհանյանին անվանել էր «համացանցի քաղաքապետ»։ Բանն այն է, որ այդ ժամանակ Ալեքսիսը Reddit-ի օգտատերերի անունից պայքարում էր համացանցում ազատության համար, որին սպառնում էր ամերիկյան կառավարության «Stop Online Piracy Act» ցանցահենության դեմ պայքարի նախագիծը (օրենքի համաձայն՝ ցանկացած կայք կարելի էր արգելափակել հեղինակային իրավունքները խախտելու մասին առաջին իսկ բողոքից հետո)։ Բողոքների արդյունքում օրենսդիրները հրաժարվեցին ընդունել նախագիծը։

«Աշխարհն իմաստավորվել է նրա համար»․ ինչպես է Ալեքսիս Օհանյանը զարմացրել փոքրիկ Օլիմպիային

«Ալեքսիս Օհանյանն աջակցում է քաղաքացիական նախաձեռնություններին․․․ Նրա համացանցային ակտիվությունը բավական լուրջ պտուղներ է տվել, բայց հիմա նա պատրաստվում  է դուրս գալ օֆլայն պայքարի և աշխարհում իրական փոփոխություններ անել»,-գրում է հոդվածի հեղինակը։

Նա ավելացնում է, որ Օհանյանի ոչ ցանցային ակտիվությունն արդեն իսկ տվել է առաջին պտուղները․ Reddit-ի տնօրենների խորհրդում նրա փոխարեն ընդունել են սևամորթ Մայքլ Սիբելին։

136
թեգերը:
Forbes, Կին, ինտերնետ, սևամորթ, Հայոց ցեղասպանություն, ԱՄՆ, Ալեքսիս Օհանյան
Ըստ թեմայի
Ալեքսիս Օհանյանը վերջին 10 տարվա ձեռքբերումների թվին է դասել նաև հայաստանյան այցը
«Բոլորդ մեր հերոսներն եք». Ալեքսիս Օհանյանը հուզիչ գրառում է արել բժիշկների մասին
Ալեքսիս Օհանյանը հայկական կոնյակ է պահում կարանտինի ավարտի համար. երկար կենաց է ասելու
Ալեքսանդր Գինցբուրգը

Կորոնավիրուսի պատվաստանյութը կարո՞ղ է պաշտպանել գրիպից. պատասխանում է մասնագետը

39
(Թարմացված է 21:36 19.09.2020)
Հատկապես աշունն ակտիվ գրիպային սեզոն է, այնպես որ, հետաքրքրիր է`արդյոք կորոնավիրուսի դեմ պատվաստումը կօգնի գրիպին։

ԵՐԵՎԱՆ, 20 սեպտեմբերի — Sputnik. Կորոնավիրուսի դեմ պատվաստանյութը չի կարող պաշտպանել նաև սեզոնային գրիպներից։ Տեղեկությունը ՌԻԱ Նովոստիի հետ զրույցում հայտնել է Գամալեայի կենտրոնի տնօրեն Ալեքսանդր Գինցբուրգը:

«Ոչ, չի կարող»,- հստակ նշել է Գինցբուրգը ՝ պատասխանելով հարցին, թե կորոնավիրուսի դեմ պատվաստանյութը կարո՞ղ է պաշտպանել նաև գրիպից:

ՌԴ առողջապահության նախարարությունը ավելի վաղ տեղեկացրել էր, որ այս տարի բնակչության շրջանում ակտիվություն է նկատվում գրիպի դեմ պատվաստումներում և հորդորել էր դեռ չպատվաստվածներին պատվաստվել ու պաշտպանել իրենց և իրենց հարազատներին գրիպից:

Ռուսաստանի առողջապահության նախարարությունը օգոստոսին գրանցել է COVID-19-ի կանխարգելման համար աշխարհում առաջին պատվաստանյութը, որը մշակվել է Գամալեայի անվան ինստիտուտի կողմից և արտադրվում է Ուղղակի ներդրումների ռուսական հիմնադրամի հետ համատեղ:

Նուբար Աֆեյանի ընկերությունը Covid 19-ի դեմ պատվաստանյութի 20 միլիոն դեղաչափ կարտադրի

39
թեգերը:
գրիպ, պատվաստանյութ, պատվաստումներ, կորոնավիրուս
թեմա:
Կորոնավիրուսը աշխարհում
Ըստ թեմայի
ԱԺ–ն կուսումնասիրի կորոնավիրուսի դեմ կառավարության պայքարի արդյունավետությունը
Խցանված Երևանն ու դիմակավոր ուղևորները. ինչպե՞ս փրկել կորոնավիրուսից փրկվածներին
Կորոնավիրուսի թվերն ավելանում են. վարչապետն անհանգստացած է
Գարիկ Խարլամով և Քրիստինա Ասմուս

Կարեն Ադամյանը «հարցաքննել է» Comedy Club-ի անդամներին

36
(Թարմացված է 21:32 19.09.2020)
Համացանցում անկողնային տեսարանները կոշտ քննադատության ենթարկեցին և սկսեցին հալածել Խարլամովին՝ անվանելով նրան «կոտոշավոր» և «կուկոլդ»։

ԵՐԵՎԱՆ, 20 սեպտեմբերի – Sputnik. «50 հարց» հանրաճանաչ YouTube-շոուի հաղորդավար Կարեն Ադամյանը հարցազրույց է անցկացրել Comedy Club-ի հումորիստների հետ։ Հարցերը, ինչպես միշտ, սուր են եղել։  Այս անգամ նա արտիստներին հարցրել է, թե արդյոք «Տեքստ» ֆիլմը Գարիկ Խարլամովի հետ նրանց շփման մեջ արգելված թեմա չի դարձել և առհասարակ՝ ինչպես են այդ սկանդալից հետո փոխվել հարաբերությունները թիմի ներսում։

Comedy Club-ի մասնակից Զուրաբ Մատուան հավաստիացրել է, որ «Տեքստ» ֆիլմից հետո, որտեղ Գարիկ Խարլամովի նախկին կինը՝ Քրիստինա Ասմուսը, նկարահանվել էր էրոտիկ տեսարաններում, կոլեկտիվի ներսում վերաբերմունքը ոչ Խարլամովի, ոչ էլ Ասմուսի նկատմամբ բոլորովին չի փոխվել։

«Անկողնային տեսարանները յուրաքանչյուր մարդու անձնական գործն են։ Ես Քրիստինկային ընտիր եմ վերաբերվում։ Նա մեր ընկերուհին է»,-ասել է Մատուան։

Comedy Club-ի մեկ այլ մասնակից Անդրեյ Ավերինն իր հերթին նշել է, որ Ասմուսն իրեն հարազատ մարդ է և իր երեխայի կնքամայրը։

«Իսկ ի՞նչ կա այստեղ քննարկելու։ Ասում են՝ ընտիր ֆիլմ է»,-շտապել է ավելացնել Մատուան։

Տղաների խոսքով՝ ֆիլմը արգելված թեմա չի դարձել, առավել ևս, որ Գարիկը հոյակապ հումորի զգացում ունի, նա անգամ դիմախաղով կարող է հեշտությամբ ծիծաղեցնել մարդկանց։

«Խարլաշկան մեր ախպերն է, Քրիստինկան մեր քույրն է։ «Տեքստը» նկարահանողն էլ մեր քավորն է։ Ամեն ինչ հոյակապ է»,-շարունակել է կատակել Մատուան։

«Բարև, մատաղ ինիմ»․ «Սուպեր Ժորիկը» խոսել է Արցախի բարբառով

Ավելի վաղ Comedy Club Production-ի հիմնադիր Արթուր Ջանիբեկյանը «Յանդեքս էֆիր» հարթակի «Просто о сложном с Софико Шеварднадзе» շոուի ժամանակ պատմել էլ իր ընկերոջ և գործընկերոջ, դերասան, երգիծաբան և Comedy Club-ի մասնակից Գարիկ Խարլամովի ապրումների մասին։ Հաղորդավարուհին Ջանիբեկյանին հարց էր ուղղել Խարլամովի և նրա՝ հիմա արդեն նախկին կնոջ՝ Քրիստինա Ասմուսի դեմ հալածանքների մասին, որոնք սկսվեցին «Տեքստ» ֆիլմում դերասանուհու և նրա խաղընկերոջ՝ դերասան Իվան Յանկովսկու անկողնային տեսարաններից հետո։

Ջանիբեկյանը պարզաբանել է, որ չի պատրաստվում գնահատականներ տալ և խորանալ թեմայի մեջ, քանի որ Գարիկն իր մտերիմ ընկերն է, և ինքը չափազանց լավ է ծանոթ այս պատմությանը։ «Ես միայն ընդհանուր գծերով կասեմ, թե ինչ է եղել։ Այո, իսկապես ծանր էր, բայց Գարիկն իրեն հիանալի դրսևորեց։ Ես ցանկացած հարցում աջակցում եմ նրան»,-ասել է Ջանիբեկյանը։ Նա նկատել է, որ չարակամների հարձակումները հայտնի լինելու հակառակ կողմն են, և այսպես թե այնպես Խարլամովը, ինչպես և ցանկացած այլ հայտնի մարդ, պատասխանատվություն է կրում Instagram-ում իր 8 միլիոն հետևորդների համար։

«Դու պատասխանատվություն ես կրում քո հետևորդների լավ տրամադրության և վատ ստացված օրա համար։ Չէ որ նրանցից ոչ ոք պայմանագիր չի ստորագրել այն մասին, որ ինքը խելացի, նպատակային մտածող, նորմալ մարդ է։ Նրանց մեջ հսկայական թվով պայմանականորեն աննորմալ՝ իմ հասկացողությամբ աննորմալ, մարդիկ կան, չնայած իրենց հասկացողությամբ իրենք միանգամայն նորմալ են։ Դե ինչ կարող ես անել, այդպիսին է կյանքը»,-ասել է Ջանիբեկյանը։

Նշենք, որ 8 տարի տևած ամուսնությունից հետո Խարլամովն ու Ասմուսը իրենց Instagram-ի էջերում առանձին-առանձին հայտնել էին, որ որոշել են ամուսնալուծվել։ Քրիստինան կատակել էր, որ ամուսնու հոգին հանել է, իսկ Գարիկն ընդգծել էր, որ դա հայփ կամ կատակ չէ։ Երկուսն էլ երկրպագուներին խնդրել էին չշահարկել «Տեքստ» ֆիլմի թեման։

Հայ հրուշակագործը «թխել» է Գարիկ Խարլամովին․ տեսանյութ

«Տեքստ» ֆիլմը ռուսական էկրաններին էր հայտնվել 2019թ․-ի հոկտեմբերին։ Ֆիլմը պատմում է երիտասարդի մասին, որը բանտից դուրս է գալիս և փորձում է հարմարվել ազատ կյանքին։ Ֆիլմում բաց տեսարաններ կան գլխավոր դերակատարներ Իվան Յանկովսկու և Քրիստինա Ասմուսի մասնակցությամբ։ Համացանցում անկողնային տեսարանները կոշտ քննադատության ենթարկեցին և սկսեցին հալածել Խարլամովին՝ անվանելով նրան «կոտոշավոր» և «կուկոլդ» (մարդ, ով հաճույք է ստանում կնոջ դավաճանությունից-խմբ.)։

Ի դեպ, վերջերս Խարլամովը խիստ նիհարել է, և դերասանի երկրպագուներն ասում են, որ իրենց սիրելի արտիստը ծանր է տանում ամուսնալուծությունը։

36
թեգերը:
Արթուր Ջանիբեկյան, Գարիկ Մարտիրոսյան, Comedy club
Ըստ թեմայի
Գալուստյանի ու Ռևայի բիզնեսը «վառվել» է
Գարիկ Մարտիրոսյանի կնոջ զվարճալի տեսանյութը հիացրել է շատերին. Ալսուն «օգնության» է հասել
«Կարծում էի` նման կլինեմ Բրյուս Ուիլիսին, բայց...». Գարիկ Մարտիրոսյանը սափրել է գլուխը
Ալեքսանդր Լիստենգորտ

Դուդուկ նվագող ու հայերեն բանաստեղծություններ գրող հրեան, կամ սեր առաջին հայացքից

0
(Թարմացված է 21:40 19.09.2020)
Ալեքսանդրը 27 տարեկան է։ Նա 9 լեզու գիտի ու կարծում է, որ դրանց առնվազն կեսը հայերենն ուսումնասիրելու շնորհիվ է կարողացել սովորել։

«Օբյեկտիվորեն ես հայ չեմ։ Ես նույնիսկ ռուս չեմ. ես հրեա եմ։ Բայց... հոգով», - ասում է 27–ամյա Ալեքսանդր Լիստենգորտը, որը մի քայլող պատմություն է։ Նրա մասին կարելի է երկար գրել, բայց մենք դա հակիրճ կանենք։

Ալեքսանդրը բանասեր է, գրող, էզոտերիկ, ապրում է Մոսկվայում, պրոֆեսիոնալ մակարդակով զբաղվել է հայերենով, աշխատել է Ռուսաստանում Հայաստանի դեսպանատանը, հայերեն բանաստեղծություններ է գրում ու նույնիսկ դուդուկ է նվագում։ Ինչպե՞ս է դա ստացվել։ Միանգամից հերքենք մտքով անցած առաջին վարկածը՝ ո՛չ, Սաշայի երակներում ոչ մի կաթիլ հայկական արյուն չի հոսում, ու միանգամից հրաժարվենք երկրորդ վարկածից՝ ո՛չ, Սաշան ամուսնացած չէ հայուհու հետ։

Александр Листенгорт
© Photo : AGEYKINA / provided by Alexanmder Listengort
Ալեքսանդր Լիստենգորտ

«2010 թվականին ընդունվեցի Մոսկվայի պետական լեզվաբանական համալսարան, որտեղ պետք է օտար լեզու ընտրեինք։ Չորս տարի հայերեն ուսումնասիրեցի, իսպաներեն էլ սովորեցի։ Հայերենը միանգամից դյութեց ինձ իր տառերով, հնչողությամբ, արմատներով։ Ես իմ ուսուցչի՝ Ռուզաննա Հակոբովնայի հետ առանձին էի պարապում, ազատ ժամանակ Թումանյան, Սայաթ-Նովա էի կարդում, Վահան Արծրունու, Ռուբեն Հախվերդյանի, Արթուր Մեսչյանի երգերն էի լսում․․ Հիմա էլ հայ ռեփերների եմ լսում՝ Մոս, Մեծ Հայք, Հայկո․․․», - ասում է Լիստենգորտը։ 

«Էնպես կխաղամ, դեռ կտեսնես…»․ անկրկնելի Գայլա Նովենցի կյանքի ու դերերի մասին

Որքան ավելի էր մեր հերոսը խորանում հայերենի ուսումնասիրության մեջ, այնքան ավելի էր համոզվում, որ հայերենը սուրբ ու հոգևոր լեզու է։ Հանգամանքների բերումով, 2014 թվականին համալսարանն ավարտելուց հետո նրան հրավիրեցին պրակտիկան անցկացնելու Ռուսաստանում Հայաստանի դեսպանատանը։ Նա երեք ամիս աշխատեց դեսպանատան մամուլի ծառայությունում։

Александр Листенгорт
© Photo : provided by Alexanmder Listengort
Ալեքսանդր Լիստենգորտ

«Հետաքրքիր էր, որ ինձ` ոչ հայիս ու ՌԴ քաղաքացուս, հրավիրեցին Հայաստանի դեսպանատուն։ Նույն տարվա մեջ Հայաստան եկա՝ հանգստանալու ու ճանապարհորդելու։ Այցելեցի գեղեցիկ վայրեր, մայիսյան տոներին (Շուշիի ազատագրման օրը,-խմբ․) շրջեցի Արցախում, տեսա Ստեփանակերտը, Շուշին, Գանձասարը, մի խոսքով՝ բոլոր տեսարժան վայրերը։ Նույն տարվա ընթացքում որոշ ժամանակ անց Թուրքիա մեկնեցի։ Հասկացա, որ եթե ուզում եմ լավ հասկանալ Հայաստանի պատմությունը, պետք է նաև Թուրքիայի պատմությունը իմանամ», - ասում է Ալեքսանդրը։

Դիմակով հարսնացու, անկոստյում փեսացու, օնլայն հյուրեր. «կորոնավիրուսային» հարսանիքները

Հայերենը Սաշայի սովորած երրորդ օտար լեզուն էր․ նա դպրոցական տարիքից անգլերեն ու գերմաներեն գիտեր։ Հայերենից հետո Լիստենգորտը դեռ համալսարանում իսպաներեն սովորեց, հետո արդեն գործն ինքն իրեն առաջ գնաց` սովորեց եբրայերեն, թուրքերեն, ֆրանսերեն ու արաբերեն։ Նշում է, որ լինելով հրեա, հայերենը եբրայերենից շուտ է սովորել, բայց միանգամից բացատրում է՝ ինչու։

«Եբրայերենը Իսրայելի, ոչ թե հրեաների լեզուն է։ Հայերի մոտ ինչպե՞ս է` հայն աշխարհի ցանկացած ծայրում հայերեն է խոսում։ Հրեաների մոտ մի փոքր այլ է. նրանք խոսում են իրենց ապրած պետության լեզվով։ Սակայն բարդ հայերենն ուսումնասիրելուց հետո ինձ համար շատ ավելի հեշտ էր այլ լեզուներ սովորել, ու ես շատ ուրախ եմ դրա համար։ Փորձում հնարավորինս շատ մարդկանց գրավել իմ լեզուներով», - նշեց Լիստենգորտը։

Александр Листенгорт
© Photo : provided by Alexanmder Listengort
Ալեքսանդր Լիստենգորտը «ծիրանային պատերազմի» ժամանակ

Սաշան փորձում է իր գրքերով «գրավել» մարդկանց։ Կորոնավիրուսի համավարակի ընթացքում նա պարապ չի մնացել ու 3 գիրք է գրել․վերջինը կհրապարակվի տարեվերջին։ Երեք գրքերն ընդհանուր վերնագրով լույս կտեսնեն՝ «Զարթոնքի նոր փուլ»։ Նախորդ գրքերը լույս են տեսել «Վերադարձ աստղերին» ու «Տոնախմբություն երկրի վրա» խորագրերի ներքո։ Լիստենգորտը հոգևոր պրակտիկաներ է ուսումնասիրում ու 14 տարեկանից հետաքրքրվում է տարբեր կրոններով։ Ասում է, որ Հայաստանն իր համար հետաքրքրություն է ներկայացնում նաև այդ համատեքստում։

Ամուսնություն ծերուկի հետ. մի աղջկա սարսափելի պատմություն, որը Ավրորա Մարդիգանյան չդարձավ

«Կարծում եմ, որ միայն հայկական ու վրացական եկեղեցիներն են պահպանել իսկական քրիստոնեական ոգին, մյուս քրիստոնեական եկեղեցիներն այս տարիների ընթացքում բիզնես խարդախությունների վայր են դարձել։ Հայկական ու վրացական եկեղեցիներում զգում ես այն ոգին, որի մասին խոսել է Հիսուսը։ Աստվածաշնչի հայերեն թարգմանությունը շատ մոտ է Թորային։ Բացի այդ, հայկական կրոնը քրիստոնեության ու հեթանոսության հետաքրքիր համադրություն է. միայն Վարդավառն ինչ ասես` արժե։ Գրաբարը սուրբ լեզու է, իսկ ծիրանենուց պատրաստած դուդուկն իսկապես ապաքինող ձայն ունի», - ոգևորված պատմում է Ալեքսանդրը։

Александр Листенгорт
© Photo : provided by Alexanmder Listengort
Ալեքսանդր Լիստենգորտ

Սաշան Հայաստանի ու հայերի հետ կապված բազում նախագծեր է իրականացրել։ Օրինակ, նա ռուսերեն է թարգմանել Ռուբեն Հախվերդյանի երգերը, հրապարակել է ու նույնիսկ նվիրել է գիրքը Հախվերդյանին։ Բացի այդ, նա պատրաստվում է ցույց տալ հայերի ու հրեաների նմանությունը, համադրել Իսրայելում հայկական եկեղեցիներն ու թաղամասերը, Հայաստանում հրեական գերեզմանատների ու սինագոգները։ Այս ամենով հանդերձ, սակայն, Սաշան վստահեցնում է, որ հրեաները հայերի համեմատ մի առավելություն ունեն։ 

Թուրքերը տղային նետել են կամրջից, բայց նա փրկվել է. հայ Մաուգլիի անհավանական պատմությունը

«Հիանում եմ հայ ժողովրդով, բայց նրանք համախմբվածության ու միմյանց հանդեպ սիրո պակաս ունեն։ Հայերն անընդհատ մրցում են միմյանց հետ նույնիսկ Ցեղասպանության հիշատակին միջոցառումներ կազմակերպելու հարցում։ Հրեաների մոտ նման բան չի եղել։ Հայերին որ հարցնում ես՝ ե՞րբ եք Հայաստան վերադառնալու, ասում են՝ երբ լավ լինի։ Իսկ հրեաները անապատ գնացին ու այնպես արեցին, որ այնտեղ լավ լինի», - ժպիտով ասում է Լիստենգորտը։

Սաշան խոստանում է նորից Երևան գալ ու անձամբ հանդիպել Sputnik Արմենիայի հետ` արդեն հրապարակված երրորդ գրքով ու Հայաստանի հանդեպ սերն արտահայտելու նոր միջոցներով։

Վերջում ներկայացնենք ձեզ Ալեքսանդրի գրած հայերեն բանաստեղծություններից մի քանիսը.

Երկնագույն Երազ

Կարմիր, կապույտ, ծիրանագույն.

Գույները հայ անկախության:

Երազ տեսա որ ինքնուրույն

Նորից կլինի Հայաստան։

 

Որ կծաղկեն լիով նորից

Նրա դաշտերը ծաղկևոտ,

Ու կսկսի ապրել սկզբից

Հայ ժողովուրդը իր բախտով։

 

Որ լաջվարդի երկնքի տակ

Մասիս վերջապես կժպտա

Որովհետև կապրի ազատ...

Արդյո°ք երազ դա կմնա..

Հայաստանի գարունը

Շատ ծաղկավետ են ծիրանի դաշտերը,

Շատ սևաթույր են օրիորդի վարսերը,

Այդքան երազկոտ տղաները

Արևոտ մի երկրից հեռացել են:

 

Եվ հիմա, հեռավոր մի երկրից,

Երազում դեպի տուն ձգտելով,

Իրենց եսը հանում են սրտից,

Մշուշում ցրված թափառելով:

 

Քո արևոտ լճերի մեջ

Քո արևոտ լճերի մեջ

Ես մի ծառն եմ սիրով ծաղկող,

Քո բազմագույն դաշտերի մեջ

Ես մի ծաղիկն եմ փայլով բացվող։

 

Քո մեղրահամ հովիտների մեջ

Ես մի կաթն եմ քնքուշ հոսող

Քո մանուշակ երկնքի մեջ

Ամպ եմ լեռներիդ վրա նստող։

 

Քո հիացնող սարերի մեջ

Լիալուսին եմ, ոսկուց դեղնած

Եվ սկիզբ չկա, չկա և վերջ

Կյանքում սիրո մեջ ապրած։

0
թեգերը:
հրեա, հայ
Ըստ թեմայի
50 երկրով շրջագայած ամերիկացին տուն է գնել հայկական գյուղում և ապրում է իր կենդանիների հետ
Արևահաց, արևախաչ, գինի ու կրակ. ինչպես են հայ հեթանոսները նշել Նավասարդը
Երևանում ապրած ու Հայոց ցեղասպանության մասին ֆիլմ նկարած ադրբեջանցին ու 2 հայ եղբայրները