ԵՐԵՎԱՆ, 24 մայիսի – Sputnik. Երեք շաբաթ անհետանալուց հետո ԿԺԴՀ առաջնորդ Կիմ Չեն Ինն առաջին անգամ երևացել է հանրությանը։ Այս տեղեկությունը հայտնում է ՌԻԱ Նովոստին՝ հղում անելով Կորեայի կենտրոնական հեռագրական գործակալությունը։
Նշվում է, որ Կիմ Չեն Ինը վարել է Կորեայի Աշխատավորական կուսակցության Կենտրոնական զինվորական կոմիտեի նիստը, որը նվիրված էր ազգային պաշտպանության խնդիրներին։ Նիստի օրը հայտնի չէ, սակայն նիստից հետո ԿԺԴՀ առաջնորդի ստորագրված փաստաթղթերը թվագրվում են մայիսի 23-ով։
Գործակալությունը հրապարակել է Հյուսիսային Կորեայի առաջնորդի լուսանկարը, որում նա նստած է Կորեայի աշխատավորական կուսակցության դրոշների ֆոնին։
Հարավկորեական լրատվամիջոցները ամբողջ մայիս գրում էին, որ Կիմ Չեն Ինի հետ ինչ-որ բան այն չէ։ Սկզբում նա «անհետացավ» ապրիլի կեսին, իսկ մայիսի 2-ից հանրության առաջ չէր երևում։ Լուրեր էին տարածվել, որ քաղաքական գործիչը մահացել է կամ հիվանդ է։ Ենթադրվում էր, որ Հյուսիսային Կորեայի առաջնորդը չի կարողանում ինքնուրույն շարժվել, նորմալ քայլել կամ «վեգետատիվ վիճակում» է։
Ողջ աշխարհը փորձում է կռահել՝ որտեղ է Հյուսիսային Կորեայի առաջնորդը
Արևմտյան որոշ լրատվամիջոցներ կարծում են, որ Կիմ Չեն Ինի ժամանակավոր անհետանալը կարող է կապված լինել կորոնավիրուսի համաճարակով վարակվելու վախով։ Մինչդեռ Հյուսիսային Կորեայի իշխանության պաշտոնական տվյալների համաձայն՝ երկրում COVID-19-ով վարակման դեպքեր չկան։
