Rice and Roni-ի տուփերը

Հայուհու մատը խառն է, կամ որտեղի՞ց է ծագել Սան Ֆրանցիսկոյի հանրահայտ «ֆաստ ֆուդը»

383
(Թարմացված է 19:04 16.05.2020)
Ամուսինները տուն են վարձել հայուհուց, որը սովորեցրել է բրնձով փլավ եփել։ Նրանք էլ այդ ուտեստին իտալական բարակ վերմիշել են ավելացրել։

ԵՐԵՎԱՆ, 16 մայիսի - Sputnik. Կալիֆոռնիայում դժվար թե գտնես քառասունն անց մեկին, որ չհիշի Rice-a-Roni-ի գովազդը։ Արագ եփվող այդ ուտեստը, որը հայտնվեց 50-ականների կեսին Սան Ֆրանցիսկոյում ու տարածվեց ամբողջ Ամերիկայում, «ծնվել» է իտալական, կանադական ու հայկական մշակույթների խաչմերուկում։ Ամերիկյան KQED ռադիոկայանը ներկայացրել է ուտեստի պատմությունը։

Լուիզան ու Թոմը հանդիպեցին 1944 թվականին Սան Ֆրանցիսկոյում։ Լուիզան եկել էլ Էդմոնտոնից, Թոմն էլ հոր ու եղբայրների հետ աշխատում էր իր ընտանիքի՝ դի Դոմենիկոյի գործարանում, որտեղ իտալական մակարոն էին արտադրում։

Երբ Թոմն ու Լուիզան ամուսնացան, սկսեցին բնակարան փնտրել։ Այն ժամանակ դա հեշտ գործ չէր․ զինվորները սկսել էին վերադառնալ պատերազմից և փորձում էին ինչ–որ կերպ դասավորել իրենց կյանքը։ Շատերն այլ վայրերից էին գալիս` իմանալով, որ Կալիֆոռնիայում աշխատանք գտնելն ավելի հեշտ է։ Այնպես որ, երբ Լուիզան ու Թոմը ոչ թե բնակարան, այլ սենյակ գտան, անկեղծորեն ուրախացան։ Տանտիրուհին հայուհի Փայլածո Կապտանյանն էր։

Ի՞նչ են մտածում օտարերկրացի կանայք հայուհիների մասին

«Թոմը մինչև երեկոյան յոթն աշխատում էր, ու ես երկար ժամանակ մենակ էի լինում, - ասում է Լուիզան, - ընդամենը 18 տարեկան էի, կարգին ճաշ եփել էլ չգիտեի։ Իսկ այդ տարեց հայուհին (այն ժամանակ նա 70 տարեկան էր) մածուն էր պատրաստում, որը մի քանի օր հասունանում էր վառարանի մոտ։ Նույնիսկ չգիտեի, թե դա ինչ է»։

Կապտանյանը Լուիզային սովորեցրեց փախլավա թխել, մի քանի ապուր եփել ու հայկական փլավ պատրաստել, որը նրա գլխավոր ուտեստն էր։ Եթե ձեռքի տակ բրինձ չէր լինում, Թոմի գործարանից վերմիշել էին բերում, որը մանր-մանր կտրատում էին երիտասարդ ամուսիները։

Խոհանոցում անցկացրած երկար երեկոների ընթացքում Կապտանյանը պատմում էր սեփական աչքերով տեսած Հայոց ցեղասպանության մասին, պատմում էր` ինչպես է մահացել ամուսինը, ինչպես է կորցրել, իսկ հետո գտել երկու որդիներին, երրորդին Սիրիայում է լույս աշխարհ բերել։ Բայց դրանից առաջ նա սոված, ծարավ, ինքն էլ` հղի, շաբաթներ շարունակ Թուրքիայից Սիրիա է գնացել հազարավոր այլ երեխաների ու կանանց հետ։

Վերամիավորված ընտանիքը տեղափոխվել է Միացյալ Նահանգներ, որտեղ Կապտանյանը սկսել է դերձակությամբ զբաղվել։ Պատվիրատուներից մեկը եղել է ապագա նախագահ Ֆրանկլին Ռուզվելտը․ հայուհին վարագույր է կարել Ռուզվելտների նյույորքյան տան համար։

...Լուիզան սկսեց Կապտանյանի բաղադրատոմսով փլավ եփել, երբ Թոմի հետ իրենց սեփական տուն տեղափոխվեցին։ Մի անգամ, երբ բոլորով հավաքվել էին սեղանի շուրջը, Թոմի եղբայրը` Վինսենթը, նայեց ափսեին ու ասաց․ «Սա հիանալի տեսք կունենար տուփի մեջ»։

Նրանք սկսեցին այդ բաղադրատոմսը փորձարկել ընտանեկան գործարանի խոհանոցում։ Երեք-չորս տարի անց ի հայտ եկավ արագ պատրաստման բաղադրատոմսը։

Արդեն 50-ականերին Ամերիկայում տարածվում էր ամեն ինչ արագ ու հեշտ ունենալու ձգտումը։ Rice-A-Roni-ն գրեթե պատրաստի վիճակում էր հայտնվում տուփերում, իսկ պատրաստելու համար նույնիսկ եռացրած ջրի կարիք չկար։ Թոմ դի Դոմենիկոն զրույցներից մեկի ժամանակ ասել է, թե ինչպես են որոշել անվանումը։

«Բրինձն ու մակարոնը միասին դառնում են Rice-A-Roni։ Իհարկե մի փոքր անսովոր է, բայց լավ է հիշվում», -ասել է նա։

Շուտով այդ ապրանքի գովազդը հայտնվեց հեռուստացույցների էկրաններին։ Այն տեսել է նաև Թեդ Կապտանյանը՝ Փայլածոյի թոռը։

«Ամեն անգամ, երբ լսում էինք գովազդը, հայրս ասում էր․ «Տատդ է բրնձի բաղադրատոմսը տվել այս մարդկանց։ Այնպես որ ամեն անգամ, երբ այս գովազդը լսում ես, հիշիր նրան»։ Իսկ մենք դժվարությամբ էինք հավատում, որ այսքան տիպիկ ամերիկյան ուտեստում հայկական տարր կա», - ասում է Թեդը։

Լուիզան ու Թոմը տատի բաղադրատոմսը մոտավորապես գիտեն։ Չեն հիշում` նա սունկ կամ ընկույզ ավելացրել է, թե ոչ։ Չի բացառվում, որ այդ բաղադրիչները հետո են ավելացել, երբ փլավը սկսել են եփել դի Դոմենիկոյի ընտանիքում։

Հիմա նրանք այս բաղադրատոմսով են եփում։

7/8 բաժակ երկար բրինձ, 1/8 մանրացրած բարակ վերմիշել, մոտ 50 գրամ կարագ, կես գլուխ սոխ, 60-70 գրամ սունկ, 15-20 գրամ մայրու ընկույզներ։ Արգանակի համար՝ երկուսուկես գդալ ջուր ու հավի արգանակի երկուսուկես խորանարդիկ, կես ճաշի գդալ չորացրած մաղադանոս։

Կարագը տաքացնել մարմանդ կրակի վրա, ավելացնել բրինձն ու վերմիշելը, խառնել այնքան, որ ոսկեգույն դառնան։ Ավելացնել կտրատած սոխը, սունկն ու ընկույզները, շարունակել տապակել մի քանի րոպե։ Ավելացնել արգանակը։ Խառնել, փակել ու 35 րոպե եփել մարմանդ կրակի վրա։ Ոչ մի դեպքում չբացել կափարիչը, թե չէ ջրի մի մասը կգոլորշիանա, ու փլավը փափուկ չի լինի։

Ինչպես հայուհին «նվաճեց» Անտարկտիդան ու իր անունով լիճ ունեցավ

383
թեգերը:
Կին, հայ, ԱՄՆ
Ըստ թեմայի
Մի գաղթականի պատմություն. ինչպես եղեռնից փրկվածներն ամուսնացան Էջմիածնի պատերի տակ
Մանկություն` շաղախված պատերազմով. Հայրենականի 88–ամյա ականատես կնոջ վկայությունները
Լուռ երկխոսություն վերակենդանացման բաժնում․ COVID-19-ով վարակված հայուհու պատմությունը
Ամասիացի Օհանը և մյուսները․ ինչու են թուրք գրողները խոսում Արևմտյան Հայաստանի հայերի մասին
ՀՀ ԱԳՆ

ՄԻԵԴ-ի որոշումն Ադրբեջանի հայատյաց քաղաքականության դեմ կայացրած դատավճիռ է. ՀՀ ԱԳՆ

20
(Թարմացված է 12:18 27.05.2020)
ՀՀ ԱԳՆ–ն վճռական է՝ կանխարգելելու ատելության հողի վրա կատարվող հանցանքները և պաշտպանելու տարածաշրջանում հայ ժողովրդի անվտանգությունը։

ԵՐԵՎԱՆ, 27 մայիսի — Sputnik. ՀՀ արտաքին գործերի նախարարությունն արձագանքել է մայիսի 26–ին ՄԻԵԴ ընդունած «Մակուչյանն ու Մինասյանն ընդդեմ Ադրբեջանի և Հունգարիայի» գործով վճռին, որն առնչվում է Ադրբեջանի կողմից հայ սպա Գուրգեն Մարգարյանին դաժան սպանության ենթարկած Ռամիլ Սաֆարովի ազատ արձակմանը և հերոսացմանը:

Ինչպես տեղեկացնում են ՀՀ ԱԳՆ մամուլի ծառայությունից, հաղորդագրության մեջ նշվում է, որ դատարանն արձանագրեց, որ Ադրբեջանը խախտել է Մարդու իրավունքների եվրոպական կոնվենցիայի 2-րդ (կյանքի իրավունք) և 14-րդ (խտրականության բացառում) հոդվածներով նախատեսված պարտավորությունները:

«Դատավճռում, մասնավորապես, արձանագրվել է. «Դատարանն առանձնապես ցնցված է այն փաստով, որ ի լրումն Ադրբեջան վերադառնալուն պես ազատ արձակմանը՝ Ռամիլ Սաֆարովին շնորհվել են մի շարք արտոնություններ, ինչպիսիք են՝ բանտում անցկացրած ժամանակահատվածի համար աշխատավարձի փոխհատուցում, Բաքվում բնակարանի տրամադրում և ռազմական կոչման բարձրացում, որն իրականացվեց հրապարակային արարողությամբ»»,–ասված է հաղորդագրության մեջ:

ՀՀ արտաքին գերատեսչությունում ընդգծում են, որ դատավճիռը մատնանշել է՝ այդ հոդվածների խախտումը կրել է փոխկապակցված բնույթ, ինչն արձանագրում է, որ Ադրբեջանի բարձրագույն ղեկավարության կողմից ատելության հողի վրա իրականացված դաժան հանցագործության համար դատապարտված Ռամիլ Սաֆարովի անպատժելիությունը և հերոսացումը կատարվել է զոհերի ազգային պատկանելության հիմքով: 

«ՄԻԵԴ-ի այս որոշումն Ադրբեջանի հայատյաց քաղաքականության դեմ կայացրած դատավճիռ է: Այն ոչ միայն ճանաչում է, այլև անընդունելի է որակում Ադրբեջանի կողմից պետական մակարդակով հայերի հանդեպ ատելության հողի վրա գործած հանցագործությունների խրախուսումը»,–ասված է հաղորդագրության մեջ:

ԱԳՆ–ում նշում եմ, որ այս դատավճիռը սահմանում է Ադրբեջանի հանդեպ իրավական պարտավորություն՝ իրականացնելու այնպիսի գործողություններ, որոնցով հնարավոր կլիներ դադարեցնել Մարդու իրավունքների եվրոպական կոնվենցիայի այս խախտումները և հասցեագրել դրանց հետևանքները:

«Հայաստանի Հանրապետությունը ՄԻԵԴ այս վճիռը դիտարկում է որպես պահանջ Ադրբեջանի իշխանություններից վերականգնելու արդարությունը Գուրգեն Մարգարյանի ահասարսուռ սպանության գործում և դադարեցնելու հայերի նկատմամբ ռասիստական քաղաքականությունը: Հայաստանի Հանրապետությունն այս ուղղությամբ հետևողական է լինելու համապատասխան միջազգային ատյաններում»,–ասված է հաղորդագրության մեջ:

Նշվում է, որ դատապարտված մարդասպան Ռամիլ Սաֆարովի՝ Ադրբեջանի նախագահի հրամանագրով ազատ արձակումը և հերոսացումը հերյուրանք և վիրավորանք էին քաղաքակրթական չափանիշների և մարդկային արժանապատվության նկատմամբ: «Այսօր, երբ այս գործողությունները ստացան իրավական գնահատական, մենք առավել քան վճռական ենք՝ կանխարգելելու ատելության հողի վրա կատարվող հանցանքները և պաշտպանելու տարածաշրջանում հայ ժողովրդի անվտանգությունը»,–ասվում է հայտարարության մեջ:

Սաֆարովի հերոսացումն Արցախի ժողովրդի անվտանգության մտահոգությունն ավելի է ուժեղացնում. ԱԳՆ

Հիշեցնենք, որ 2004թ. Բուդապեշտում ՆԱՏՕ շրջանակներում անցկացված «Գործընկերություն հանուն խաղաղության» ծրագրի շրջանակներում դասընթացներին Ադրբեջանի կողմից մասնակցող սպա Ռամիլ Սաֆարովը քնած վիճակում կացնահարել էր հայ սպա Գուրգեն Մարգարյանին և հարձակում գործել հայ սպա Հայկ Մակուչյանի վրա: Հունգարական դատարանի կողմից ցմահ ազատազրկման դատապարտված Ռամիլ Սաֆարովը, Ադրբեջան փոխանցվելուց հետո, որտեղ հանցագործը պետք է կրեր պատժի հետագա ժամկետը, արժանացել է ներման և հերոսացվել:

Մայիսի 26–ին Մարդու իրավունքների եվրոպական դատարանը Գուրգեն Մարգարյանի սպանության գործով բավական խիստ գնահատական է տվել Ադրբեջանին՝ կոնվենցիայի երկու հոդվածով խախտում արձանագրելով:

20
թեգերը:
Գուրգեն Մարգարյան, Ռամիլ Սաֆարով, ՀՀ Արտաքին գործերի նախարարություն. ԱԳՆ, Մարդու Իրավունքների Եվրոպական դատարան (ՄԻԵԴ)
Ըստ թեմայի
Արցախում ադրբեջանցիները դիվերսիոն ներթափանցման փորձ են արել
Ադրբեջանական կրակոցներից տուժած ընտանիքը նվերներ ստացավ Արմեն Սարգսյանից. տեսանյութ
«Ադրբեջանը շարունակում է հրադադարի խախտման փորձերը». Միրզոյանը զրուցել է Ծերեթելիի հետ
Դոնալդ Թրամփի ելույթը

ԱՄՆ-ում COVID-19-ից ավելի քան 100 հազար մարդ է մահացել․ նոր տվյալներ ամբողջ աշխարհից

44
Միացյալ Նահանգները, Բրազիլիան ու Ռուսաստանը շարունակում են առաջատար դիրքեր զբաղեցնել կորոնավիրուսի տարածման տեմպերով։

ԵՐԵՎԱՆ, 27 մայիսի — Sputnik. Աշխարհում կորոնավիրուսով հիվանդացության բացահայտված դեպքերի ընդհանուր  թիվը գերազանցել է 5.6 մլն–ը: Տեղեկությունը հայտնում է Worldometer համաշխարհային վիճակագրության կայքը։

Աղբյուրի համաձայն` մայիսի 27-ի դրությամբ, աշխարհում COVID-19–ի հաստատված 5 685 938 դեպք կա։ Համավարակի զոհ է դարձել 352 227 մարդ։

Վարակի տարածման ցուցանիշներով առաջին եռյակում են ԱՄՆ-ն, Բրազիլիան ու Ռուսաստանը։

ԱՄՆ–ում կորոնավիրուս է ախտորոշվել 1 725 275 մարդու մոտ։ Մահացել է 100 572 վարակված անձ։

Երկրորդ տեղում Բրազիլիան է։ Այստեղ վարակը հաստատվել է 394 507 մարդու մոտ, մահվան ելքերը 24 593–ն են։

Համավարակի տարածման ցուցանիշներով երրորդ հորիզոնականում է Ռուսաստանը։ Կայքի համաձայն` ՌԴ-ում բացահայտված դեպքերը 362 342 –ն են, մահացել են 3 807-ը։

Տարածման ցուցանիշներով առաջին տասնյակում են նաև Իսպանիան, Մեծ Բրիտանիան, Իտալիան, Ֆրանսիան, Գերմանիան, Թուրքիան և Հնդկաստանը։

Չինաստանը, որտեղ առաջինն էր գրանցվել կորոնավիրուսի բռնկումը, 14-րդ տեղում է։  Այս պահի դրությամբ ՉԺՀ-ում բացահայտված դեպքերի թիվը 82 993 է, մահվան ելքերինը՝ 4634։

COVID 19-ով հիվանդներից 250-ը գտնվում են ծանր վիճակում. նախարարը նոր տվյալներ է հրապարակել

Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։

44
թեգերը:
վարակ, աշխարհ, Բրազիլիա, Ռուսաստան, Չինաստան, համավարակ, ԱՄՆ, կորոնավիրուս
թեմա:
Կորոնավիրուսը Չինաստանում և աշխարհում
Ըստ թեմայի
«Այդ ընթացքում կհասցնեմ առողջանալ». կորոնավիրուսի կասկածներ ունեցող Մարիամի պատմությունը
Որն է «խոզի գրիպի» ու կորոնավիրուսի տարբերությունը
«Միակ ելքը կանխարգելիչ միջոցներն են». կորոնավիրուսի դեմ պայքարող բժիշկի խորհուրդները
 ՀՀ էկոնոմիկայի նախարար Տիգրան Խաչատրյան. արխիվային լուսանկար

Կառավարությունը հաստատեց կորոնավիրուսի տնտեսական հետևանքների չեզոքացման 19-րդ միջոցառումը

0
Կառավարությունն արտոնյալ վարկեր կտրամադրի տնտեսության զարգացման նորարարական ծրագրեր ներկայացնող գործարարներին:

ԵՐԵՎԱՆ, 27 մայիսի – Sputnik. ՀՀ կառավարության այսօրվա նիստում գործադիրը հաստատեց կորոնավիրուսի տնտեսական հետևանքների չեզոքացման 19-րդ միջոցառումը:

Ինչպես հարցի ներկայացման ժամանակ հայտնեց ՀՀ էկոնոմիկայի նախարար Տիգրան Խաչատրյանը, այս միջոցառման նպատակն է օժանդակել ՀՀ քաղաքացիներին և առանձին տնտեսավարողներին իրագործելու մրցունակ գործարար ծրագրեր:

«Օժանդակության նպատակն է ձեռնարկատիրական գիտելիքների ընդլայնման և ֆինանսների հասանելիության բարձրացման միջոցով նպաստել շահառուների գործարար ծրագրերի նորարարական զարգացմանը, իսկ «զրոյից» բիզնես ստեղծելու ձգտում ունեցող շահառուներին՝ ձեռնարկատիրական գաղափարների իրագործմանը»,- ասաց Խաչատրյանը:

Միջոցառման շահառու կարող են դառնալ ՀՀ-ում գրանցված կազմակերպությունները կամ անհատ ձեռնարկատերերը, բացառությամբ մանրածախ և մեծածախ ոլորտում գործունեություն ծավալողների: Շահառուները պետք է նախորդ մեկ տարվա ընթացքում ունեցած լինեն բարվոք հարկային և վարկային պատմություն, գործունեությունն առավելապես իրականացրած լինեն ՀՀ մարզերում և չհանդիսանան «Ներդրումների աջակցման կենտրոն» հիմնադրամի շահառու:

Կառավարության կողմից տրամադրվող արտոնյալ վարկի 75%-ը տնտեսվարողներին կհատկացվի 8 տարվա մարման ժամկետով, անտոկոս, 25% ը՝ որպես դրամաշնորհ։

Վարկի մայր գումարի արտոնյալ ժամանակահատվածը կարող է կազմել առավելագույնը 6 ամիս` սկսնակ շահառուների համար. մեկ շահառուի վարկի առավելագույն չափը սահմանվում է 10 մլն դրամ սկսնակների համար, իսկ նորարարական զարգացման շահառուների համար՝ 20 մլն դրամ:

Վարկի տարեկան տոկոսադրույքը կկազմի 7- 10%:

Հիշեցնենք՝ կորոնավիրուսի համավարակով ու Հայաստանում մարտի 16-ից գործող արտակարգ դրության պատճառով առաջացած սոցիալ-տնտեսական ճգնաժամն ու դրա հետևանքները վեացնելու համար ՀՀ կառավարությունն առ այսօր 18 միջոցառում է հաստատել, որոնք նախատեսված են սոցիալական տարբեր խմբերի ու տնտեսական գործունեության տարբեր ոլորտներում աշխատող սուբյեկտների համար:

0