ԵՐԵՎԱՆ, 5 մայիսի – Sputnik․ Աշխարհում COVID-19-ով վարակման հայտնաբերված դեպքերի թիվն անցել է 3,6 միլիոնի սահմանը։ Տեղեկությունը հայտնում է համաշխարհային վիճակագրության Worldometers կայքը։
Մայիսի 5-ի առավոտյան տվյալներով` մոլորակում կորոնավիրուսով վարակման հաստատված դեպքերի թիվը կազմում է 3 646 304․ Համավարակի զոհ է դարձել 252 425 մարդ։ Հիվանդության տարածման ցուցանիշով առաջատարների եռյակում շարունակում են մնալ ԱՄՆ-ը, Իսպանիան և Իտալիան։
ԱՄՆ-ում COVID-19 ախտորոշվել է 1 212 900 մարդու մոտ։ Կորոնավիրուսի բարդությունների պատճառով մահերի թիվն այս երկրում կազմում է 69 921։
Երկրորդ տեղում Իսպանիան է։ Այստեղ կորոնավիրուս է հայտնաբերվել 248 301 մարդու մոտ։ Ըստ վերջին տվյալների՝ 25 428 պացիենտ մահացել է։
«Հակառեյթինգի» եռյակը եզրափակում է Իտալիան։ Այստեղ վարակման հաստատված դեպքերը 211 938-ն են, մահացել է 29 079 մարդ։
Իսկ ահա Չինաստանը, որտեղ առաջինն էր արձանագրվել կորոնավիրուսի բռնկումը, իջել է 11-րդ հորիզոնական։ Այստեղ կորոնավիրուս ախտորոշված է 82 881 մարդու մոտ, մահվան ելքով դեպքերի թիվը կազմում է 4 633։
Արդյո՞ք տղամարդիկ ավելի հաճախ են մահանում COVID-ից․ չինացի գիտնականների պատասխանը
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
