ԵՐԵՎԱՆ, 22 ապրիլի – Sputnik․ Ինքնամեկուսացման պայմաններում ուտելիքն անընդհատ «ձգում է» մարդուն, քանի որ սառնարանը ձեռքի տակ է։ Այդ պատճառով պետք է ամենօրյա սննդակարգի կալորիականությունը նվազեցնել 30%-ով։ стопкоронавирус.рф կայքին տված հարցազրույցում հայտարարել է ՌԴ Առողջապահության նախարարության արտահաստիքային մասնագետ, կարդիոլոգ, բժշկական գիտությունների դոկտոր Սերգեյ Բոյցովը։
«Մեկուսացման ժամանակ մարդկանց ֆիզիկական ծանրաբեռնվածությունը նվազում է, որը բերում է մարմնի քաշի ավելացման։ Այդ պատճառով էլ անգամ փոքրիկ բնակարանում հարկավոր է ֆիզիկական վարժություններ, մարմնամարզություն անել»,-խորհուրդ է տվել փորձագետը։
Ընդ որում՝ սենյակները մշտապես պետք է օդափոխել, քանի որ մաքուր օդը նվազեցնում է վարակման վտանգը։
Բոյցովն ընդգծել է, որ սրտանոթային հիվանդություններ ունեցող մարդիկ ոչ մի դեպքում չպետք է ընդհատեն բժիշկների նշանակած թերապիան։
Հայտնի է ամենահզոր բնական ախտահանող միջոցը
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ։ Կազմակերպությունը պետություններին կոչ է արել միանալ վարակի դեմ ակտիվ պայքարին։ Շատ երկրներում, այդ թվում և Հայաստանում, արտակարգ դրություն է հայտարարված, սահմանված են խիստ կարանտինային նորմեր, քաղաքացիների մեծ մասը ինքնամեկուսացած են տանը։
