ԵՐԵՎԱՆ, 2 մարտի — Sputnik. Չինաստանի առողջապահության պետական կոմիտեի տվյալներով` երկրում COVID-2019 տեսակի կորոնավիրուսի զոհերի թիվը հասել է 2912–ի։
Կորոնավիրուսով վարակվելու մոտ 80 հազար դեպք է գրանցվել, այս պահի դրությամբ 44,4 հազարը դուրս են գրվել հիվանդանոցներից։
Առողջապահության համաշխարհային կազմակերպությունը հայտնել է, որ աշխարհում COVID-2019 կորոնավիրուսի տարածման վտանգը դեռ չի նվազում։
Հիշեցնենք՝ Հայաստանում կորոնավիրուսով վարակվելու առաջին դեպքի մասին հայտնի դարձավ մարտի 1-ի վաղ առավոտյան. վարակվածը 29-ամյա մի տղամարդ է: Նա Իրանից Հայաստան է ժամանել փետրվարի 28-ին:
Դրանից հետո ՀՀ վարչապետ Նիկոլ Փաշինյանն ու ՀՀ առողջապահության նախարար Արսեն Թորոսյանը հայտնեցին, որ 32 մարդ մեկուսացվել են Ծաղկաձորի «Գոլդեն փելես» հյուրանոցում։ Նրանք բոլորը կորոնավիրուսով վարակված տղամարդու հետ ինքնաթիռում շփված քաղաքացիներ են: Ինքնաթիռի մյուս ուղևորների նկատմամբ սահմանվել է 14-օրյա տնային հսկողություն. նրանց հորդորել են տնից դուրս չգալ։ Առողջապահության նախարարությունում թեժ գիծ է գործում։
Հայաստանում չեղարկել են զանգվածային միջոցառումները, իսկ ուսումնական հաստատություններում արձակուրդ է հայտարարվել։
Հիշեցնենք` Չինաստանի իշխանությունը Ուհան քաղաքում անհայտ ծագման թոքաբորբի բռնկման մասին Առողջապահության համաշխարհային կազմակերպությանը (ԱՀԿ) տեղեկացրել էր 2019 թվականի դեկտեմբերի 31-ին։ Մասնագետները պարզել են, որ հիվանդության հարուցիչը կորոնավիրուսն է։ ԱՀԿ–ն միջազգային նշանակության արտակարգ իրավիճակ է հայտարարել և հիվանդությանը տվել COVID-2019 պաշտոնական անվանումը։
