ԵՐԵՎԱՆ, 9 ապրիլի — Sputnik. Spice Girls վերամիավորված «աղջկական» խմբի մասնակիցներ Մել Բին և Ջերի Հոլիվելը, վիճել են հին պատմության պատճառով` վտանգելով համաշխարհային շրջագայությունը։ Այս մասին հայտնում է Daily Mail–ը։
Խմբի անդամները մտադիր էին հունիսի 15-ին Մեծ Բրիտանիայի շրջագայությունն ավարտելուց հետո համերգների շարք ունենալ ԱՄՆ–ում ու Ավստրալիայում։ Սակայն սկանդալի պատճառով հյուրախաղերը կարող են տեղի չունենալ, պնդում է պարբերականի աղբյուրը։
Daily Mail–ը գրում է, որ Մել Բին (Mel B) և Ջերի Հոլիվելը հազիվ են հանդուրժում միմյանց։
Իսկ կոնֆլիկտը սկսվել է այն բանից հետո, երբ հարցազրույցներից մեկում Մել Բին խոստովանել է, որ մի անգամ նա իր խմբի աղջիկներից մեկի հետ սեռական հարաբերություն է ունեցել։
Ավելի ուշ Հոլիվելը հայտարարել է, որ իրենց միջև որևէ լուրջ բան չի եղել։
«Ընդամենը մի բան էր, որ մի գիշեր է տեղի ունեցել», – ասել է նա։
Միևնույն ժամանակ Daily Mail–ի աղբյուրները պնդում են, որ աղջիկները լուրջ հարաբերություններ են ունեցել և մեկ տարի հանդիպել են։ Մել Բիին վիրավորել է նախկին սիրուհու արձագանքը, որը փորձել է նրան սուտասան ներկայացնել, ինչպես նաև ջնջել «իրենց համատեղ պատմությունը»։
Ի պատասխան շրջագայության չեղարկման մասին նորությանը` Spice Girls–ի ներկայացուցիչն ասել է, որ այդ «տեղեկությունը հստակ չէ»։ Նա չի մեկնաբանել խմբի ներսում ծագած լարվածության մասին լուրերը։
2018 թվականի ամռանը հայտնի էր դարձել, որ Mel B–ն որոշել է վերականգնողական կենտրոն այցելել` ոգելից խմիչքներից ունեցած կախվածությունն ու սեքս–կախվածությունը բուժելու համար։ Երգչուհին նաև խոստովանել էր, որ պայքարում է հետվնասվածքային սթրեսային խանգարման դեմ։
Նշենք, որ այժմ Մել Բին հանդիպում է (և արդեն բավական վաղուց) հայտնի ամերիկահայ ոճաբան Գարի Մադաթյանի հետ։
Նրանք սկսել են հանդիպել 2017թ-ի սկզբից, երբ Մել Բին բաժանվել է 42-ամյա Ստեֆան Բելաֆոնտեց։ ԶԼՄ-ների տվյալներով` Գարին ավարտել է Երևանի պետական համալսարանը, Բևերլի Հիլզում գեղեցկության սրահ ունի։
Հայկական թեմատիկայով բազմաթիվ լուսանկարների հրապարակումից հետո Մել Բիի երկրպագուները նրան նույնիսկ «իսկական հայ հարս» են անվանել։ Լուսանկարներից մեկում երգչուհու հագին Արարատի պատկերով շապիկ է, տեսանյութերից մեկում նա երգում է հայտնի երգչուհի Սիրուշոյի երգը։
