ԵՐԵՎԱՆ, 3 սեպտեմբերի — Sputnik. Սիրիայի նախագահ Բաշար Ասադը հաղթել է երկրում ընթացող քաղաքացիական հակամարտությունում։ Այս մասին հայտարարել է Ֆրանսիայի արտգործնախարար Ժան Իվ Լը Դրիանը, հաղորդում է Sputnik International-ը։ Նրա համոզմամբ` Ասադը հաղթել է պատերազմում, և «մենք պետք է ընդունենք դա»։
Միաժամանակ նա նշել է, որ Սիրիայի նախագահը պատերազմում հասել է հաղթանակի, բայց ոչ խաղաղության։ Նախարարի կարծիքով` դրա համար Դամասկոսին «քաղաքական լուծում է պետք միջազգային միջնորդների մասնակցությամբ»։
Լը Դրիանը նշել է, որ Դամասկոսը վճռական է եղել Իդլիբ նահանգն ահաբեկիչներից ազատագրելու հարցում։ Սակայն նույնիսկ եթե կառավարական զորքերին հաջողվի իրենց վերահսկողության տակ վերցնել շրջանը, դա չի լուծի հակամարտության հետևանքով առաջացած խնդիրները, կարծում է նախարարը։
Գերատեսչության ղեկավարն ավելացրել է, որ Ֆրանսիան կնպաստի Սիրիայում հակամարտության խաղաղ լուծմանը ՄԱԿ-ի Գլխավոր վեհաժողովում քննարկումների շրջանակում։
Լը Դրիանը նաև նշել է, որ արևմտյան կոալիցիան պատրաստ է հարվածներ հասցնել արաբական հանրապետությանը, եթե կառավարական զորքը քիմիական զենք կիրառի Իդլիբի խաղաղ բնակչության դեմ։
Սիրիայի հյուսիսում գտնվող Իդլիբ նահանգը միակ շրջանն է, որը վերահսկում են զինված խմբավորումները։ Ավելի վաղ այնտեղ ստեղծվել է հակամարտության լարվածությունը թուլացնելու գոտի։
Վերջին շրջանում իրադրությունն այդ տարածաշրջանում ավելի լարված է։ Ինչպես նախկինում հաղորդել է Ռուսաստանի պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը, անկախ աղբյուրների տվյալներով` «Հայաթ Տահրիր Աշ Շամ» խմբավորման ահաբեկիչները ծրագրում են սադրանք, որպեսզի Բաշար Ասադի զորքերին մեղադրեն Իդլիբ նահանգի խաղաղ բնակչության դեմ քիմիական զենք կիրառելու մեջ։ Դա անհրաժեշտ է, որպեսզի հետագայում արդարացնեն դրսից ուղղված ուժային հարվածները։
