ԵՐԵՎԱՆ, 25 օգոստոսի — Sputnik. Հանրահայտ գեղասահորդուհի Եվգենյա Մեդվեդևան հիանալի մարզչի մոտ է տեղափոխվել, բայց արդեն մեկ տարի հետո նա դժվարությամբ կմրցակցի հայրենակիցների հետ կանանց մենասահքում։ Ռուսական ԶԼՄ-ները հայտնում են, որ լրագրողների հետ զրույցում այս կարծիքն է հայտնել օլիմպիական կրկնակի չեմպիոն Եվգենի Պլյուշչենկոն։
Փհենչհանի խաղերի արծաթե մեդալակիր, Աշխարհի կրկնակի չեմպիոն Մեդվեդևա-Բաբասյանը վերջերս լքել էր նախկին մարզիչ Էթերի Տուտբերիձեին և տեղափոխվել Բրայան Օրսերի մոտ (Կանադա)։
Պլյուշչենկոն կարծում է, որ Մեդվեդևան առայժմ շատ լավ արդյունք ցույց կտա, սակայն հաջորդ տարի նրա համար արդեն շատ դժվար կլինի, քանի որ Ռուսաստանի հավաքականում շատ ուժեղ աղջիկներ են հասունանում։
«Նրանք 14 տարեկանում 3-4 քառակի թռիչք են կատարում։ Մարզիկներիս հետ Նովոսիբիրսկում եմ եղել, սահադաշտում, և տեսել եմ, թե ինչպես են նրանք սահում։ Կարծում եմ, որ Ժենյան կշարունակի մարզվել և շատ լավ արդյունք ցույց կտա, սակայն հաջորդ տարի նրա համար դժվար կլինի», — ասել է Պլյուշչենկոն։
Հիշեցնենք, որ Փհենչհանի օլիմպիական խաղերում Մեդվեդևան երկու անգամ արծաթե մեդալ նվաճեց` մենասահքում ոսկին զիջելով մեկ այլ ռուս գեղասահորդուհու` Ալինա Զագիտովային։
Նա նաև Աշխարհի կրկնակի չեմպիոն է։ Մեդվեդևան այժմ Տորոնտոյում է, մարզվում է Բրայան Օրսերի մոտ և պատրաստվում մրցումներին։ Օլիմպիական խաղերի արծաթե մեդալակիրն ավելի վաղ լքել էր Էթերի Տուտբերիձեին, որի մոտ մարզվել էլ 11 տարի։
