ԵՐԵՎԱՆ, 4 հունիսի — Sputnik. Ոճաբան Հարի Մադաթյանի սիրեցյալը` բրիտանացի երգչուհի, կոմպոզիտոր, հաղորդավարուհի Մել Բին «իսկական հայուհի է» դարձել` նա գուշակություն արել սուրճի մրուրով։
Spice Girl խմբի երկրպագուները նրան իսկական հայ հարս են անվանել` հայկական թեմայով մի շարք լուսանկարներից հետո. աղջկան տեսել են Արարատի պատկերով շապիկ հագած, իսկ տեսանյութերից մեկում նա կատարում է հայտնի երգչուհի Սիրուշոյի երգը։
Նոր լուսանկարում Մել Բին պատկերված է, հավանաբար, Սուսաննա անունով հայուհու ընկերակցությամբ և զարմացած նայում է սուրճի բաժակին։
«Հիանալի երեկույթից հետո ժամանակն է ճակատագրիս մասին տեղեկանալ սուրճի մրուրով։ Շնորհակալություն, Սուս», – լուսանկարի տակ գրել է Մել Բին։
Երգչուհու երկրպագուները լուսանկարի տակ հիացական մեկնաբանություններ են գրել և հաճոյախոսություններ շռայլել նրա հասցեին։
«Աստված իմ, հիմա դու հաստատ իսկական հայուհի ես», – գրել է bocaxoari–ն։
90-ականների երիտասարդների կուռքը նաև հրավեր է ստացել այցելելու իր սիրելիի` Մադաթյանի հայրենիքը։
Հիշեցնենք, որ երգչուհին ռոմանտիկ հարաբերությունների մեջ է Բևերլի Հիլզում գտնվող գեղեցկության սրահներից մեկի սեփականատիրոջ, ազգությամբ հայ Հարի Մադաթյանի հետ։
Մել Բին երեք դուստր է դաստիարակում` 18-ամյա Ֆենիքսին, որին լույս աշխարհ է բերել առաջին ամուսնուց` պարող Ջիմի Գալզարից, 10-ամյա Էնջելին` դերասան Էդդի Մերֆիից և 6-ամյա Մեդիսոնին` Ստեֆանից։
ԶԼՄ–ների տվյալներով` Հարին ԵՊՀ–ի շրջանավարտ է։