ԵՐԵՎԱՆ, 25 մայիսի — Sputnik. Ռուսաստանցի պրանկերներ Վլադիմիր Կուզնեցովը (Վովան) և Ալեքսեյ Ստոլյարովը Մեծ Բրիտանիայի արտգործնախարար Բորիս Ջոնսոնի հետ խոսակցությունն իսկական շոուի են վերածել։ Նրանցից մեկը հանդես է եկել ՀՀ վարչապետ Նիկոլ Փաշինյանի «դերում», մյուսը` վարչապետի թարգմանչի։ Այս մասին Կուզնեցովը խոսել է ՌԻԱ Նովոստիի հետ հարցազրույցում։
Կուզնեցովը նշել է, որ զրույցի ընթացքում Ջոնսոնը դիվանագիտորեն է վարվել, հավանաբար չիմանալով` ինչպես իրեն պահի Հայաստանի կառավարության ղեկավարի հետ, որին նա չի ճանաչում։ Նա 20 րոպե խոսել է պրանկերների հետ ու քննարկել Սկրիպալների գործը, Սիրիայի թեման, նաև Իրանի «միջուկային գործարքից» ԱՄՆ-ի դուրս գալու որոշումը։
Պրանկերը խոստովանել է, որ վերջում խոսակցությունը շոուի է վերածել, քանի որ «բրիտանացիները փորձում են ամեն ինչի մեջ Ռուսաստանի միջամտությունը տեսնել»։
Նրանք Մեծ Բրիտանիայի արտգործնախարարին ասել են, թե իբր Քսենյա Սոբչակը Լոնդոն է մեկնել ու Վլադիմիր Պուտինից գումար է բերել լեյբորիստներին։ Ջոնսոնն այդ տեղեկությունը լուրջ է ընդունել` ասելով, որ հատուկ ծառայություններին կփոխանցի։
«Այդ ամենը շապիտոյի վերածելու համար մենք նրան ասացինք, որ Ուկրաինայի նախագահ Պորոշենկոյին Լեհաստանում նույնպես թունավորել են, բայց նա հատուկ հակաթույն ունի, որը «Հակախումար» է կոչվում։ Ջոնսոնը մի քանի անգամ կրկնեց այդ բառը, հասկացավ, որ մի բան այն չէ ու լռեց», — պատմել է Կուզնեցովը։
Պրանկերը հայտնել է, որ Ջոնսոնի հետ կարողացել են կապ հաստատել նրա տեղակալ Ալան Դունկանի միջոցով։
«Սկզբում կապ հաստատեցինք Ջոնսոնի տեղակալ սըր Ալան Դունկանի հետ, խնդրեցինք Բորիսի հետ զրույց կազմակերպել, մի քանի օր անց այդ խոսակցությունը կայացավ», — պարզաբանել է Կուզնեցովը։
Նա հավելել է, որ խոսակցության համար լավ առիթ կար. Հայաստանում նոր վարչապետ էր ընտրվել, ու Մեծ Բրիտանիայի արտգործնախարարը նրան դեռ չէր ճանաչում։
Հիշեցնենք` երեկ պրանկերներ Լեքսուսն ու Վովանը հրապարակել էին Բրիտանիայի արտգործնախարար Բորիս Ջոնսոնի հետ 18 րոպեանոց հեռախոսազրույցի ձայնագրությունը։ Նրանցից մեկը հայտնել էր, որ ինքը ՀՀ վարչապետ Նիկոլ Փաշինյանն է։ Պաշտոնական Լոնդոնը Բրիտանիայի արտգործնախարար Բորիս Ջոնսոնի կատակի վերաբերյալ հայտարարություն էր տարածել։
«ԱԳՆ-ում հասկացան, որ դա խաբեություն է, հեռախոսն անջատեցին», — The Guardian-ը մեջբերում է արտգործնախարարության հայտարարությունը։
«Մենք ստուգել ենք և անմիջապես հասկացել, որ դա պրանկ է եղել։ Սոլսբերիում և Սիրիայում քիմիական զենքի օգտագործումը, Հայաստանի տեղի ունեցած վերջին իրադարձությունները լուրջ թեմաներ են։ Այդ երեխայությունը ցույց է տալիս զանգողի և նրա հետևում կանգնածների լրջության պակասը», — նշվում է գերատեսչության հաղորդագրությունում։
