Կիրիլ Վիշինսկի

Դատարանը երկու ամսով կալանավորեց ՌԻԱ Նովոստի–Ուկրաինա կայքի ղեկավարին

49
(Թարմացված է 21:45 17.05.2018)
Կիրիլ Վիշինսկուն մեղադրում են պետական դավաճանության մեջ։ Նրան մինչև 15 տարվա ազատազրկում է սպառնում։

ԵՐԵՎԱՆ, 17 մայիսի — Sputnik. Խերսոնի դատարանը 60 օրով կալանավորել է ՌԻԱ Նովոստի-Ուկրաինա կայքի ղեկավար Կիրիլ Վիշինսկուն։ Այդ մասին հաղորդում է ՌԻԱ Նովոստին՝ հղում անելով փաստաբան Անդրեյ Դոմանսկուն։

Ավելի վաղ Վիշինսկին ելույթ էր ունեցել Խերսոնի շրջանի դատարանի առջև։

Վիշինսկին իր դեմ հարուցված գործն անվանում է «ճնշում խոսքի ազատության վրա»։ Նա նաև խոստովանել է, որ ունի երկու անձնագիր՝ ռուսական և ուկրաինական։

Ուկրաինայի ազգային անվտանգության աշխատակիցները մայիսի 15-ին ներխուժել են գրասենյակ, որտեղ աշխատում են ՌԻԱ Նովոստիի թղթակիցները։ Նրանք ութ ժամ խուզարկել են տարածքը։ Երեքշաբթի Կիևում ձերբակալվել է ՌԻԱ Նովոստի Ուկրաինա կայքի ղեկավար Վիշինսկին։ Նրան կասկածում են Դոնբասի ինքնահռչակ հանրապետություններին աջակցելու և պետական դավաճանության մեջ։

ՈՒԱԾ-ն նաև խուզարկություն է անցկացրել ՌԻԱ Նովոստի-Ուկրաինայի թղթակից Լյուդմիլա Լիսենկոյի բնակարանում։ Բացի այդ, խուզարկել են Ուկրաինայում ՌԻԱ Նովոստիի ներկայացուցչության ղեկավար Անդրեյ Բորոդինի բնակարանը։ Լիսենկոյին և Բորոդինին հարցաքննության են կանչել։

«Ռոսիա սեգոդնյա» ՄՏԳ-ի գլխավոր տնօրեն Դմիտրի Կիսելյովը հայտարարել է, որ ուկրաինական իշխանությունները պետք է անհապաղ ազատ արձակեն Վիշինսկուն և դադարեցնեն ԶԼՄ-ի հետապնդումը։ «Ռոսիա սեգոդնյա» ՄՏԳ-ի և RT հեռուստաալիքի գլխավոր խմբագիր Մարգարիտա Սիմոնյանը կարծում է, որ տեղի ունեցածը Կիևի վրեժն է Ղրիմի կամրջի համար։

Ռուսաստանի ԱԳՆ-ում ՌԻԱ Նովոստի-Ուկրաինայի նկատմամբ գործողություններն անվանել են կամայականություն։ Ինչպես հայտարարել է Ռուսաստանի ԱԳՆ ղեկավար Սերգեյ Լավրովը, Կիևի գործողություններն անընդունելի են։ ՌԴ դեսպանատունը բողոքի նոտա է հղել Ուկրաինայի ԱԳՆ՝ պահանջելով դադարեցնել բռնությունը ԶԼՄ-ների ներկայացուցիչների նկատմամբ։ ՌԴ նախագահի մամուլի քարտուղար Դմիտրի Պեսկովը հաղորդել է, որ Կրեմլում ակնկալում են միջազգային կազմակերպությունների կոշտ արձագանքը ՈՒԱԾ-ի գործողությունների վերաբերյալ։

49