ԵՐԵՎԱՆ, 17 մայիսի — Sputnik. Հայտնի ռուս երգիչ Ֆիլիպ Կիրկորովը շվեդական հեռուստաալիքի հետ հարցազրույցում հայհոյել է մարդկանց, որոնք կադրից դուրս աղմկում էին ու խանգարում նրան հարցերին պատասխանել։ Այս մասին հայտնում է ՌԻԱ Նովոստին։
Կիրկորովը, որն այս տարի «Եվրատեսիլ» էր բերել մոլդովական DoReDoS խմբին, պատմում էր միջազգային երգի մրցույթում իր մասնակցության մասին, երբ կողքի սենյակից եկող աղմուկը ընդհատեց ռուսական էստրադայի «թագավորին»։
Երգիչը լրագրողից ներողություն խնդրեց, որից հետո կողքի սենյակ գնաց ` խանգարող մարդկանց նկատողություն անելու համար։ Նա սկսեց հայհոյել այնտեղ գտնվողներին։
«Կներեք, սա ի՞նչ աղմուկ է։ Կարելի է այստեղ ձայներ չհանե՞լ կամ գնալ հեռու։ Չե՞ք հասկանում, որ այս ամենը լսվում է։ Կարելի՞ է։ Շնորհակալություն», – պահանջել է նա ու շարունակել հարցազրույցը։
Սկանդալային հարցազրույցը տեղի էր ունեցել Լիսաբոնում, որտեղ ավելի վաղ կայացել էր «Եվրատեսիլի» եզրափակիչը։ Ի դեպ` հարցազրույցը հենց այդ տեսքով է եթեր գնացել։
Հիշեցնենք` «Եվրատեսիլ 2018» մրցույթի հայ ներկայացուցիչը մրցույթի եզրափակիչ փուլ չանցավ։ Շոուի հաղթող դարձավ իսրայելցի Նետան` Toy երգով։
