ԵՐԵՎԱՆ, 27 մարտի — Sputnik. Նիդեռլանդների խորհրդարանի ներկայացուցիչների պալատն այսօր Հայոց ցեղասպանության ճանաչման հռչակագիր է ընդունել։
Հոլանդահայ կազմակերպությունների ֆեդերացիայի նախագահ Մաթո Հախվերդյանը հայտնել է, որ որոշումն ընդունվել է ձայների բացարձակ մեծամասնությամբ։
«Դեմ է քվեարկել միայն փոքրաթիվ խմբակցություններից մեկը, որի երեք անդամներն էլ ազգությամբ թուրք են: Բանաձևերն ընդունվեցին 142 կողմ ձայներով»,- ասել է Հախվերդյանը:
Հայոց ցեղասպանությանը վերաբերող երկու բանաձևերը խորհրդարանական օրակարգ էր ներկայացրել այդ երկրի կոալիցիոն կառավարության մեջ մտնող «Քրիստոնեական միություն» կուսակցության անդամ Ջոել Ֆորդևինդը։
Առաջին բանաձևով վերահաստատվում է Նիդեռլանդների կողմից 2004 թվականին Հայոց ցեղասպանությունը ճանաչելու մասին որոշումը, երկրորդով` Նիդեռլանդների կառավարությանը պարտադրվելու է հինգ տարին մեկ անգամ ապրիլի 24-ին նախարարի մակարդակով այցելել Հայաստան և հարգանքի տուրք մատուցել Ծիծեռնակաբերդի հուշահամալիրում:
