ԵՐԵՎԱՆ, 20 մարտի — Sputnik. Մեծ Բրիտանիայից արտաքսվող ռուս դիվանագետները մարտի 20-ի առավոտյան լքել են Լոնդոնում Ռուսաստանի դեսպանատունը։ Այս մասին հայտնում է ՌԻԱ Նովոստին։
Դեսպանատան աշխատակիցներն ու նրանց ընտանիքները դիվանագիտության ներկայացուցչության տարածքը լքել են քայլերթի ներքո։
Դիվանագետներն ուղևորվել են օդանավակայան։ Լոնդոնում Ռուսաստանի դեսպան Ալեքսանդր Յակովենկոն օդանավակայանում անձամբ է հրաժեշտ տվել գործընկերներին։
Նշվում է, որ Մեծ Բրիտանիան լքել է 80 մարդ (դիվանագետներն ու նրանց ընտանիքները)։
Մոսկվայից արտաքսվող բրիտանական դիվանագետները կվերադառնան հայրենիք։
Հիշեցնենք, որ մարտի 14-ին բրիտանական խորհրդարանում ելույթ ունենալիս Մեծ Բրիտանիայի վարչապետ Թերեզա Մեյը հայտարարել էր, որ Ռուսաստանը կապ ունի հետախուզության գլխավոր վարչության (ՀԳՎ) նախկին գնդապետ Սերգեյ Սկրիպալի և նրա դստեր թունավորման հետ։ Երկրից կարտաքսվեն 23 ռուս դիվանագետները, Բրիտանիան կդադարեցնի երկկողմանի շփումը Ռուսաստանի հետ, իսկ բարձրաստիճան պաշտոնյաներն ու թագավորական ընտանիքի անդամները չեն մեկնի Ռուսաստան` ֆուտբոլի աշխարհի առաջնությանը ներկա լինելու։ Բրիտանիան նաև հետ է կանչել Ռուսաստանի արտգործնախարար Սերգեյ Լավրովի` Մեծ Բրիտանիա այցելելու հրավերը:
Ռուսաստանի արտգործնախարարությունը հինգշաբթի հայտնել է, որ պատրաստվում է ի պատասխան այդ միջոցների արտաքսել 23 բրիտանացի դիվանագետի, նաև հայտնել է Բրիտանական խորհրդի գործունեության դադարի մասին։
