ԵՐԵՎԱՆ, 28 փետրվարի — Sputnik. Փետրվարի 27-ին Վալենսիայի շրջանային Պատգամավորական խորհրդի նորաստեղծ Կոնտիգո (Contigo) կուսակցության պատգամավոր Խոսե Էնրիկե Ագուարը նիստին ներկայացրեց Հայոց ցեղասպանության ճանաչման բանաձևը։ Այն ներկայացվեց համաձայն Արարատ Հայկական միության միջնորդագրի, որով առաջարկվում էր պատգամավորական խորհրդին պաշտոնապես ճանաչել Հայոց ցեղասպանությունը։
Խոսե Էնրիկե Ագուարը (José Enrique Aguar) հանգամանորեն ներկայացրեց Հայոց ցեղասպանության փաստը, այն ճանաչած երկրների, մարզերի, քաղաքների ու միջազգային կառույցների ցանկը և իրենց խորհրդարանի կողմից ցեղասպանության ճանաչման կարևորությունը։
Քաղաքացիական կուսակցության խոսնակը հակադարձեց Ահուարին՝ առաջարկելով ճանաչել բոլոր ցեղասպանությունները՝ առանց նշելու անուն և ազգ։
Քվեարկության ժամանակ 4 կուսակցություններ կողմ քվեարկեցին (Կոնտիգո՝ 1, Ձախ Միություն՝ 1, Կոմպրոմիս՝ 5, Պոդեմոս՝ 1. ընդհանուր՝ 7), 2 կուսակցություն՝ դեմ (Քաղաքացիական՝ 1, Ժողովրդական՝ 10. ընդհանուր՝ 11), իսկ սոցիալիստները՝ 13 ձայնով ձեռնպահ քվեարկեցին։
Այսպիսով` Իսպանիայի հին և բավականին «հնաոճ» երկու կուսակցությունները՝ Սոցիալիստականն ու Ժողովրդականը, հեռու են հասկանալու և ընդունելու ֆաշիզմի սխալներն ու հորդորել ճանաչել դրանք։
Նիստին ներկա էին նաև Արարատ Հայկական միությունը ներկայացուցիչները, ովքեր եկան միահամուռ եզրակացության՝ հաջորդ ընտրությունների ժամանակ իրենց աջակցության և արդարության աննահանջ պայքարի հարցում։
Իսպանիայում, ընդհանուր առմամբ, Հայոց ցեղասպանությունը ճանաչել և դատապարտել են 31 քաղաք և 5 մարզ։
