ԵՐԵՎԱՆ, 5 փետրվարի — Sputnik. Russia Today-ի և Sputnik-ի գլխավոր խմբագիր Մարգարիտա Սիմոնյանը լուսանկարը հրապարակել է Telegram-ի իր ալիքում։
«Կուղարկեմ Մոսուլում մեր տղաների նկարածներից միայն մեկը։ Նյարդերից թույլ մարդիկ չնայեն։ Ես ինքս նման բաներին նայել չեմ կարողանում։ Եվ իհարկե, ոչ մի Guardian կամ Սպիտակ սաղավարտներ կողքին չկան», — գրել է Սիմոնյանը։
Նա գրում է, որ փոքրիկ աղջիկը, որը զոհվել է կոալիցիայի գցած ռումբերից, այդպես էլ պառկած մնացել է Մոսուլի ավերակներում։
«Փողոցներում և տներում քայքայվող դիակների սարեր են, որոնք ոչ ոք չի հավաքում հաղթանակը հայտարարելուց 7 ամիս անց։ Մեր տղաներն են լուսանկարել։ Հրավիրում ենք այս դժոխքի համար պատասխանատու երկրների կառավարությունների և մարդասիրական կազմակերպությունների ուշադրությունը։ Ընդհանրապես ինչպե՞ս է այս ամենը հնարավոր։ Սակայն նրանց համար միևնույն է։ Առաջին անգամ չէ, որ հարցնում ենք»,- գրել է Սիմոնյանը։
Նա նշում է, որ եթե Ռուսաստանն Ամերիկա լիներ, ապա արևմտյան բոլոր ԶԼՄ-ներում արյունոտ լաց ու ոռնոց էր լինելու, հավաքվելու էր ՄԱԿ-ի անվտանգության խորհուրդը` քննադատելու և կոալիցիայի նկատմամբ պատժամիջոցներ մտցնելու և ուժեղացնելու համար, «այսօր այն պետության ղեկավարներին, որոնք նման բան թույլ կտային, ռազմական հանցագործներ կհայտարարեին»։
«Իսկ մենք լռում ենք։ Լավագույն դեպքում` կիսաձայն փնթփնթում։ Իբր մեր գործը չէ։ Իբր մենք չենք միջամտում այն պետությունների գործերին, որոնք միջամտում են այլ պետությունների գործերին։ Երբեմն ես նրանց նախանձում եմ, մայ ֆրենդս», — գրել է Սիմոնյանը։
Ruptly-ն երկուշաբթի տեսանյութ է հրապարակել ազատագրումից հետո դիակներով լի Մոսուլի վերաբերյալ։
ԻՊ գրոհայիններից ազատագրված իրաքյան Մոսուլ քաղաքը ավերակների է վերածվել։ Տեղի իշխանությունները հայտնում են, որ հայտնաբերած դիակների մնացորդները դիահերձարան են տանում, ոչ բոլորի դիակներն է հնարավոր ճանաչել։
2017 թվականի հուլիսին Իրաքի իշխանությունները հայտարարեցին, որ քաղաքն ամբողջությամբ ազատվել է զինյալներից։