ԵՐԵՎԱՆ, 16 հունվարի – Sputnik. Ռեալիթի շոուի ամերիկյան հեռուստաաստղ Քիմ Քարդաշյանի ու նրա ամուսին Քանյե Ուեսթի երրորդ երեխան է լույս աշխարհ եկել։
Այս մասին հայտնել է հենց ինքը` Քիմը, իր սեփական կայքում։
«2018 թվականի հունվարի 15–ին, առավոտյան ժամը 12:47, 3.3 կիլոգրամ կշիռ ունի։ Ես ու Քանյեն ուրախ ենք հայտնել մեր առողջ, գեղեցիկ դստեր լույս աշխարհ գալու մասին։ Մենք անչափ շնորհակալ ենք մեր փոխնակ մորը, որն իրականացրեց մեր երազանքը։ Նորթն ու Սեյնթը շատ ուրախ են ողջունել իրենց քրոջը»,– գրել է Քիմը։
Քիմ Քարդաշյանն ու Քանյե Ուեսթը որոշեցին 3–րդ զավակին ունենալ փոխնակ մոր միջոցով։ Նրանք գտան համապատասխան կնոջ և նրա ծառայությունները ներկայացնող գործակալության հետ կնքեցին պայմանագիր` վճարելով 113,85 հազար դոլար։ Հայտնի է, որ կինը կստանա 45 հազար, իսկ ընկերությունը` 68,85 հազար դոլար։
Մինչ այս Քիմն ու Քանյեն ունեին մեկ դուստր և մեկ որդի, որոնց լույս աշխարհ էր բերել Քիմ Քարդաշյանը։
