ԵՐԵՎԱՆ, 26 հոկտեմբերի — Sputnik. Հայ ճարտարապետ Յուրի Գրիգորյանի նախագծով Նյու Յորքում 307.5 մետրանոց գերբարակ երկնաքեր կկառուցվի։ Այս մասին հայտնում է Dezeen կայքը։
Նախագիծն արդեն հավանության է արժանացել, և շենքի վերին հատվածում դիտահարթակ կլինի, որտեղից հնարավոր կլինի վայելել Նյու Յորքի տեսարանը։ Շինարարությամբ կզբաղվի ռուսական Meganom ընկերությունը։
«Նոր սերունդը մեծ նշանակություն է տալիս ոչ թե ճարտարապետական օբյեկտներին, այլ քաղաքային կյանքին։ Այդ պատճառով էլ ճարտարապետները պետք է հարմարվեն քաղաքին, այսինքն` կառույցի ֆունկցիոնալ նշանակությունն ավելի մեծ պետք է լինի, քան տեսքը»,- կարծում է Գրիգորյանը։
Նրա խոսքով` նախագծի հեղինակները չեն ցանկացել, որ երկնաքերը շատ բարձր լինի, սակայն միևնույն ժամանակ կարևոր է եղել, որ նոր շենքը երևա բոլոր կողմերից, ու հարևաններն էլ հիանան կառույցի գեղեցիկ տեսքով։
