ԵՐԵՎԱՆ, 17 հոկտեմբերի — Sputnik. Ինչո՞ւ է 82-ամյա հայտնի դերասան Արմեն Ջիգարխանյանը հայտնվել հիվանդանոցում։ Ինչո՞ւ է նրա 38-ամյա կինը դիմել ոստիկանություն և դատախազություն։ Ո՞վ է տեղեկություն տարածել, որ Ջիգարխանյանից ուզում են խլել թատրոնը։ Այս հարցերի պատասխանները փորձել է գտնել «Կոմսոմոլսկայա պրավդան» և ներկայացրել է հայտնի հաղորդավար Անդրեյ Մալախովի և Արմեն Ջիգարխանյանի զրույցը։
Մալախովն Արմեն Ջիգարխանյանին հարցեր է ուղղել «Ուղիղ եթեր» հաղորդաշարի ընթացքում։
«Մի քիչ մրսել եմ։ Բայց ամենաբարդն այն է, որ իմ կյանքում ոչ այնքան լավ պահեր եղան։ Ինչպես ամեն նորմալ մարդ, ես էլ կին ունեի։ Հետո այդ կինը պարզվեց… Ես նրան դուր չեմ գալիս, և նա ինձ դուր չի գալիս»,- խոստովանել է Ջիգարխանյանը։
Նրա խոսքով, հիմա դժվարությամբ է արտաբերում կնոջ ազգանունը, որովհետև կինը շատ ցավ է պատճառել իրեն։
«Ես պատրաստ չեմ ներել նրան ու այսօր «ո՛չ» եմ ասում նրան: Վճռական «ոչ» եմ ասում։ Ավելի կոպիտ ասեմ՝ նա իրեն ստորաբար պահեց, նա գող է, ոչ թե մարդ»,- հայտարարել է Ջիգարխանյանը:
Պարբերականը զրուցել է նաև գործարար Արթուր Սողոմանյանի հետ, որը դերասանի հետ ընկերություն է անում 1995 թվականից։ Հիմա հենց նա է օգնում Ջիգարխանյանին։ Նրա խոսքով` դերասանն իսկապես չի ուզում տեսնել կնոջը, սակայն նա որևէ դիմում չի ներկայացրել ոստիկանություն, ի տարբերություն Ցիմբալյուկ-Ռոմանովսկայայի։ Դերասանն այժմ Մոսկվայի քաղաքային հիվանդանոցներից մեկում է, որտեղ բժշկները քաջածանոթ են նրա հիվանդության պատմությանը, և նրանք կարողացել են կայունացնել դերասանի առողջական վիճակը։ Նա հիվանդանոցում կմնա մինչև շաբաթվա վերջ։
