Դիանա Հարությունյան
Իսպանիան, առհասարակ, Մադրիդն ու Բարսելոնան Եվրոպայի ամենաապահով վայրերից էին համարվում մինչև օգոստոսի 17-ը: Կատալոնիայում բոլորովին վերջերս ծայրահեղականների դեմ պայքար էր մղվում, անվտանգության ուժերը հատուկ աշխատանքներ էին տարել: Միայն թե, ինչպես ցույց են տալիս զարգացումները, գնալով ավելի բարդանում է «Իսլամական պետության» ահաբեկչական խմբավորման գործողությունները կանխատեսելը: Արաբագետ Սարգիս Գրիգորյանը Sputnik Արմենիայի հետ զրույցում իսլամիստների մարտավարության փոփոխության փաստն է արձանագրում.
«Եթե նախկինում ահաբեկչությունը պայթյուններն էին կամ ավտոմատներով կրակոցները, ապա հիմա, «Իսլամական պետության» առաջնորդի նախորդ տարի արած հայտարարությունից հետո, այլ բանի ականատեսն ենք դառնում: Աբու Բաքր Ալ Բաղդադին հայտարարեց՝ հնարավորինս անկանխատեսելի ու չհայտնաբերվող գործիքների անցեք: Դրանք մեքենաներն են, որ մխրճվում են մարդկանց մեջ, սուր գործիքները, որոնցով հարձակվում են մարդկանց վրա»,–ասում է փորձագետն ու ավելացնում`որքան պարզ, այնքան ավելի անկանխատեսելի:
Իրականում, ահաբեկիչներն անում են ամեն բան, ինչպես ասում են, մի քայլ առաջ լինելու համար: Ըստ Գրիգորյանի`դրանով երկու խնդիր են փորձում լուծել: Նախ՝ հավասարապես պայքարում են թե՛ Մերձավոր Արևելքում, թե՛ Արևմուտքում, հետո, որքան հնարավոր է, փորձում են հասնել Եվրոպական հասարակության բևեռացմանը:
«Կարծում եմ այս անգամ թիրախը Իսպանիան էր, քանի որ որոշ ժամանակ այդ երկիրը հայտարարեց, որ կոալիցիոն ուժերի հետ պայքարելու է Իսլամական պետության դեմ: Սա այդ հայտարարության պատասխանն էր»,–ընդգծում է Սարգիս Գրիգորյանը:
Փաստն այն է, որ որքան «Իսլամական Պետության» շուրջ սեղմվում է օղակը Մերձավոր Արևելքում, այնքան լայնորեն են նրանք գործում Արևմուտքում: Ավելին` հենց այս պետության առաջնորդներն են հայտարարում՝ Մերձավոր Արևելք գալ պետք չէ խնդիրները լուծելու համար: Նիս, Լոնդոն, Բեռլին: Ստացվում է ահաբեկչությունից ապահովագրված չէ և ոչ մի պետություն: Անգամ «Իսլամական պետության» լիդերների փոփոխությունը էականորեն չի ազդում նրանց գործողությունների վրա:
«Վերջին երկու տարում բավականին լուրջ դեմքեր սպանվեցին: Արդեն մի քանի տասնյակ անգամ թաղել ու կենդանացրել են առաջնորդ Բաղդադիին: Բայց սա ոչ մի կերպ չի ազդում նրանց ծրագրերի վրա: Իսպանիայում զոհերն ավելի շատ կլինեին, եթե չլիներ անվտանգության աշխատակիցների լուրջ աշխատանքը: Բայց, ինչպես տեսնում եք, սա դեռ բավական չէ»,–ընդգծում է փորձագետը:
Իսլամիստներն ավելի պարզ ու չբացահայտվող գործիքների են անցնում։
Ո՞րն է լինելու ահաբեկիչների հաջորդ թիրախը: Ոչ ոք չունի այս հարցի պատասխանը: Ջիհադ հայտարարված է ողջ Արևմուտքին:
