Դիանա Հարությունյան, Sputnik.
Ըստ քրդական լրատվամիջոցների` նա զոհվել է օգոստոսի 14–ին, մարտի ժամանակ։ «Ակոս» թերթի խմբագրապետ Բագրատ Էստուկյանը Sputnik Արմենիայի հետ զրույցում մանրամասներ է հաղորդել Նուբար Օզանյանի մասին:
Զոհված հրամանատարը, մինչև Սիրիա հասնելն, աշխարհի մի քանի թեժ կետերում է կռել: 1988-ից Պաղեստինում էր պայքարում, 92-ից` Արցախում, վերջին երկու տարին էլ` Սիրիայում։
«Նրան հիմա Ազգային հերոսի կոչում են տվել: Ասում են` նա երկար ժամանակ ապրել է Հայաստանում, բայց ծնվել է Թուրքիայում»,- տեղեկացնում է Էստուկյանը:
Ինչպես հաղորդում են քրդական լրատվամիջոցները` Նուբար Օզանյանի մահվան հետ կապված ցավակցական հաղորդագրություններ են տարածել Թուրքիայում և Սիրիայում գործող քրդական ու կոմունիստական կուսակցությունները։
Աղքատ հայի ընտանիքում ծնված Նուբարը սովորել է Քարագյոզյան դպրոցում, այնուհետ` Դպրեվանքում, որտեղ ծանոթացել է Թուրքիայի կոմունիստների առաջնորդներից մեկի` Արմենակ Բաքրի հետ ու սկսել հետաքրքրություն ցուցաբերել պրոլետարիատի նկատմամբ։ 1980–ականների վերջում Նուբարը միացել է կոմունիստական կուսակցության ռազմական թևին և մասնակցել մի շարք գործողությունների։ Հայտնի է, որ նա թուրքերեն է թարգմանել Ստեփան Շահումյանի և Լենինի մասին գրքեր։
Իրականում, ըստ Էստուկյանի, Նուբար Օզանյանը միակ հայը չէ սիրիական պատերազմում: Քրդական ջոկատների կազմում էլի հայեր կան, ըստ որում թե՛ տեղացի, թե սփյուռքից: Նրանց ինքնությունը, սակայն, խիստ գաղտնի է պահվում:
