Գյումրի

Գյումրին ու Պետախ Տիկվան քույր քաղաքներ կդառնան. Քնեսեթի պատգամավորները շտապում են Երևան

34
Հայկական Գյումրին ու իսրայելական Պետախ Տիկվան քույր քաղաքներ կդառնան։ Համապատասխան պայմանագիրը կստորագրվի Հայաստանում, այս տարվա սեպտեմբերին` իսրայելական պատվիրակության Երևան կատարվելիք այցի շրջանակում։

ԵՐԵՎԱՆ, 15 օգոստոսի — Sputnik, Լաուրա Սարգսյան. Իսրայելական պատվիրակությունը` ի դեմս Քնեսեթի երկու փոխխոսնակների, իսրայելական խորհրդարանի տնօրեն Ալբերտ Սախարովիչի ու «Հայաստան–Իսրայել» հասարակական ֆորումի ներկայացուցչի սեպտեմբերի 10–ին կայցելի Հայաստան։

«Սա իսրայելական կողմի պատասխան այցն է։ Այս տարվա հունվարին մեզ մոտ հյուրընկալվել էին հայ խորհրդականները։ Առաջիկա այցի շրջանակում նախատեսվում է հանդիպել տարբեր կազմակերպությունների ու փորձագետների հետ», – Sputnik Արմենիայի թղթակցի հետ զրույցում ասաց Քնեսեթի 15-րդ գումարման պատգամավոր Ալեքսանդր Ցինկերը:

Նախատեսվում է պայմանագիր կնքել քույր քաղաքների` Պետախ  Տիկվայի (եբրայերենից թարգմանաբար` «Հույսի դարպաս») և Գյումրու միջև։ Պետախ Տիկվայում հայկական մեծ համայնք կա։

Պայմանագիրը քաղաքներին թույլ կտա իրականացնել փորձի փոխանակում, ծանոթանալ միմյանց պատմությանն ու մշակույթին, համատեղ միջոցառումներ անցկացնել։

Իսրայելական խորհրդարանականների ու ֆորումի ներկայացուցիչների այցը կտևի մինչև սեպտեմբերի 14–ը։

«Հայաստան–Իսրայել» հասարակական ֆորումը գործում է 2016 թվականից։ Դրա նախաձեռնողներն ու համանախագահներն են Ալեքսանդր Ցինկերը` իսրայելական կողմից ու գեներալ–լեյտենանտ Հայկ Քոթանջյանը` հայկական կողմից։ Ֆորումը նպատակ ունի խորացնել երկկողմանի հարաբերությունները։

34