ԵՐԵՎԱՆ, 14 օգոստոսի – Sputnik, Նորայր Շողիկյան. 12-ամյա դադարից հետո շախմատի աշխարհի 13-րդ չեմպիոն Գարրի Կասպարովը վերադարձավ մեծ սպորտ:
ԱՄՆ Սենթ Լուիս քաղաքում օգոստոսի 14-19-ը անց է կացվում Grand Chess Tour շախմատային գերմրցաշարի 4-րդ փուլը: Այն շախմատային աշխարհի հետաքրքրության կենտրոնում է հայտնվել հատկապես նրանով, որ մրցաշարին մասնակցում է նաև աշխարհի 13-րդ չեմպիոն Գարրի Կասպարովը:
12 տարվա դադարից հետո Grand Chess Tour-ը 54-ամյա Կասպարովի համար առաջին խոշոր մրցաշարն է:
Արագ և կայծակնային շախմատի կանոններով անցկացվող մրցաշարին մասնակցում են 10 գրոսմայստեր, որոնց թվում են Հայաստանի հավաքականի առաջին համար Լևոն Արոնյանը, աշխարհի նախկին չեմպիոններ Վիշվանաթան Անանդն ու Գարրի Կասպարովը:
Տեղի ունեցած վիճակահանության արդյունքում առաջին տուրում Արոնյանը կխաղա Դավիթ Նավարայի, իսկ Կասպարովը սպիտակներով իր ուժերը կչափի Ռուսաստանի չեմպիոն, կայծակնային շախմատի աշխարհի չեմպիոն Սերգեյ Կարյակինի հետ:
Գրոսմայստերները օգոստոսի 14-16-ը կխաղարկեն արագ շախմատի կանոններով մեկ, իսկ օգոստոսի 17-18-ը կայծակնային շախմատի կանոններով երկու շրջան:
Ի դեպ, 2005թ.-ին, շախմատին հրաժեշտ տալով, գրոսմայստերն ասել էր, որ մոտիվացիայի պակաս ունի, քանի որ շախմատային աշխարհում նվաճել է բոլոր բարձունքները: Թե որն է մեծ սպորտ վերադառնալու դրդապատճառը, Կասպարովը առայժմ չի բացահայտել: Գուցե, նոր մոտիվացիա է գտել կամ հոգնել է քաղաքականությունից, իսկ, գուցե, ինչպես ժամանակին ասել էր մեկ այլ քաղաքական գործիչ, չի ցանկանում դառնալ երիտասարդ թոշակառու:
