ԵՐԵՎԱՆ, 4 մայիսի — Sputnik. Երուսաղեմի հրեական համալսարանի այլազգի ուսանողները հայոց լեզվի ու Հայաստանի պատմության և մշակույթի դասընթացներ են անցում։ Այս մասին SBS ռադիոկայանին է հայտնել բուհի դասախոս, պրոֆեսոր Մայքլ Սթոունը։
Գիտնականը խոստովանել է, որ մեծացել է Ավստրալիայում, տիրապետում է բազմաթիվ լեզուների։
«Մի անգամ պրոֆեսորս խորհուրդ տվել հայերենն ուսումնասիրել։ Սկսեցի սովորել լեզուն, պարապում էի դասախոս Ավետիս Խանջյանի մոտ և պարզապես սիրահարվեցի հայերենին», — ասել է գիտնականը։
Պրոֆեսորը, որն ուսումնասիրել է ոչ միայն հայոց լեզուն, այլև հայ ժողովրդի պատմությունն ու մշակույթը, պատմել է նաև Իսրայելում ապրած հայերի և Հայաստանում եղած հրեաների թողած հետքի մասին։ Օրինակ` Նազարեթում Ավետման կաթոլիկ բազիլիկ եկեղեցու տակ քարեր են հայտնաբերվել, որոնց վրա հայկական տառեր են փորագրված։ Գտածոն թվագրվում է մեր թվարկության 5 դարով։
Ավստրալիացի Սթոունը սկսել է գրաբար դասավանդել հեռավոր 1967 թվականին։ 2007-ին թոշակի է անցել, բայց դասախոսական գործունեությունից չի հրաժարվել։ Երուսաղեմի հրեական համալսարանի պրոֆեսորը հայոց լեզու է դասավանդում ասպիրանտներին։