Հայոց ցեղասպանության պատմության դասագիրք` Մոնտեվիդեոյի համալսարանում

Հայոց ցեղասպանության պատմության դասագիրք` Մոնտեվիդեոյի համալսարանում

50
(Թարմացված է 19:09 06.04.2017)
Ուրուգվայում ներկայացվել է Հայոց ցեղասպանության պատմության դասագիրքը, որի հեղինակները Հումանիտար համալսարանի պատմության ֆակուլտետի դասախոսներ են։

ԵՐԵՎԱՆ, 6 ապրիլի — Sputnik. Մոնտեվիդեոյի Հումանիտար համալսարանի պատմության ֆակուլտետի դասախոսներ Անդրես Սեռալտան և Մարսելո Դեսենան ներկայացրել են «Ուսուցանել Հայոց ցեղասպանությունը: Տեսություն, մեթոդաբանություն և դիդակտիկա» գիրքը: Այս մասին հայտնում է um.edu կայքը։

Գիրքը ներկայացվել է մարդու իրավունքների պաշտպանության ազգային, միջազգային, ինչպես նաև հասարակական կազմակերպությունների, համայնքային կազմակերպությունների, մանկավարժների և ազգային մշակութային գործիչների լսարանի առջև:

Այս գրքի համար հիմք է հանդիսացել հեղինակների նախորդ՝ «Հայոց ցեղասպանությունը 1915 —1923թթ.: Հանցագործություն, նախապատմություն և հետևանքներ» գիրքը, որն անդրադառնում է Հայոց ցեղասպանության ընդհանուր դրույթներին և միջազգային ճանաչմանը։

1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։

Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։

50