ԵՐԵՎԱՆ, 22 մարտի — Sputnik. Հիտլերի թիկնապահ Ռոխուս Միշն իր «Հիտլերի վերջին վկան» գրքում պատմում է ֆյուրերի ինքնասպանության մասին, գրում է «Զվեզդան»` հղում տալով բրիտանական «The Sun» պարբերականին։
Անգլերեն լեզվով հրապարակված գրքում հեղինակն, ով Ադոլֆի Հիտլերի ու Եվա Բրաունի ինքնասպանության վկան է եղել, մանրամասն ներկայացրել է, թե ինչ է տեսել բունկեր մտնելուց հետո։
«Սկզբում տեսա Եվային, նա նստել էր ոտքերը ձգած, գլուխը թեքած Հիտլերի կողմ։ Կնոջ կոշիկները բազմոցի տակ էին։ Կողքին Հիտլերն էր` արդեն մահացած։ Հիտլերի աչքերը չռված էին, իսկ գլուխը` կախ»,-գրում է Միշը։
1940թ.-ից մինչև պատերազմի ավարտը` 1945 թ.-ի մայիս ամիսը, Ռոխուս Միշը Հիտլերի բունկերում պատվիրակ և հեռախոսավար էր։ Ապրիլի 30-ին, երբ Հիտլերը կրակեց ինքն իր վրա, իսկ Եվան կալիումի ցիանիդով թունավորեց իրեն, Միշը հարևան սենյակում էր։
Միշն առաջին մարդն էր, որ տեսավ նրանց անշարժացած մարմինները։
Հիտլերի թողած կտակի համաձայն` նրանց մարմինները բունկերից դուրս բերվեցին և այրվեցին այգում։ Ֆյուրերի ինքնասպանությունից հետո Միշին հաջողվեց փախչել բունկերից։ Ավելի ուշ սովետական զինուժը կարողացավ բռնել նրան։ Միշն 9 տարի անցկացրեց աշխատանքային ճամբարում, ուր նրան ուղարկել էին։ Նա մահացավ 96 տարեկանում, 2013 թ.-ին, Բեռլինում։ Մինչև կյանքի վերջը նախկին ֆաշիստը պնդում էր, թե իբր Հիտլերը հրաշալի ղեկավար էր և նորմալ մարդ։
