ԵՐԵՎԱՆ, 23 հունվարի — Sputnik. Գլեդիս Բերեջիկլյանի ընտրվելն Ավստրալիայի Նոր Հարավային Ուելս նահանգի վարչապետի պաշտոնում հայ համայնքին հույս է ներշնչել, որ այդ երկրում Հայոց ցեղասպանության փաստը կընդունվի պետական մակարդակով։ Այդ մասին Sputnik Արմենիային տված բացառիկ հարցազրույցում պատմեց Սիդնեյի բնակիչ Լուսինե Անանյանը։
Ավստրալիայի ամենամեծ քաղաքներից մեկը` Սիդնեյը, գտնվում է Նոր Հարավային Ուլես նահանգում։ Տեղի բնակիչների մեծամասնությունը Մերձավեր Արևելքից գաղթած հայեր են։ Sputnik Արմենիային հաջողվել է կապվել երևանցի Լուսինե Անանյանի հետ, որն արդեն 20 տարի բնակվում է Սիդնեյում։
«Գլեդիս Բերեջիկլյանը մեր հպարտությունն ու ուրախությունն է։ Նահանգի ղեկավար է դարձել բարեխիղճ մի հայուհի։ Նա մեծ հեղինակություն է վայելում հայրենակիցների շրջանում, ուստի բոլոր հիմքերը կան ենթադրելու, որ նրա ջանքերի շնորհիվ Հայոց ցեղասպանության ճանաչման հարցը պետական մակարդակով կբարձրացվի», — ասաց Անանյանը։
Կինը պատմեց, որ իր ամուսնու ծնողները մտերիմ են նոր վարչապետի ընտանիքի հետ։
Գլեդիս Բերեջիկլյանն ամուսնացած չէ, նա հարազատ քույր ունի։ Աղջիկները մանկուց աչքի են ընկել կրթություն ստանալու ձգտմամբ։ Դպրոցն ավարտելուց հետո Գլեդիսն ընդունվել է Սիդնեյի համալսարանի մաթեմատիկայի ֆակուլտետ և բարեհաջող ավարտել է այն։
Նա ընտրվել է տեղի օրենսդրական մարմնում, աշխատել գործադիր իշխանության կառուցվածքում։
«Փոքր հասակից նա զարգացած և կազմակերպված էր։ Ակտիվ մասնակցել է «Homenetmen»-ի գործունեությանը (Համահայկական ֆիզկուլտուրային միություն), այնտեղ միշտ եղել է առաջատար դերերում, շատ լավ է խաղացել բասկետբոլ, իրական առաջնորդ է եղել», — ասաց Անանյանը։
Ներկա պահին Ավստրալիայում Հայոց ցեղասպանությունը պաշտոնապես ընդունվել է երկու նահանգներում` Նոր Հարավային Ուելսում և Հարավային Ավստրալիայում։
