Սմարթֆոն

Գիտնականները պարզել են` ինչպես կարելի է սմարթֆոնը լիցքավորել մի քանի վայրկյանում

26
Գիտնականների մշակած տեխնոլոգիայի շնորհիվ մարտկոցները կարող են 20 անգամ ավելի երկար ծառայել, քան լիթիում–իոնային տարրերը, որոնք այսօր տարածված են էլեկտրոնիկայում։

ԵՐԵՎԱՆ, 24 նոյեմբերի — Sputnik. Ֆլորիդայի Կենտրոնական համալսարանի գիտնականները ճկուն սուպերկոնդենսատորների արտադրության նոր միջոց են ստեղծել։ Սնուցման նման աղբյուրով սմարթֆոնները կարող են մեկ շաբաթ աշխատել, իսկ սարքերի լիցքավորման համար անհրաժեշտ կլինի ընդամենը մի քանի վայրկյան։ Այս մասին հաղորդում է Engadget-ը։

«Դուք կարող եք լիցքավորել ձեր բջջային հեռախոսը մի քանի վայրկյանում և այլևս չլիցքավորել այն շաբաթվա ընթացքում»,- ասել է UCF դոկտորանտ Նիտին Չուդխարին։

Չուդխարիի խոսքով` սովորական լիթիում-իոնային մարտկոցները հնարավոր է լիցքավորել 1,5 հազար անգամ, որից հետո մարտկոցները կորցնում են հզորությունը։ Ինչպես հաղորդում են նոր տեխնոլոգիայի հեղինակները, իրենց սուպերկոնդենսատորը չի հնանում նույնիսկ 30 հազար անգամ լիարժեք լիցքավորումից հետո։

Նոր տեխնոլոգիան առայժմ չի կիրառվի կոմերցիոն սարքերում, քանի որ գիտնականների թիմը շարունակում է կատարելագործել այն։ Նրանք պատրաստվում են պատենտավորել իրենց մշակումը։

 

26