Ինքնաթիռ

Հայ ուղևորի պատճառով օդանավը Կիև է վերադարձել

45
(Թարմացված է 11:34 22.10.2016)
Ուկրաինան ստիպել է, որ չվերթի մեկնած օդանավը վերադառնա Կիև, սպառնացել է կործանիչներ օդ բարձրացնել, եթե ինքնաթիռը չվերադառնա:

ԵՐԵՎԱՆ, 22 հոկտեմբերի — Sputnik. Ուկրաինական իշխանությունները Կիև են վերադարձրել բելառուսական ինքնաթիռը՝ սպառնալով կործանիչներ օդ բարձրացնել: Այս մասին նշված է բելառուսական «Բելավիա» ավիաընկերության հաղորդագրության մեջ, որը հրապարակել է ՌԻԱ Նովոստին:

«Կիև-Մինսկ չվերթն իրականացնող «Բոինգ 737-800» օդանավը ստիպված է եղել վերադառնալ օդանավակայան։ Օդանավում եղել է 136 ուղևոր և անձնակազմի 6 անդամ»,- ասվում է հաղորդագրության մեջ։

«Բելավիա» ավիաընկերությունում պարզաբանել են, որ Բելառուսի օդային տարածք մտնելուց 50 կմ հեռավորության վրա օդաչուն կարգավարից հրահանգ է ստացել անհապաղ վերադառնալ մեկնման օդանավակայան՝ առանց բացատրություն տալու։

«Նաև հայտարարվել է, որ հրամանը չկատարելու դեպքում օդ կբարձրացվեն կործանիչներ։ Օդաչուն կատարել է կարգադրությունը»,- նշել են «Բելավիայում»։

Վայրէջքից հետո իրավապահներն օդանավից դուրս են բերել Հայաստանի Հանրապետության քաղաքացու։ Օդանավը կրկին մեկնել է Մինսկ և բարեհաջող վայրէջք կատարել։ Հաղորդագրության մեջ նշվում է, որ հայ ուղևորը ազատ է արձակվել և մեկ այլ չվերթով մեկնել Մինսկ։

«Բելավիայից» նաև հայտնել են, որ Ուկրաինայի օդային երթևեկության սպասարկման պետական ձեռնարկությունից փոխհատուցում կպահանջեն՝ օդանավը հետ ուղարկելու համար։

Թե որն է եղել հայ ուղևորին օդանավից դուրս բերելու պատճառը, չի նշվում։

45