Թուրքիա

Թուրքական ընդդիմության առաջնորդը վախենում է իր կյանքի համար

33
(Թարմացված է 20:37 09.06.2016)
Անհայտ անձը Թուրքիայի Ժողովրդահանրապետական կուսակցության նախագահի վրա փամփուշտ է նետել ահաբեկչության հետևանքով մահացած ոստիկանների հուղարկավորության ժամանակ

ԵՐԵՎԱՆ, 9 հունիսի-Sputnik. Թուրքիայի Ժողովրդահանրապետական ընդդիմադիր կուսակցության առաջնորդ Քեմալ Քըլըչդարօղլուն Ստամբուլում հունիսի 7-ին տեղի ունեցած ահաբեկչության զոհերի հուղարկավորության ժամանակ իր վրա նետված փամփուշտը որակել է որպես սպառնալիք, հաղորդում է ՌԻԱ Նովոստին։

Միջադեպը տեղի է ունեցել նախօրեին Թուրքիայի վարչապետ Բինալի Յըլդըրըմի և ՆԳՆ ղեկավար Էֆքան Ալայի ներկայությամբ, որոնք նույնպես մասնակցել են հուղարկավորությանը։ Ընդդիմության առաջնորդի վրա փամփուշտ նետած մարդը ձերբակալվել է։

«Ես կարծում եմ, որ դա մահացու սպառնալիք է։ Նա (հարձակվողը` խմբ.) դա արել է առանց ոստիկանության աշխատակիցների կողմից հակազդեցության։ Ավելին, նա կարծես համակարգել է իր գործողությունները նրանց հետ»,- լրագրողներին ասել է Քըլըչդարօղլուն` ցույց տալով նրանց պոլիէթիլենային փաթեթի մեջ գտնվող փամփուշտը։

Ընդդիմության առաջնորդի խոսքով` անվտանգության ուժերի աշխատակիցներն իրեն հորդորում էին` չմասնակցել հուղարկավորությանը` հարձակման սպառնալիքի պատճառով։

«Բայց ոչ ոք չի կարող արգելել մեզ ներկա գտնվել ահաբեկչության դեմ պայքարում զոհվածների հուղարկավորությանը»,- հավելել է նա։

33