Евровидение

«Եվրատեսիլ» մրցույթի զավեշտալի դեպքերը

46
2004թ.–ին Թուրքիայում հաղորդավարն ուղիղ եթերում սկսել էր մատով քիթը մաքրել

ԵՐԵՎԱՆ, 11 մայիսի — Sputnik. «Եվրատեսիլ» երգի միջազգային մրցույթն անցկացվում է արդեն վաթսուն տարի` սկսած 1956 թվականից։ Այդ ընթացքում եղել են նաև զավեշտալի միջադեպեր։

1999թ.-ին Երուսաղեմում մրցույթի հաղթող շվեդ Շառլոտա Նիլսոնի պարգևատրման արարողությունն ընդհատվել էր դժբախտ պատահարի պատճառով. նախորդ տարվա հաղթող Դանա Ինտերնեշնլը, ով բեմ էր բարձրացել շատ բարձրակրունկ կոշիկներով, ընկել էր։

2004թ.-ին Թուրքիայում հաղորդավարը ուղիղ եթերում միավորները հաղորդելու ժամանակ շեղվել էր և մոռանալով, որ եթերում է, սկսել էր մատով քիթը մաքրել։

Մոսկվայում «Եվրատեսիլ 2009»-ի ընթացքում Ալեքսանդր Ռիբակի պարգևատրման ժամանակ երգիչն այնքան հուզված էր եղել, որ մրցանակն ուժեղ սեղմել էր և կոտրել «Բյուրեղյա միկրոֆոնի» ոտքը։ Ալեքսանդրը կպցրել էր կոտրված մասերը։ Արդյունքում Ռիբակին մեկ անգամ էլ էին հանձնել մրցանակը։ Շվեդ քանդակագործ Կյել Էնգմանը («Եվրատեսիլ» մրցանակի արձանիկի հեղինակը) որոշել էր պատրաստել մրցանակի պատճենը։ Մրցույթի 55-ամյա պատմության մեջ առաջին անգամ հաղթողը մեկ հաղթանակի համար երկու պարգև էր ստացել։

2010թ.-ին Իսպանիան ներկայացնող Դանիել Դիգեսը ստիպված էր եղել երկու անգամ կատարել երգն այն պատճառով, որ նրա առաջին ելույթի ժամանակ բեմ էր բարձրացել մի տղամարդ, որը սկսել էր երգել և պարել երգչի հետ։ Պարզվել էր, որ կարգը խախտողը Ջիմի Ջամփն էր Կատալոնիայից։ Նա մի քանի շաբաթ առաջ նախազգուշացրել էր «Եվրատեսիլի» ժամանակ անկարգություն անելու մտադրության մասին, բայց կազմակերպիչները լուրջ չէին ընդունել նրա սպառնալիքը։

2012թ.-ին Բաքվում «Եվրատեսիլ» միջազգային երգի մրցույթի բացման արարողության ժամանակ տեղի էր ունեցել անախորժ միջադեպ։ Աշխատողները չէին հասցրել փռել կարմիր գորգը պատվիրակությունների ժամանելուց առաջ։ Արարողության մեկնարկն ուշացել էր ավելի քան մեկ ժամով, իսկ երբ «Եվրատեսիլի» առաջին մասնակիցներն անցել էին, պարզվել էր, որ նրանց անունները ոչ ոք չի հայտարարում։

 

46