ԵՐԵՎԱՆ, 20 հունվարի — Sputnik. Հայաստանի հավաքականի կիսապաշտպան Մարկոս Պիզելին տեղափոխվել է Սաուդյան Արաբիայի «Ալ Ռաեդ» ակումբ, հայտնում է «Առաջնությունը» պարբերականը՝ հղում անելով ակումբի պաշտոնական կայքին:
31-ամյա խաղացողը, ով հայտնի է Ռուսաստանի «Կուբան» և «Կրասնոդար» թիմերում իր խաղով, արդեն պաշտոնապես ներկայացվել է որպես արաբական թիմի խաղացող:
Պիզելին ավելի վաղ պայմանավորվել էր Ղազախստանի` ֆինանսական դժվարություններ ունեցող «Ակտոբե» ակումբի հետ պայմանագիրը խզելու մասին: Հայկական հավաքականի խաղացողը հանդես էր գալիս այդ ակումբում սկսած 2014 թվականից: 2015 թվականին Պիզելին «Ակտոբեի» կազմում անցկացրել է 27 խաղ, դարպաս է ուղարկել 5 գնդակ:
Ֆուտբոլիստը Ռուսաստանում երեք խաղաշրջան է անցկացրել: «Ալ Ռաեդը» ներկա պահին առաջնության մրցաշարային աղյուսակում զբաղեցնում է 12-րդ տեղը (վերջից երրորդը):
