ԵՐԵՎԱՆ, 17 նոյեմբերի — Sputnik. Աշխարհում յուրաքանչյուր ութերորդ երեխան լույս աշխարհ է գալիս հակամարտության գոտում։ ՄԱԿ-ի մանկական հիմնադրամի զեկույցի համաձայն, 2015 թվականին հակամարտության գոտում ծնվել է շուրջ 16.6 միլիոն երեխա, ինչը 200-ով շատ է անցած տարվա ցուցանիշից։ ՅՈՒՆԻՍԵՖ-ի փորձագետների գնահատմամբ` հաջորդ տարի հակամարտության գոտիներում 16.7 միլիոն երեխա կծնվի։
«Հակամարտության գոտում գտնվող երկրներում` Աֆղանստանում, Կենտրոնական Աֆրիկայի Հանրապետությունում, Իրաքում, Հարավային Սուդանում, Սիրիայում և Եմենում, պատերազմական գոտին լքելու համար նորածիններն ու նրանց մայրերը մի շարք լրջագույն խնդիրների են բախվում։ Կանայք ծննդաբերում են առանց բժշկական օգնության ու հակասանիտարական պայմաններում։ Հավանաբար նրանց երեխաները հինգ տարին չբոլորած կմահանան», — ասվում է զեկույցում:
Հայտնում են, որ 2015 թվականին ավելի քան 200 հազար երեխա ապաստան է խնդրել ԵՄ-ից։ Շուրջ 30 միլիոնն էլ հակամարտության սպառնալիքի պատճառով ստիպված է եղել լքել իր տունը։ Հակամարտության գոտիներում ավելի քան 250 միլիոն երեխա է ապրում։
