ԵՐԵՎԱՆ, 28 նոյեմբերի — Sputnik. Էրիկ Ուզումյանը` Փարիզի ահաբեկչությունների հետևանքով զոհված 17-ամյա Լոլա Ուզումյանի հայրը, դստեր  մահից հետո առաջին անգամ ելույթ է ունեցել: The Huffington Post պարբերականը հրապարակել է Ուզումյանի նամակը, ով հրաժարվել էր նոյեմբերի 27-ին մասնակցել ահաբեկչությունների զոհերի հիշատակին նվիրված միջոցառմանը:

Ուզումյանը կատարվածի համար մեղադրում է Ֆրանսիայի կառավարությանը, որը «երկար տարիներ անփույթ և անհեռատես քաղաքականություն է վարել Մերձավոր Արևելքում, ինչն էլ հանգեցրել է աղետի»:

«Ֆրանսիան չի կարող ապագա առաջարկել իր երիտասարդությանը: Եվրոպան չի կարող հետ կանգնել կույր ազատականության ճանապարհից: Նրանք, ում մենք ընտրել ենք, չեն կարող մեզ նոր քաղաքականություն ներկայացնել, ինչպես նաև մեր մտավորականությունը, բացառությամբ մի քանի անունների, ոչ մի կերպ չի գիտակցում տեղի ունեցող գործընթացների վտանգավորությունը: Ինձ սարսափեցնում են իմ երկրի ավերումն ու դստերս մահը», — գրել է սգացող հայրը:

Հիշեցնենք, որ Լոլա Ուզումյանը նոյեմբերի 13-ին հոր հետ գնացել էր Eagles of Death Metal խմբի համերգին: Ահաբեկիչները ներխուժել էին «Բատակլան» համերգասրահ, պատանդ վերցրել սրահում գտնվողներին: Ահաբեկչության ժամանակ ավելի քան 100 մարդ էր սպանվել, բազմաթիվ մարդիկ վնասվածքներ էին ստացել։ Լոլա Ուզումյանի հայրը իրարանցման ժամանակ կորցրել էր դստերը, մեկ օր անց հայրը տուն էր հասել, իսկ Լոլայից այդպես էլ որևէ տեղեկություն չկար։ Հարազատները պարզել էին, որ Լոլա Ուզումյանը ընկերների մոտ չի ապաստանել: Ավելի ուշ նրա անունը գտել էին զոհվածների ցուցակում:

ԵՐԵՎԱՆ, 3 մարտի- Sputnik. Շիրակցի գերիների հարազատները փակել են Շիրակի մարզպետարանի դուռը: Նրանք կեսօրից սկսած նստել են մարզպետարանի մուտքի դիմաց և աստիճաններին ու պահանջում են հստակ պատասխան, թե երբ են իրենց որդիները վերադարձվելու Հայաստան:

© Sputnik / Armenuhi Mkhoyan

Գերիների հարազատները փակել են Շիրակի մարզպետարանի մուտքը

«Այս ակցիան մեր երեխաների համար է, ուզում ենք իմանալ, թե երբ են բերելու մեր տղաներին` հստակ ժամանակ ենք պահանջում։ Ո՞վ է բերելու մեր տղաներին, ե՞րբ՝ ոչ մի բան չգիտենք»,-մեզ հետ զրույցում ասաց գերիներից մեկի մայրերը:

© Photo : official site of the President of RF

Պուտինը, Լավրովն ու Շոյգուն գերիների հարցում հետևողական են. ՀՀ ԱԳ նախարար

Գերիների ծնողները վրդովված են, որ իրենց մինչ այս պահը հստակ պատասխան չեն տվել, միայն հորդորել են համբերել ու սպասել: «Բայց էս մոլորությամբ ինչքան կարելի է սպասել: Գոնե իմանանք` ինչ է կատարվում: Հա ասում են` այս ամսվա վերջին կբերենք, մյուս ամսվա 15-ին կբերենք: Ասենք թե մենք այստեղ սպասենք, բա էն երեխեքը այնտեղ, ինչպե՞ս կսպասեն, հլը իրենց վիճակը պատկերացրեք»,-լրագրողների հետ զրույցում ասացին ծնողները:

Ինչպես նախկինում այս անգամ ևս հարազատները վստահեցնում են՝ ոչ մի քաղաքական պահանջ ու ենթատեքստ իրենց ակցիաները չունեն՝ միայն պահանջում են որդիների վերադարձը:

«Մեզ միայն մեր երեխաների հարցի լուծումն է պետք: Մեզ թող պատասխան տան, կամ ՀՀ վարչապետը մեզ ընդունի ու հստակ պատասխան տա մեր երեխաների ճակատագրի մասին: Էլ հնարավոր չէ սպասել: Հա՛մ խնդրում, հա՛մ պահանջում ենք: Մեռած ենք, թաղած չենք»,-նշեցին մայրերը:

Անդրադառնալով ՀՀ վարչապետի հետ օրեր առաջ Գյումրիում կայացած հանդիպմանը` ծնողները վստահեցրին՝ հստակ պատասխաններ չեն ստացել: «Արդեն 80 օր մեր երեխաներին չենք տեսել, ինչքան երկարեց, այնքան մեր տղաների վիճակը վատանալու է: Մենք ինչպես մեր երեխաներին հանձնել ենք իրենց, թող այդպես էլ սաղ-սալամաթ բերեն մեզ վերադարձնեն: Մեզ համար ցավալին այն է, որ մեր տղաները գերեվարվել են հրադադարից հետո»:

© Sputnik / Armenuhi Mkhoyan

Գերիների հարազատները փակել են Շիրակի մարզպետարանի մուտքը

Հիշեցնենք, որ նախորդ ակցիայի ժամանակ գերեվարված զինվորների ծնողները պահանջել էին հանդիպում ՀՀ և ԱՀ նախագահների հետ: Ասացին` մինչ օրս ոչ մեկի կողմից արձագանք չի եղել: Ծնողները վստահեցրին՝ եթե վաղը չստանան իրենց հարցերի պատասխանները, կամ էլ իրենց վարչապետը չընդունի, կդիմեն ծայրահեղ քայլերի: Թե ինչ քայլերի, նախընտրեցին գաղտնի պահել։