ԵՐԵՎԱՆ, 18 նոյեմբերի- Sputnik. Տոկիոյում ներկայացվել է Kibiro ռոբոտը, որին ստեղծելիս մշակողները նորագույն տեխնոլոգիներ են կիրառել և կարողացել են նոր նվաճումների հասել արհեստական բանականության ոլորտում: Ռոբոտը կարողանում է համակարգել մարդու նախասիրությունները և օգտակար խորհուրդներ է տալիս։
Kibiro-ն արտաքուստ նման է փոքր մարդու, տիրոջը «ճանաչում» է դեմքով և ձայնով, ոչ միայն զրուցում է, այլ նաև կարողանում է օգտակար տեղեկություններ քաղել զրույցից։ Նա հասկանում է, թե ինչն է դուր գալիս և տհաճություն պատճառում իր տիրոջը։ Տվյալները կուտակելուց հետո ժամանակի ընթացքում կարողանում է օգնել տիրոջը ռեստորան կամ ֆիլմ ընտրելու հարցում:
Մշակողներն ասում են, թե սա ռոբոտ է, որն «ապրում է մարդու հետ նրա առօրյան հարստացնելու համար»։ Kibiro-ի քաշը 800 գրամ է, հասակը` 28 սմ, նրան հեշտությամբ կարելի է դնել սեղանին կամ անկողնու մոտ։ Ունի տեսախցիկ, դինամիկ, բարձրախոս, ինչպես նաև՝ արտաքինը որոշող սարք։ Ռոբոտը ոչ միայն կարողանում է խոսել, այլ նաև էլեկտրոնային փոստի կամ սոցիալական ցանցերի միջոցով ակտիվ նամակագրական կապ է պահպանում տիրոջ հետ։
«Մարդու հետ շփվելու միջոցով Kibiro-ն իմանում է նրա արարքների և նախասիրությունների մասին, կարողանում է առաջարկել այն, ինչ վրիպել է մեր ուշադրությունից»,- հայտնում են մշակողները։
Նոր տարվա սկզբին Kibiro հասանելի կլինի հասարակական և մասնավոր կազմակերպությունների համար, իսկ 2016թ.-ի երկրորդ կեսից ռոբոտի ծառայություններից կարող են օգտվել նաև մասնավոր անձինք։ Kibiro-ի արժեքը 1000-1200 դոլար կկազմի։
